2
کُوطٜ بُلُسْ ندٜرْ تَسَلٛونِکَ
1 بَنْدِرَاٻٜ، اٛنٛنْ اٜ کٛعٜ مٛوطٛنْ اٛنْ اَنْدِ غَرٛلْ اَمِنْ تٛ مٛوطٛنْ نَاع اٜ مٜىٰرٜ نغٛلْ وٛنِ؞
2 اَمَّا کٛو ندٜ ندٜنّٛ مِنْ نجَرِي تٛرَّ اٜ سٜمْتِنٜىٰکِ اٜ فِلِبِ، نٛنْ نٛ اَنْدُطٛنْ، اٜ بَلَّلْ اَللَّه مٜىٰطٜنْ مِنْ کٛکِّيعٛنْ حَبَرُ بٜلْطُمْ پِوٛيْطُمْ تٛ مَاکٛ کُلٛلْ وَلَا، کٛو ندٜ يِمْٻٜ نغَݧِيمِنْ نَاع سٜطَّ؞
3 شَرٜلْ نغٜلْ مِنْ تٛرِيعٛنْ نجَٻٛنْ حَبَرُ بٜلْطُمْ، مِنْ کُوتِرَايِ فٜوْرٜ، وَلَا حَلّٜىٰندٜ ندٜرْ ٻٜرْطٜ اَمِنْ، مِنْ پٛيْرَايِعٛنْ؞
4 اَمَّا نٛنْ نٛ اَللَّه حٛولٛرِيمِنْ حٛکِّمِنْ کُوغَلْ وَعَجِنْکِ حَبَرُ بٜلْطُمْ، نٛنْ مِنْ نغَعَجِنِرْتَطُمْ، نَاع نغَمْ مِنْ مبٜلْنَنَ يِمْٻٜ ٻٜرْطٜ، اَمَّا نغَمْ مِنْ مبٜلْنَنَ اَللَّه ٻٜرْندٜ کَنْکٛ ڤٛوندٛووٛ ٻٜرْطٜ اَمِنْ؞
5 اٛنْ اَنْدِ مِنْ مٜىٰطَايِ مٜتَنْکِعٛنْ مٜتٛ بٜلْطُمْ حٛنْدُکٛ، نٛنْ مَا مِنْ نغَلَا سُونٛ غٛطُّمْ نغٛ بٛلِيطٜ اَمِنْ سُوطَتَ، اَللَّه وٛنِ شٜيْدُوجٛ اَمِنْ؞
6 مِنْ طَٻِّتَايِ مَنْغُ تٛ يِمْٻٜ، کٛو تٛ مٛوطٛنْ، کٛو تٛ وٛٻّٜ، کٛو ندٜ مِنْ مبَاوَيْ مِنْ مبِعَعٛنْ دٛولٜ نغَطَنٛنْمِنْ غٛطُّمْ نغَمْ مِنْ لِلَاٻٜ اَلْمَسِيحُ؞
7 اَمَّا اٜ مِنْ جٛغٛرِيعٛنْ سٜىٰسٜ‑سٜىٰسٜ نٛ مَدُوجٛ جٛغٛرْتٛو ٻِنْغٜلْ مُوطُمْ؞
8 نغَمْ يِدّٜ ندٜ مِنْ نغِطِعٛنْ حَا اٜ مِنْ شِرْيِي نَاع مِنْ کٛکَّعٛنْ حَبَرُ بٜلْطُمْ طُمْ اَللَّه تَنْ، اَمَّا فُو اٜ يٛنْکِيجِ اَمِنْ، نغَمْ اٛنْ نغَرْتِي ٻٜ مِنْ نغِطِ نَاع سٜطَّ؞
9 بَنْدِرَاٻٜ، اٛنْ نغٜجِّتَايِ کُوطٜ طٜ مِنْ کُوِ نَاع سٜطَّ؞ مِنْ کُوِي جٜمَّ اٜ ݧَلَوْمَ نغَمْ تٛع مِنْ نجٛوَنَ غٛطّٛ ندٜرْ مٛوطٛنْ وٛنْغَلْ تٜدّٛرَلْ شَرٜلْ کٛ مِنْ نغَعَجِنَنْتَعٛنْ حَبَرُ بٜلْطُمْ پِوٛيْطُمْ تٛ اَللَّه؞
10 اٛنٛنْ اٛنْ شٜيْدُعٜنْ، اَللَّه مَا اٛ شٜيْدُوجٛ دٛوْ نٛ مِنْ نجٛوطٛرِنٛو جٛنْدٜ شٜنِيندٜ اٜ اَادِلَاکُ اٜ جٛنْدٜ ندٜ وَلَا غٛطُّمْ کٛ وٛوطَا ندٜرْ مٛوطٛنْ، اٛنٛنْ کٛولِيٻٜ يٜىٰسُ؞
11 نغَمْ اٛنْ اَنْدِ نٛ ݧَاکٛ جٛغٛرِي ٻِٻّٜ مُوطُمْ، نٛنْ مِنْ جٛغٛرِيعٛنْ؞
12 مِنْ مبَغِّنِيعٛنْ، مِنْ شٜمْبِطِنِيعٛنْ، مِنْ مبِعِيعٛنْ دٛولٜ نغَطٛنْ جٛنْدٜ بٜلْنَنَيْندٜ اَللَّه ٻٜرْندٜ نٛدُّطٛعٛنْ ندٜرْ لَامُ مَاکٛ اٜ تٜدُّنغَلْ مَاکٛ؞
13 نٛنْ مَا کٛو ندٜيٜ اٜ مِنْ نغٜتَّ اَللَّه، نغَمْ شَرٜلْ نغٜلْ نجَٻُطٛنْ وٛلْدٜ اَللَّه ندٜ نَنْطٛنْ تٛ اَمِنْ، اٛنْ نجَٻَايِندٜ بٛ وٛلْدٜ نٜطّٛ، اَمَّا اٛنْ نجَٻِيندٜ ندٜ وٛلْدٜ اَللَّه، نٛنْ نٛ ندٜ وٛنْتِندِرِ؞ اٜ ندٜ حُوَ ندٜرْ ٻٜرْطٜ مٛوطٛنْ، اٛنٛنْ کٛولِيٻٜ اَللَّه؞
14 بَنْدِرَاٻٜ، اٛنْ نغَرْتِي اٜکِّتٛتٛوٻٜ جٛنْدٜ تٛکُّٻٜ اَللَّه وٛنْٻٜ لٜيْدِ يَحُودِيَ ٻٜ يٜىٰسُ اَلْمَسِيحُ؞ اٛنْ نجَرِي تٛرَّ تٛ يِمْٻٜ لٜيْدِ مٛوطٛنْ نٛنْ نٛ کَمْٻٜ مَا ٻٜ نجَرِرِ تٛرَّ تٛ جُوطٜ يَحُودَنْکٛعٜنْ؞
15 يَحُودَنْکٛعٜنْ ٻٜنْ مبَرِ يٜىٰسُ جٛومِرَاوٛ اٜ اَنَّبٛعٜنْ، ندٜنْ ٻٜ ندِيوِمِنْ؞ اٜ ٻٜ نغَطَ کٛ اَللَّه يِطَا، اٜ ٻٜ نغَݧَ کٛو مٛيٜ!
16 اٜ ٻٜ کَطَمِنْ وَعَجِنَنْکِ يِمْٻٜ نَاع يَحُودَنْکٛعٜنْ نغَمْ تٛع يِمْٻٜ ٻٜنْ کٜٻَ کِسْندَمْ؞ نٛنْ اٜ وَطَ کٛو ندٜيٜ اٜ ٻٜ کٜبِّنَ ڤٛوندِرْطُمْ حَکّٜ مَٻّٜ؞ اَمَّا مٛنّٜرٜ اَللَّه يَادَکٜ جِڤّٛنٛيَکٜٻٜ؞
بُلُسْ يِطِي سٛعَّاکِ تَسَلٛونِکَ
17 بَنْدِرَاٻٜ، طُمْ سٜنْدِيعٜنْ نغَمْ شَرٜلْ سٜطَّ ندٜرْ ٻَنْدُ، اَمَّا مِنْ اَلَايِ ݧُمُکِ دٛوْ مٛوطٛنْ؞ مِنْ کَاٻِي يِيکِعٛنْ؛ نغَمْ نٛنْ مِنْ نغَطِي کٛ مِنْ مبَاوَتَ وَطُکِ مِنْ نغِعَعٛنْ غِتٜ اٜ غِتٜ؞
18 مِنْ نغِطِي وَرْکِ تٛ مٛوطٛنْ؞ غٛونغَ، مِنْ بُلُسْ، مِ يِطِي مِ وَرَ نَاع ندٜ غٛعٛ نَاع ندٜ طِطِ، اَمَّا شٜيْطَنْ حَطِيمِنْ؞
19 دٛوْ ٻٜيٜ مِنْ نغَطِ ٻٜرْطٜ اَمِنْ؟ ٻٜيٜ مبٜلْنَنْتَمِنْ ٻٜرْطٜ؟ ٻٜيٜ نغٛنِ ٻٜ مِنْ مَنْتٛرْتٛو يٜىٰسٛ جٛومِرَاوٛ مٜىٰطٜنْ يٜىٰسُ ݧَلْندٜ وَرْتٛيْکِ مَاکٛ؟ نَاع طُمْ اٛنٛنْ؟
20 غٛونغَ، طُمْ اٛنٛنْ مِنْ مَنْتٛرْتٛو؞ اٛنٛنْ نغٛنِ بٜلْطُمْ ٻٜرْطٜ اَمِنْ؞