3
جٛنْدٜ تٜىٰغَلْ
1 نٛنْ مَا اٛنٛنْ رٜوْٻٜ تٜىٰغَلْ، تٛکّٜىٰ کٛ وٛرْٻٜ مٛوطٛنْ مبِعِ؞ نغَمْ تٛ اٜ وٛودِ وٛٻّٜ وٛرْٻٜ ٻٜ تٛکَّايِ وٛلْدٜ اَللَّه، طُمْ غَطٛتٛوطُمْ نغِکُّ رٜوْٻٜ مَٻّٜ وَطَ ٻٜ تٛکَّ اَللَّه، نَاع سٜيْ تٛ ٻٜ مٜتَنَامَ،
2 تٛ ٻٜ نغِعِي نغِکُّ مٛوطٛنْ بٛطُّمْ ندٜنْ ٻٜ نغِعِ اٛنْ نغَطَ کٛ ٻٜ مبِعِ؞
3 تٛع مٛعِّتِنَاکِ کِ مٛعِّتِنْتٛوطٛنْ وَرْتَ کِ ٻَنْدُ تَنْ، بٛ مٛرْطِ، اٜ کٛ وَطِرَا اٜ جِينَارِ، اٜ کٛلْتٜ غٛودُطٜ شٜىٰدٜ؞
4 سٜيْ نِ مٛعِّتِنَاکِ مٛوطٛنْ وَرْتَ مٛعِّنْکِ ٻٜرْطٜ مٛوطٛنْ اٜ وَطُکِ کٛ لَلَّتَا وَاتٛ لٜسْتِنْکِ حٛورٜ، اٜ سُرُکِ حٛورٜ؞ اِرِ کِنْ طٛنْ مٛعِّتِنَاکِ کِ لَلَّتَا؛ کَنْکِ وٛنِ ٻُرْکِ وٛوطُکِ يٜىٰسٛ اَللَّه؞
5 نغَمْ ندٜنّٛ نٛنْ رٜوْٻٜ شٜنِيٻٜ غَطُٻٜ ٻٜرْطٜ مَٻّٜ دٛوْ اَللَّه مٛعِّتِنٛرِي ندٜ ٻٜ تٛکِّ وٛرْٻٜ مَٻّٜ؞
6 مِسَالُ، سَارَتُ وَطِي کٛ غٛرْکٛ مُوطُمْ اِبْرَاهِمْ وِعِ، اٜ مٛ نٛدِّرَمٛ جٛومُ مَاکٛ؞ جٛونِ، اٛنٛنْ نغٛنِ ٻِٻّٜ سَارَتُ تٛ اٛنْ نغَطِي کٛ وٛوطِ، اٛنْ نجَٻَايِ غٛطُّمْ حُلْنِعٛنْ؞
7 نٛنْ مَا، اٛنٛنْ وٛرْٻٜ، نجٛوطٛدٜىٰ اٜ رٜوْٻٜ مٛوطٛنْ نٛ حَانِ؞ کٛکّٜىٰٻٜ مَنْغُ نغَمْ کَمْٻٜ ٻٜ نغَلَا سٜمْبٜ بٛ مٛوطٛنْ، طٛنْمَا اٛنٛنْ اٜ رٜوْٻٜ مٛوطٛنْ اٛنْ فُو اٛنْ کٜٻَيْ شَاحُ جٛومِرَاوٛ، وَاتٛ يٛنْکِ کِ رٜعَتَا؞ نغَطٜىٰ نٛنْ نغَمْ تٛع غٛطُّمْ حَطَعٛنْ وَطُکِ دٛعَارٜ؞
يَرْکِ تٛرَّ نغَمْ وَطُکِ اَادِلَاکُ
8 جٛونِ اٜ مِ يِطِ يٛتِّنْکِ کٛ مبِعَيْمِ اٜ وِيکِ، اٛنْ فُو ݧُمٛ مٛوطٛنْ وَرْتَ غٛعٛ؞ نجُرْمِندِرٜىٰ، نغِطِندِرٜىٰ نٛ حَانِ تٛکُّٻٜ يٜىٰسُ نغَطَ، مبَلِّندِرٜىٰ، لٜسْتِنٜىٰ کٛعٜ مٛوطٛنْ؞
9 تٛع اٛنْ نغَاتٛ حَلّٜىٰندٜ اٜ حَلّٜىٰندٜ، کٛو حُطُکِ اٜ حُطُکِ، اَمَّا نغَاتٛرٜىٰ بَرْکِطِنْکِ، نغَمْ اَللَّه نٛدِّيعٛنْ نغَطٛنْ نٛنْ نغَمْ اٛ بَرْکِطِنَعٛنْ؞
10 اَايَارٜ وِعِي،
«فُو غِطّٛ نَنَ بٜلْطُمْ جٛنْدٜ مُوطُمْ،
نٜىٰٻَ اٜ دُونِيَارُ،
سٜيْ اٛ اَلَ مٜتٛ کَلُّنغٛ،
اٛ اَلَ فٜوْرٜ؞
11 اٛ اَلَ وَطُکِ کٛ حَلِّ، اٛ وَطَ اَادِلَاکُ؛
اٛ طَٻِّتَ جَمْ اٜ ٻٜرْندٜ غٛعٛ؞
12 نغَمْ جٛومِرَاوٛ اٜ فَامَنَ غٛودُٻٜ اَادِلَاکُ،
اٜ مٛ نَنَ دٛعَاجٜ مَٻّٜ،
اَمَّا اٜ مٛ وَݧَ کُوٛوٻٜ کٛ حَلِّ؞»
13 تٛ اٛنْ نغَطَ کٛ مبَاوٛتٛنْ وَطُکِ نغَمْ نغَطٛنْ کٛ وٛوطِ، مٛيٜ حَلَّنْتَعٛنْ؟
14 اَمَّا کٛو تٛ اٛنْ نجَرِي تٛرَّ نغَمْ وَطُکِ کٛ وٛوطِ، اَللَّه بَرْکِطِنَيْعٛنْ؞ نغَمْ نٛنْ، تٛع اٛنْ کُلُ تٛرَّيْٻٜعٛنْ، تٛع اٛنْ نغَنُّ؞
15 اَمَّا مَوْنِنٜىٰ اَلْمَسِيحُ ندٜرْ ٻٜرْطٜ مٛوطٛنْ نغَمْ کَنْکٛ وٛنِ جٛومِرَاوٛ؞ کٛو ندٜيٜ نجٛوطٜىٰ اٛنْ شِرْيِي نٛوتَاکِ کٛو مٛيٜ پَمُطٛعٛنْ دٛوْ وَطُکِ ٻٜرْندٜ کِ نغَطّٛنْ دٛوْ اَلْمَسِيحُ؞ نغَطٜىٰ نٛنْ ندٜرْ لٜسْنُکِ حٛورٜ اٜ مَوْنِنْکِ؞
16 کٛو ندٜيٜ طُمْ تَوْرَعٛنْ اٜ ٻٜرْندٜ لَمْندٜ، نغَمْ تٛ طُمْ حُطِيعٛنْ، ٻٜنْ طٛنْ کُطٛوٻٜ نغِکُّ مٛوطٛنْ بٛطُّمْ نغَمْ اٛنْ تٛکُّٻٜ يٜىٰسُ ٻٜ شٜمْتَ؞
17 نغَمْ طُمْ ٻُرِي نٜطّٛ يَرَ تٛرَّ نغَمْ وَطُکِ فِي بٛطُّمْ، تٛ طُمْ شُٻٛلْ اَللَّه، اٜ دٛوْ يَرَ تٛرَّ نغَمْ وَطُکِ کٛ حَلِّ؞
18 نغَمْ اَلْمَسِيحُ مَايِي ندٜ غٛعٛ نغَمْ اِتُّکِ حَکّٜىٰجِ مٜىٰطٜنْ؞ کَنْکٛ اٛ غٛودُطٛ اَادِلَاکُ، اَمَّا اٛ مَايِي نغَمْ ٻٜ نغَلَا اَادِلَاکُ نغَمْ اٛ يَارَعٜنْ تٛ اَللَّه؞ طُمْ وَرِيمٛ، اَمَّا رُوحُ اَللَّه حٛکِّيمٛ يٛنْکِ؞
19 ندٜرْ بَوْطٜ رُوحُ طُمْ اٛ يَحِ اٛ وَعَجِنَنِ رُوحُوجِ مَٻَّاطِ؞
20 رُوحُوجِ طِنْ طٛنْ کَنْجِ نغٛنِ طِ تٛکَّايِ اَللَّه ندٜنّٛ اٜ جَامَنُ اَنَّبِ نُحُ؞ اَللَّه حٜطَکٜ اٜ مُݧَ شَرٜلْ کٛ اَنَّبِ نُحُ وَطَتَ کٛمِوَلْ؞ يِمْٻٜ سٜطَّ تَنْ نَتِّنغَلْ کِسِ ندِيَمْ تُفَانَ، کَمْٻٜ نجٛوٜىٰتَتٛ؞
21 ندِيَمْ طَمْ بٛو طُمْ مِسَالُ بَڤْتِسْمَ؞ جٛونِ بَڤْتِسْمَ حِسْنِيعٛنْ بَرْکَ بَوْطٜ اُمَّاکِ يٜىٰسُ اَلْمَسِيحُ دَغَ مَيْدٜ؞ بَڤْتِسْمَ نَاع طُمْ اِتُّکِ تُوندِ دَغَ ٻَلِّ مٜىٰطٜنْ، طُمْ اَلْکَوَلْ نغَلْ نٜطّٛ وَطَنِ اَللَّه اٜ ٻٜرْندٜ لَمْندٜ؞
22 يٜىٰسُ يَحِ دٛوْ، اٜ مٛ جٛوطِي تٛ جُنْغٛ اَللَّه ݧَامٛ، اٜ مٛ لَامٛو مَلَاعِکَعٜنْ، اٜ غٛودُٻٜ لَامُ، اٜ غٛودُٻٜ بَوْطٜ؞