2
اٛنٛنْ نغٛنِ يِمْٻٜ شٜنِيٻٜ ٻٜ اَللَّه
1 نغَمْ نٛنْ، اَلٜىٰ کٛو اِرِ طُمٜ نغِکُّ کَلُّطُمْ؞ اَلٜىٰ فٜوْرٜ، اٜ نغِکُّ مُنَافُکِيجٛ، اٜ لَوْلِيرُ، اٜ حُطُکِ وٛٻّٜ کٛو اِرِ کِيٜ؞
2 نٛ ٻِکّٛيْ کٜشّٛيْ نغِطِرِ اٜنْطَمْ، اٛنٛنْ مَا نغِطِرٜىٰ وٛلْدٜ اَللَّه نٛنْ نغَمْ ندٜ وَطَعٛنْ شٜمْبِطٛنْ ندٜرْ کِسْندَمْ طَمْ کٜٻُطٛنْ،
3 ندٜ اٛنْ مٜىٰطِي نَنْکِ بٜلْطُمْ يُرْمٜىٰندٜ جٛومِرَاوٛ؞
4 نغَرٜىٰ تٛ مَاکٛ؞ کَنْکٛ وٛنِ حَيْرٜ غٛودُندٜ يٛنْکِ؞ يِمْٻٜ نغَݧِيمٛ، اَمَّا اَللَّه سُٻِيمٛ مَوْنِنِيمٛ؞
5 اٛنٛنْ بٛو، بٛ کَاپٜ غٛودُطٜ يٛنْکِ، اَلٜىٰ طُمْ حُوتِرَعٛنْ طُمْ مَحَ وُرٛ شٜنِينغٛ نغَمْ رُوحُ اَللَّه؞ اٛنٛنْ نغٛنِ کَوْتَلْ اَرْدِيٻٜ دِينَ، اٛنْ کٛکَّ اَللَّه شَکِّرِ ندِ رُوحُ مَاکٛ وَلَّتَعٛنْ کٛکّٛنْ؞ اٜ مٛ جَٻَندِ لَاوٛلْ يٜىٰسُ اَلْمَسِيحُ؞
6 نغَمْ اَايَارٜ وِعِي،
«رَطُّمْ، مِ سُٻِي حَيْرٜ ٻُرْندٜ کٛو ندٜيٜ دَرْنُکِ مَادِ،
مِ تِغِّيندٜ ندٜ جٛطِّنَ مَادِ غَرِيرِ سِحِيٛونَ؛
فُو کٛولِيطٛمٛ اٛ سٜمْتِنْتَاکٜ کٛو سٜطَّ؞»
7 حَيْرٜ ندٜنْ طٛنْ اٜ ندٜ وٛودِ مَنْغُ تٛ مٛوطٛنْ اٛنٛنْ کٛولِيٻٜ يٜىٰسُ؞ اَمَّا تٛ غَݧُٻٜ کٛولٛومٛ ٻٜ نغِعَيْ نٛ،
«حَيْرٜ ندٜ مَحٛوٻٜ نغَݧِ،
کَيْرٜ وٛنِ حَيْرٜ ٻُرْندٜ کٛو ندٜيٜ دَرْنُکِ مَادِ؞»
8 طٛنْمَا وٛنْدٜ اَايَارٜ وِعِي،
«طُمْ حَيْرٜ غَطٛورٜ يِمْٻٜ فٜغّٛو،
غَطٛورٜ يِمْٻٜ نجَنَ؞»
اٜ ٻٜ ڤٜغّٛو نغَمْ ٻٜ نغَݧِي وَطُکِ کٛ وٛلْدٜ اَللَّه وِعِ؞ نٛنْ طُمْ سِرْيَنِيٻٜ؞
9 اَمَّا اٛنٛنْ طُمْ لٜݧٛلْ نغٛلْ اَللَّه سُٻِ، اٛنْ کَوْتَلْ اَرْدِيٻٜ دِينَ کُوَنٛوٻٜ لَامِيطٛ مَوْطٛ، يِمْٻٜ شٜنِيٻٜ، ٻٜ اَللَّه جٜيِ؞ اٛ سُٻُعٛنْ نغَمْ نغَعَجِنٛنْ حَبَرُ کُوطٜ مَاکٛ کَيْطِنِيطٜ؞ اٛ وُرْتِنٛيعٛنْ ندٜرْ ݧِوْرٜ نغَمْ نَتّٛنْ جَيْنغٛلْ مَاکٛ کَيْطِنِينغٛلْ؞
10 ندٜنّٛ نَاع اٛنْ يِمْٻٜ اَللَّه، اَمَّا جٛونِ اٛنْ يِمْٻٜ مَاکٛ؞ ندٜنّٛ اٛنْ کٜٻَايِ يُرْمٜىٰندٜ مَاکٛ، اَمَّا جٛونِ اٛنْ کٜٻِي؞
مَشُّٻٜ اَللَّه
11 اٛنٛنْ ٻٜ نغِطُمِ، اٛنْ حٛٻّٜ ندٜرْ دُونِيَارُ ندُعُ، اٛنٛنْ نَاع طُمْ ٻٜ طٛعٛ؞ نغَمْ نٛنْ اٜ مِ تٛرٛوعٛنْ، شٜنْدِرٜىٰ اٜ سُونٛوجِ ٻَنْدُ غِطِّ حَلْکُکِعٛنْ؞
12 کٛلّٜىٰ نغِکُّ بٛطُّمْ ندٜرْ يِمْٻٜ ٻٜ اَنْدَا اَللَّه، نغَمْ تٛ ٻٜ مبِعَيْ اٛنْ کَلُّٻٜ، سٜيْ ٻٜ نغِعَ کُوطٜ مٛوطٛنْ طٜ بٛطّٜ، ٻٜ مَوْنِنَ اَللَّه ݧَلْندٜ وَرْتُکِ مَاکٛ؞
13 کٛو طُمٜ لَامُ لَامٛتٛوطُمْ يِمْٻٜ، تٛکّٜىٰ کٛ طُمْ وِعِ، نغَمْ نٛنْ جٛومِرَاوٛ يِطِ؞ تٛکّٜىٰ مَوْطٛ لَامِيٻٜ، اَرْدِيطٛ دٛوْ کٛو مٛيٜ،
14 حَا اٜ غٛمْنَعٜنْ، نغَمْ لَامِيطٛ اٛنْ لِلِٻٜ ٻٜ کٛکَّ غَطٛوٻٜ کٛ وٛوطَا بٛنٜ، ٻٜ مَنْتَ غَطٛوٻٜ کٛ وٛوطِ؞
15 نغَمْ اَللَّه اٜ يِطِ نغَطٛنْ کٛ وٛوطِ يٜىٰسٛ يِمْٻٜ ٻٜ نغَلَا اَنْدَلْ، نغَمْ نغَطٛنْ ٻٜ اَلَ مٜتٜمٜتٜىٰجِ طِ نغَلَا فَامُ؞
16 نَاع اٛنْ مَشُّٻٜ، اٛنْ رِمْطِنَاٻٜ، اَمَّا تٛع اٛنْ نغَرْتِرْ رِمْطِنْکِ مٛوطٛنْ وَرْتَ لَاوٛلْ وَطُکِ کٛ حَلِّ، اَمَّا نغَطٜىٰ جٛنْدٜ بٛ مَشُّٻٜ اَللَّه؞
17 کٛکّٜىٰ کٛو مٛيٜ مَنْغُ، نغِطٜىٰ تٛکُّٻٜ يٜىٰسُ؞ کُلٜىٰ اَللَّه، مَوْنِنٜىٰ لَامِيطٛ؞
يَرْکِ تٛرَّ اِرِ کَ اَلْمَسِيحُ يَرِ
18 اٛنٛنْ مَشُّٻٜ، نغَطٜىٰ کٛ جٜيْٻٜعٛنْ مبِعِعٛنْ کٛکّٛنْٻٜ مَنْغُ کٛو ندٜيٜ؞ نَاع غٛودُٻٜ نغِکُّ بٛطُّمْ تَنْ اٜ ٻٜ شَطَا نغَطَنْتٛنْ نٛنْ، حَا مَا اٜ غٛودُٻٜ ٻٜرْطٜ کَٻٛوجٜ؞
19 تٛ نٜطّٛ مُݧِي ندٜرْ تٛرَّ نغَمْ اٜ ݧُمَ دٛوْ کٛ اَللَّه يِطِ، اَللَّه بَرْکِطِنَيْمٛ، تٛ اٜ مٛ يَرَ تٛرَّ کَنْ نَاع نغَمْ وَطُکِ کٛ وٛوطَا؞
20 تٛ اٛنْ نغَطِي کٛ وٛوطَا اٛنْ ڤِيَامَ اٛنْ مُݧِي، مٛيٜ مَنْتَتَ مُݧَلْ مٛوطٛنْ؟ اَمَّا تٛ اٛنْ نغَطِي کٛ وٛوطِ اٛنْ تٛرَّامَ اٛنْ مُݧِي، اَللَّه بَرْکِطِنَيْعٛنْ؞
21 دٛوْ اِرِ کَنْ طٛنْ تٛرَّ اَللَّه نٛدِّعٛنْ، نغَمْ اَلْمَسِيحُ مَا يَرِي تٛرَّ نغَمْ مٛوطٛنْ؞ اٛ اَلَنِيعٛنْ کٛ تٛکّٛتٛنْ نغَمْ نجٛوطٛرٛوطٛنْ نٛ اٛ جٛوطٛرِي؞
22 اٛ مٜىٰطَايِ وَطُکِ حَکّٜ کٛو سٜطَّ، طُمْ مٜىٰطَايِ نَنْکِ فٜوْرٜ وُرْتَکٜ دَغَ حٛنْدُکٛ مَاکٛ؞
23 ندٜ اٛ حُطَا، اٛ وَاتَاکِ؞ ندٜ اٛ يَرِ تٛرَّ، اٛ وِعَايِ اٛ وَاتٛتٛ، اَمَّا اٛ اَلَنِي اَللَّه غَطٛووٛ کِيتَ غٛونغَ؞
24 کَنْکٛ اٜ حٛورٜ مَاکٛ جَٻِ اٛ يٛوَنٜىٰ حَکّٜ طُمْ نغَطُطٜنْ اٛ ٻِلٜىٰ دٛوْ غَافَانغَلْ؞ اٛ وَطُ نٛنْ نغَمْ لَاوٛلْ مَيْدٜ مَاکٛ اَلٜنْ وَطُکِ حَکّٜ، نجٛوطٛوطٜنْ جٛنْدٜ اَادِلَاکُ؞ نٛ اَايَارٜ وِعِ، «بَرْکَ نَوْنٛوطٜ مَاکٛ اٛنْ نجَمْطِتِي؞»
25 ندٜنّٛ اٛنْ نَنْدِي اٜ بَالِ مَجُّطِ لَاوٛلْ، اَمَّا جٛونِ طُمْ سٛعّٛيِيعٛنْ نغَمْ تٛکّٛنْ غَيْنَاکٛ ڤَامَنَيْطٛ يٛنْکِيجِ مٛوطٛنْ؞