طٜرٜوٛلْ
بِيتُرُسْ
اَرَنْدٜوٛلْ
حَبَرُ دٛوْ طٜرٜوٛلْ نغٛعٛلْ
بِيتُرُسْ لِلَاطٛ يٜىٰسُ اَلْمَسِيحُ وِنْدِ طٜرٜوٛلْ نغٛعٛلْ؞ اٛ وِنْدِينغٛلْ دُوٻِ 96‑60 غَطَ دَݧْنغٛلْ يٜىٰسُ؞ اٛ وِنْدَنْغٛلْ تٛکُّٻٜ يٜىٰسُ جٛوطِيٻٜ بِغٜىٰجٜ فٜىٰرٜ‑فٜىٰرٜ؞ کٛ وَطِ ٻٜ نجٛوطِي ندٜرْ بِغٜىٰجٜ فٜىٰرٜ‑فٜىٰرٜ وٛنِ غٛطّٛ لَامِيطٛ بِعٜتٜىٰطٛ کَيْسَرْ نٜىٰرٛ تٛرِّيٻٜ سَنْکِتِٻٜ؞ بِيتُرُسْ وِنْدَنِيٻٜ وِيکِ ٻٜ مُݧَ ندٜرْ تٛرَّ کَ ٻٜ نجَرَتَ؞ اٛ وِعِيٻٜ ٻٜ نغَطَ جٛنْدٜ اَادِلَاکُ، ٻٜ نغَطَ ٻٜرْطٜ مَٻّٜ دٛوْ يٜىٰسُ تَنْ، ٻٜ نغَرْتَ شٜنِيٻٜ، ٻٜ نغَطَ کَ حٛولَاکِ يٜىٰسُ؞ اٛ حٛلِّيٻٜ نٛ حَانِ تٛکُّٻٜ يٜىٰسُ نجٛوطٛرٛو ندٜرْ وَطُکِ کٛ وٛوطِ، اٜ تٛکُّکِ اَللَّه اٜ ٻٜرْندٜ غٛعٛ، اٜ يِطِندِرْکِ حَکُّندٜ مَٻّٜ؞
1
1 مِنْ بِيتُرُسْ لِلَاطٛ يٜىٰسُ اَلْمَسِيحُ وِنْدِ طٜرٜوٛلْ نغٛعٛلْ؞
مِ وِنْدَنْغٛلْ يِمْٻٜ ٻٜ اَللَّه سُٻِ، شَنْکِتِيٻٜ، غَطٛوٻٜ جٛنْدٜ کٛطَاکُ اٜ لٜيْدِ فَنْتُسْ، اٜ لٜيْدِ غَلَاتِيَ، اٜ لٜيْدِ کَفَدٛوکِيَ، اٜ لٜيْدِ اَاسِيَ، اٜ لٜيْدِ بِتِينِيَ؞
2 اَللَّه ݧَاکٛ مٛ دٛوْ سُٻِيعٛنْ ندٜرْ يِدّٜ مَاکٛ؞ رُوحُ مَاکٛ وَرْتِرِيعٛنْ شٜنِيٻٜ، نغَمْ تٛکّٛنْ کٛ يٜىٰسُ اَلْمَسِيحُ وِعِ، لَاٻٛنْ بَرْکَ پِيپَمْ مَاکٛ؞
اَللَّه ٻٜيْدَ بَرْکِطِنْکِعٛنْ، ٻٜيْدَ حٛکُّکِعٛنْ جَمْ؞
کَمُّندٜ بٛنْدٜ
3 يٜتّٛورٜ تَبِّتَ تٛ اَللَّه، ݧَاکٛ جٛومِرَاوٛ مٜىٰطٜنْ يٜىٰسُ اَلْمَسِيحُ؞ نغَمْ يُرْمٜىٰندٜ مَاکٛ مَوْندٜ اٛ حٛکِّيعٜنْ يٛنْکِ کٜسُمْ بَرْکَ اُمَّاکِ يٜىٰسُ دَغَ مَيْدٜ؞ نغَمْ مَاجُمْ اٜنْ نغٛودِ کَمُّندٜ تَبُّتُندٜ،
4 اٜنْ کٜٻَيْ ندٛنُ نغُ لَلَّتَا، نغُ وٛنَّتَاکٛ، ندٜنْ نغُ رٜعَتَا، نغُ طُمْ رٜسَنِعٛنْ تٛنْ دٛوْ؞
5 اٛنٛنْ بَوْطٜ اَللَّه اٜ سُرَنَعٛنْ بَرْکَ حٛولَاکِ يٜىٰسُ، نغَمْ کٜٻٛنْ کِسْندَمْ طَمْ اٛ سِرْيِي وَنْغِنْکِ ݧَلْندٜ رٜعُکِ دُونِيَارُ؞
6 نغَمْ نٛنْ، نَنٜىٰ بٜلْطُمْ طُطُّمْ، کٛو ندٜ جٛونِ طُمْ وَطٛتٛ اٛنْ نَتَّيْ تٛرَّاجِ فٜىٰرٜ‑فٜىٰرٜ شَرٜلْ سٜطَّ
7 نغَمْ تَبِّتِنْکِ حٛولَارٜ مٛوطٛنْ؞ حٛولَارٜ ندٜنْ ندٜ ٻُرِ جِينَارِ؞ کٛو ندٜ جِينَارِ ݧَلْندٜ غٛعٛ طُمْ رٜعَيْ، اٜ طُمْ فٛوندِرٜىٰ حِيتٜ؞ نٛنْ مَا طُمْ فٛوندَيْ حٛولَارٜ مٛوطٛنْ طُمْ تَبِّتِنَنْدٜ نغَمْ کٜٻٛنْ مَنْتٜىٰکِ، اٜ تٜدِّنٜىٰکِ، اٜ مَوْنِنٜىٰکِ ݧَلْندٜ ندٜ يٜىٰسُ اَلْمَسِيحُ وَرْتَتَ؞
8 کٛو ندٜ اٛنْ مٜىٰطَايِ يِيکِمٛ، اٛنْ نغِطِمٛ؞ کٛو ندٜ نَاع اٛنْ نغِعَمٛ جٛونِ، اٛنْ کٛولَکٜمٛ، اٛنْ نَنَ بٜلْطُمْ مَوْطُمْ ندٜرْ ٻٜرْطٜ مٛوطٛنْ پَٻِّيطُمْ مٜتٜىٰکِ؞
9 نغَمْ اٛنْ کٛولَکٜ يٜىٰسُ اَلْمَسِيحُ وَطِ اٛنْ کٜٻَ کِسْندَمْ؞
10 اَنَّبٛعٜنْ غَطُٻٜ اَنَّبَاکُ دٛوْ شَاحُ طُمْ کٜٻٛتٛنْ، وَاتٛ کِسْندَمْ، ٻٜ نغَطِي کَ طَٻُّتُکِ لَاوٛلْ کِسْندَمْ طَمْ طٛنْ نَاع سٜطَّ؞
11 رُوحُ اَللَّه غٛنْطُمْ ندٜرْ ٻٜرْطٜ مَٻّٜ وِعِيٻٜ نٛ اَلْمَسِيحُ تٛرّٛرْتٛو، ندٜنْ غَطَ طٛنْ اٛ مَوْنِنٜىٰ؞ نغَمْ نٛنْ، ٻٜ طَٻِّتِي نَاع سٜطَّ نغَمْ ٻٜ اَنْدَ مٛيٜ وٛنِ اَلْمَسِيحُ، ندٜنْ ندٜيٜ فِي طُعُمْ وَطَتَ؞
12 طُمْ وِعِيٻٜ اٛنٛنْ ٻٜ کُوَنْتَ نَاع کٛعٜ مَٻّٜ، ندٜ ٻٜ مٜتِ دٛوْ فُو فِي طُمْ طٛنْ طُمْ نَنْطٛنْ جٛونِ؞ اٛنْ نَنِيطُمْ دَغَ تٛ غَعَجِنَنْٻٜعٛنْ حَبَرُ بٜلْطُمْ بَرْکَ رُوحُ اَللَّه لِلٛيَاطُمْ دَغَ دٛوْ؞ کٛو مَلَاعِکَعٜنْ اٜ نغِطِ فَامُکِطُمْ؞
جٛنْدٜ لَمْندٜ
13 نغَمْ نٛنْ، شِرْيٜىٰ ٻٜرْطٜ مٛوطٛنْ، شُرٜىٰ کٛعٜ مٛوطٛنْ، نغَطٜىٰ کَمُّندٜ مٛوطٛنْ فُو دٛوْ بَرْکَ طُمْ اُمْ حٛکَّتَعٛنْ ݧَلْندٜ وَرْتٛيْکِ يٜىٰسُ اَلْمَسِيحُ؞
14 نغَطٜىٰ جٛنْدٜ بٛ ٻِٻّٜ غَطٛوٻٜ کٛ طُمْ وِعِٻٜ؞ تٛع اٛنْ تٛکِّرَنْ سُونٛ مٛوطٛنْ نغٛ ندٜنّٛ، نغٛ نغٛودُنٛوطٛنْ شَرٜلْ کٛ اٛنْ اَنْدَا کٛو طُمٜ؞
15 اَمَّا نٛنْ نٛ اَللَّه نٛدُّطٛعٛنْ اٛ شٜنِيطٛ، اٛنٛنْ مَا، نغَرْتٜىٰ شٜنِيٻٜ ندٜرْ کٛ نغَطٛتٛنْ فُو؞
16 نغَمْ اَايَارٜ وِعِي، «نغَرْتٜىٰ شٜنِيٻٜ، نغَمْ مِنْ مِ شٜنِيطٛ؞»
17 اٛنْ نٛدَّ اَللَّه ݧَاکٛ مٛ دٛوْ ندٜرْ دٛعَارٜ مٛوطٛنْ؞ ندٜ اٜ مٛ وَطَنَ کٛو مٛيٜ کِيتَ دٛوْ کُوطٜ طٜ وَطِ، اٛ حٛلَّتَا فٜىٰرٛوتِرٛلْ، نغَطٜىٰ جٛنْدٜ مٛوطٛنْ ندٜ کٛطَاکُ اٜ دُونِيَارُ ندُعُ ندٜرْ کُلٛلْ اَللَّه؞
18 اٛنْ اَنْدِ طُمْ رِمْطِنِيعٛنْ دَغَ نغِکُّوجِ مٜىٰرٜىٰجِ طِ ندٛنُطٛنْ تٛ مَامَعٜنْ مٛوطٛنْ؞ طُمْ رِمْطِنِرَايِعٛنْ فِي رٜعٛوجُمْ بٛ اَجُرْفَارِ اٜ جِينَارِ؞
19 طُمْ رِمْطِنِرِيعٛنْ پِيپَمْ اَلْمَسِيحُ غٛودُطَمْ دَرَجَ؞ کَنْکٛ وٛنِ بٛ کَرٛورِ ندِ وَلَا غٛطُّمْ کٛ حَانَا؞
20 کَنْکٛ اَللَّه سُٻِ دَغَ کٛ طُمْ تَغَ دُونِيَارُ، اَمَّا طُمْ وَنْغِنِمٛ نغَمْ مٛوطٛنْ اٜ بَلْطٜ طٜعٜ طٜ رٜعُکِ دُونِيَارُ؞
21 بَرْکَ مَاکٛ کٛولِيطٛنْ اَللَّه، اُمِّنْطٛمٛ دَغَ مَيْدٜ، حٛکِّمٛ مَنْغُ؞ نغَمْ نٛنْ، اٜ حٛولَارٜ مٛوطٛنْ اٜ کَمُّندٜ مٛوطٛنْ دٛوْ اَللَّه طُمْ وٛنِ؞
22 تٛکُّکِ غٛونغَ لَاٻِنَنِيعٛنْ ٻٜرْطٜ اٛنْ نغِطِندِرِ يِدّٜ ندٜ غٛونغَ؞ نغَمْ مَاجُمْ، نغِطِندِرٜىٰ اٜ ٻٜرْندٜ غٛعٛ؞
23 نغَطٜىٰ نٛنْ نغَمْ اَللَّه حٛکِّيعٛنْ يٛنْکِ کٜسُمْ بَرْکَ وٛلْدٜ مَاکٛ غٛودُندٜ يٛنْکِ تَبُّتُندٜ حَا اَبَدَا؞
24 نٛ اَايَارٜ وِعِ،
«فُو يِمْٻٜ بٛ غٜىٰنٜ مبَعِ،
فُو لَٻْکِ مَٻّٜ بٛ ڤِيندِ لَدّٜ وَعِ؞
غٜىٰنٜ اٜ نجٛورَ، ڤِيندِ اٜ سَامَ،
25 اَمَّا وٛلْدٜ جٛومِرَاوٛ اٜ ندٜ طٛنْ حَا اَبَدَا؞»
ندٜعٜ وٛلْدٜ کَيْرٜ وٛنِ حَبَرُ بٜلْطُمْ دٛوْ يٜىٰسُ اَلْمَسِيحُ طُمْ اُمْ وَعَجِنَنِعٛنْ؞