4
جٛنْدٜ تٛکُّطٛ اَلْمَسِيحُ
1 ندٜ اَلْمَسِيحُ يَرِي تٛرَّ ندٜرْ ٻَنْدُ، اٛنٛنْ مَا شِرْيٜىٰ ٻٜرْطٜ مٛوطٛنْ نغَمْ يَرْکِ تٛرَّ؞ نغَمْ فُو جَرْطٛ تٛرَّ ندٜرْ ٻَنْدُ، اَلِي وَطُکِ حَکّٜ؞
2 نغَمْ نٛنْ، ندٜرْ بَلْطٜ مٛوطٛنْ کٛرِيطٜ اٜ دُونِيَارُ، تٛع اٛنْ ٻٜيْدُ تٛکُّکِ سُونٛ ٻَنْدُ، اَمَّا تٛکّٜىٰ کٛ اَللَّه يِطِ؞
3 جٛنْدٜ ندٜ نغَطّٛنْ ندٜنّٛ اِرِ ندٜ يِمْٻٜ ٻٜ اَنْدَا اَللَّه نغِطِ، ندٜ حٜپِي نٛنْ؞ ندٜنّٛ اٛنْ نغَطِ کَ حَلّٜىٰندٜ، اٜ سُونٛوجِ کَلُّطِ، اٜ يَرٜيَرٜىٰجِ ڤٛوطٛوجِ جٛنْدٜ مٜىٰرٜ، اٜ مَوْنِنْکِ غُنْکِيجِ فِي کٛو وٛوطَا؞
4 اٜ ٻٜ کَيْطِنَ نغَمْ اٛنْ کَوْتَتَا کٛعٜ اٜ مَٻّٜ جٛونِ ندٜرْ وَطُکِ کُوطٜ طُطّٜ طٜ مبٛوطَا؞ نغَمْ نٛنْ اٜ ٻٜ کُطَعٛنْ؞
5 اَمَّا ٻٜ مبِعَيْ اَللَّه کٛ ٻٜ نغَطِ، کَنْکٛ کِيتٛتٛوطٛ ٻٜ يٛنْکِ اٜ مَيْٻٜ؞
6 کَنْجُمْ وَطِ حَا مَيْٻٜ مَا نغَعَجِنَنَا حَبَرُ بٜلْطُمْ دٛوْ يٜىٰسُ اَلْمَسِيحُ؞ نغَمْ کٛو ندٜ اَللَّه تٛرِّرِيٻٜ مَيْدٜ ندٜرْ ٻَنْدُ بٛ کٛو مٛيٜ، يٛنْکِيجِ مَٻّٜ نجٛوطٛدٛتٛ اٜ اَللَّه؞
جٛغِيٻٜ دٛکّٜ اَللَّه بٛطُّمْ
7 رٜعُکِ کٛو طُمٜ ٻَدَکٜ؞ نغَمْ نٛنْ ڤَامٜىٰ، شُرٜىٰ کٛعٜ مٛوطٛنْ نغَمْ مبَاوٛنْ وَطُکِ دٛعَارٜ؞
8 کٛ ٻُرِ کٛو طُمٜ وٛنِ، نغِطِندِرٜىٰ نَاع سٜطَّ، نغَمْ يِدّٜ اٜ وَطَ طُمْ يَافٛو حَکّٜىٰجِ طُطِّ؞
9 نغَطٜىٰ کَ جَٻّٛوتِرْکِ ندٜرْ غُرٜىٰجٜ مٛوطٛنْ نَاع اٜ مٜتٜمٜتٜىٰجِ؞
10 ندٜ اَللَّه حٛکِّ کٛو مٛيٜ تٛکُّطٛ يٜىٰسُ دٛکَّلْ، کُوتِرٜىٰ دٛکَّلْ نغَلْ حَکُّندٜ مٛوطٛنْ نٛ ڤَامَنٛووٛ دٛکَّلْ اَللَّه بٛطُّمْ وَطَتَ؞
11 فُو غَعَجِنٛووٛ، سٜيْ وَعَجِنَ وٛلْدٜ اَللَّه؞ فُو بَلّٛووٛ سٜيْ وَلِّرَ سٜمْبٜ طُمْ اَللَّه حٛکِّمٛ، نغَمْ ندٜرْ کٛو طُمٜ طُمْ مَوْنِنَ اَللَّه بَرْکَ يٜىٰسُ اَلْمَسِيحُ؞ مَنْغُ اٜ لَامُ تَبِّتَ تٛ مَاکٛ حَا اَبَدَا اَبَدِنْ؞ اَامِنْ؞
تٛرَّ نغَمْ تٛکُّکِ يٜىٰسُ
12 اٛنٛنْ ٻٜ نغِطُمِ، تٛع اٛنْ کَيْطِنْ دٛوْ تٛرَّ کَلُّکَ کٜٻُکَعٛنْ؞ کَ حٜٻُعٛنْ نغَمْ طُمْ فٛوندَعٛنْ؞ تٛع اٛنْ ݧُمُ غٛطُّمْ فِي کٜسُمْ حٜٻِيعٛنْ؞
13 اَمَّا نَنٜىٰ بٜلْطُمْ تٛ اٛنْ نجَرَ تٛرَّ اِرِ کَ اَلْمَسِيحُ يَرِ، نغَمْ تٛ اٛ وَرْتِي ندٜرْ مَنْغُ مَاکٛ نَنٛنْ بٜلْطُمْ نَاع سٜطَّ؞
14 اٛنْ بَرْکِطِنَاٻٜ، تٛ اٜ طُمْ حُطَعٛنْ نغَمْ اِنْدٜ اَلْمَسِيحُ، نغَمْ رُوحُ اَللَّه غٛودُطُمْ تٜدُّنغَلْ اٜ وٛنْدِ اٜ مٛوطٛنْ؞
15 اَمَّا تٛع غٛطّٛ ندٜرْ مٛوطٛنْ يَرَ تٛرَّ نغَمْ وَطُکِ وَرْحٛورٜ، کٛو نغُيْکَ، کٛو وَطُکِ کٛ حَلِّ، کٛو وَطُکِ کٛ وَطَاکَ؞
16 اَمَّا تٛ غٛطّٛ يَرِي تٛرَّ نغَمْ اٛ تٛکُّطٛ يٜىٰسُ، تٛو، تٛع اٛ نَنَ شٜمْتُطُمْ، سٜيْ نِ اٛ يٜتَّ اَللَّه نغَمْ اٛ نٛدِّرَامَ اِنْدٜ اَلْمَسِيحُ؞
17 نغَمْ شَرٜلْ وَطِي نغٜلْ طُمْ وَطَنْتَ يِمْٻٜ کِيتَ؞ ٻٜ طُمْ فُطَّنْتَ وَطَنْکِ کِيتَ بٛو وٛنِ يِمْٻٜ اَللَّه؞ تٛ دٛوْ مٜىٰطٜنْ اٜنٜنْ يِمْٻٜ اَللَّه طُمْ فُطِّرْتَ کِيتَ، تٛو، نٛ طُمْ وَرْتَنْتَ غَݧُٻٜ تٛکَّ حَبَرُ بٜلْطُمْ طُمْ اَللَّه؟
18 اَايَارٜ وِعِي،
«تٛ اٜ طُمْ سَطِ اَادِلِعٜنْ کِسَ،
تٛو، کٛ حٜٻَتَ ٻٜ کُلَتَا اَللَّه اٜ غٛودُٻٜ حَکّٜ؟»
19 نغَمْ نٛنْ، فُو جَرٛوٻٜ تٛرَّ دٛوْ کٛ اَللَّه يِطِ، ٻٜ نغَطَ کٛ حَانِ؞ ٻٜ نغَطَ يٛنْکِيجِ مَٻّٜ ندٜرْ جُنْغٛ اَللَّه تَغُطٛ کٛو طُمٜ؞ کَنْکٛ اٛ کٜبِّنٛووٛ اَلْکَوَلْ مَاکٛ؞