4
حٛولَارٜ اِبْرَاهِمْ
1 تٛو، طُمٜ مبِعٜتٜنْ دٛوْ اِبْرَاهِمْ، مَامَ مٜىٰطٜنْ؟
2 تٛ اَللَّه وَرْتِرِي اِبْرَاهِمْ اَادِلِيجٛ نغَمْ کٛ اٛ وَطِ، اٛ حٜٻَيْ کٛ اٛ مَنْتٛرْتٛو، اَمَّا نَاع يٜىٰسٛ اَللَّه؞
3 اَايَارٜ وِعِ، «اِبْرَاهِمْ حٛولَکٜ اَللَّه؛ نغَمْ مَاجُمْ اَللَّه وِعِ اٛ اَادِلِيجٛ؞»
4 نٜطّٛ کُوٛووٛ نغَمْ يٛٻٜىٰ، طُمْ حٛشَّتَا کٛ اٛ يٛٻَا بٛ شَاحُ، اَمَّا بٛ غٛطُّمْ طُمْ اٛ حٜٻَنِ حٛورٜ مَاکٛ؞
5 نٜطّٛ مٛ وَطَايِ ٻٜرْندٜ مُوطُمْ دٛوْ کُوطٜ مُوطُمْ، اَمَّا اٛ وَطِ ٻٜرْندٜ مَاکٛ دٛوْ اَللَّه غَطٛووٛ غَطٛوٻٜ حَکّٜ نغَرْتَ اَادِلِعٜنْ، طُمْ نٛدَّيْ حٛولَاکِ مَاکٛ اَادِلَاکُ؞
6 نٛنْ دَوْدَ وِعِ ندٜ اٛ مٜتِ دٛوْ نٜطّٛ بَرْکِطِنَاطٛ مٛ اَللَّه نٛدِّ اَادِلِيجٛ نَاع نغَمْ کُوطٜ مَاکٛ؞ اٛ وِعِي،
7 «ٻٜ بَرْکِطِنَاٻٜ يِمْٻٜ ٻٜ طُمْ يَافَنِي کٛ وٛوطَا طُمْ ٻٜ نغَطِ،
ٻٜ حَکّٜ مُعّٜنْ نجَافَا؞
8 اٛ بَرْکِطِنَاطٛ مٛ جٛومِرَاوٛ لِمَتَا حَکّٜ مَاکٛ؞»
9 تٛو، بَرْکَ طُعُمْ، يَحُودَنْکٛعٜنْ تَنْ کٜٻَتَطُمْ، کٛو حَا اٜ يِمْٻٜ نَاع يَحُودَنْکٛعٜنْ؟ اٜنْ مبِعِي، «اِبْرَاهِمْ حٛولَکٜ اَللَّه؛ نغَمْ مَاجُمْ اَللَّه وِعِ اٛ اَادِلِيجٛ؞»
10 ندٜيٜ فِي طُعُمْ وَطِ؟ کٛ اِبْرَاهِمْ نَادٜىٰ، کٛو غَطَ اٛ نَادَامَ؟ کٛ اٛ نَادٜىٰ طُمْ وَطِ، نَاع غَطَ اٛ نَادَامَ؞
11 نَادُکِ کِ اٛ وَطَنَا وٛنِ اَلَامَ کٛلُّطُمْ اَللَّه جَٻِي اٛ اَادِلِيجٛ نغَمْ اٛ حٛولَکٜمٛ کٛ اٛ نَادٜىٰ؞ نغَمْ مَاجُمْ، اِبْرَاهِمْ وٛنِ ݧَاکٛ کٛو مٛيٜ کٛولِيطٛ اَللَّه مٛ اَللَّه وَرْتِرِ اَادِلِيجٛ، کٛو اٛ نَادَاکَ؞
12 نٛنْ مَا کَنْکٛ وٛنِ ݧَاکٛ ٻٜنْ طٛنْ نَادَاٻٜ، نَاع نغَمْ ٻٜ نَادَاٻٜ، اَمَّا نغَمْ ٻٜ کٛولَکٜ اَللَّه اِرِ حٛولَاکِ کِ اٛ وٛودِ کٛ اٛ نَادٜىٰ؞
اَلْکَوَلْ اَللَّه دٛوْ کٛولِيٻٜمٛ
13 اَللَّه وَطَنِي اِبْرَاهِمْ اٜ ٻِٻّٜ ٻِٻّٜىٰجِ مَاکٛ اَلْکَوَلْ وِيکِ کَمْٻٜ ندٛنَتَ دُونِيَارُ؞ اَللَّه وَطِي اَلْکَوَلْ نغَعَلْ نَاع نغَمْ اِبْرَاهِمْ اٜ تٛکَّ کٛ اَتَّوْرَ وِعِ، اَمَّا نغَمْ اَادِلَاکُ کٜٻٜتٜىٰطُمْ بَرْکَ حٛولَاکِ اَللَّه؞
14 تٛ تٛکّٛوٻٜ اَتَّوْرَ نغٛنِ دٛنٛوٻٜ دُونِيَارُ، حٛولَارٜ نٜطّٛ وَرْتِي مٜىٰرٜ، ندٜنْ اَلْکَوَلْ اَللَّه وَرْتِي کٛو کٛ نَفِ؞
15 اَتَّوْرَ اٜ وَدَّ مٛنّٜرٜ اَللَّه، اَمَّا فُو تٛ دٛوکَ وَلَا، نَاع نٛ طُمْ وَطَتَ طُمْ يٜوَ دٛوکَ؞
16 نغَمْ نٛنْ، يِمْٻٜ کٛولِيٻٜ اَللَّه نغٛنِ کٜٻٛوٻٜ کٛ اٛ وَطِ اَلْکَوَلْ، نغَمْ طُمْ حٜٻَ کٛ اٛ وَطِ اَلْکَوَلْ شَاحُ، ندٜنْ فُو ٻِٻّٜ ٻِٻّٜىٰجِ اِبْرَاهِمْ تَبِّتِنَ حٜٻُکِطُمْ، نَاع تٛکّٛوٻٜ اَتَّوْرَ تَنْ، اَمَّا حَا اٜ کٛولِيٻٜ اَللَّه نٛنْ نٛ اِبْرَاهِمْ حٛولٛرِيمٛ؞ نغَمْ اِبْرَاهِمْ وٛنِ ݧَاکٛ مٜىٰطٜنْ اٜنْ فُو؞
17 نٛنْ نٛ طُمْ وِنْدِرَا، «مِ وَرْتِرِيمَ ݧَاکٛ لٜݧِ طُطِّ؞» کَنْکٛ وٛنِ ݧَاکٛ مٜىٰطٜنْ يٜىٰسٛ اَللَّه مٛ اٛ حٛولِي، اَللَّه کٛکّٛووٛ مَيْٻٜ يٛنْکِ، نٛدّٛووٛ کٛ وَلَا سٜيْ طُمْ وَنْغَ؞
18 اِبْرَاهِمْ حٛولَکٜ اَللَّه، اٛ وَطِي کَمُّندٜ کٛو ندٜ وَلَا دَلِيلَ وَطُکِ کَمُّندٜ مَاکٛ؞ نغَمْ مَاجُمْ، اٛ وَرْتِي «ݧَاکٛ لٜݧِ طُطِّ،» نٛنْ نٛ اٛ وِعَا، «تَانِرَاٻٜ مَاطَ طُوطِرَيْ بٛ کٛودٜ دٛوْ؞»
19 اٛ اَلَايِ حٛولَاکِ اَللَّه، کٛو ندٜ اٛ يِعِ ٻَنْدُ مَاکٛ سٛمِي نغَمْ اٛ ٻَدَکٜ دُوٻِ 100، ندٜنْ دٜبّٛ مَاکٛ سَارَتُ دَݧَتَا؞
20 اٛ وَطَايِ سٜکٛ دٛوْ کٛ اَللَّه وَطَنِمٛ اَلْکَوَلْ، اَمَّا اٛ ٻٜيْدِي حٛولَاکِ اَللَّه، اٛ مَنْتِيمٛ؞
21 اٛ تَبِّتِنِي اَللَّه وَاوَيْ وَطَ کٛ وَطِ اَلْکَوَلْ؞
22 نغَمْ اِبْرَاهِمْ حٛولَکٜ اَللَّه، «اَللَّه وِعِ اٛ اَادِلِيجٛ؞»
23 بٛلِيطٜ بِيطٜ «اَللَّه وِعِ اٛ اَادِلِيجٛ،» نَاع نغَمْ مَاکٛ تَنْ طٜ مبِنْدَا؞
24 طٜ مبِنْدَامَ نغَمْ مٜىٰطٜنْ اٜنٜنْ مَا ٻٜ اَللَّه وَرْتِرْتَ اَادِلِعٜنْ، اٜنٜنْ کٛولِيٻٜ اُمِّنْطٛ يٜىٰسُ جٛومِرَاوٛ مٜىٰطٜنْ دَغَ مَيْدٜ؞
25 اٛ وَرَامَ نغَمْ حَکّٜ مٜىٰطٜنْ، ندٜنْ اٛ اُمِّنَامَ دَغَ مَيْدٜ نغَمْ نغَرْتٜنْ اَادِلِعٜنْ يٜىٰسٛ اَللَّه؞