5
سِرْيٛوتِرْکِ اٜ اَللَّه
1 نغَمْ نٛنْ، ندٜ اَللَّه وَرْتِرِعٜنْ اَادِلِعٜنْ نغَمْ اٜنْ کٛولَکٜ يٜىٰسُ اَلْمَسِيحُ، اٜنْ شِرْيٛوتِرِي اٜ اَللَّه بَرْکَ جٛومِرَاوٛ مٜىٰطٜنْ يٜىٰسُ اَلْمَسِيحُ؞
2 بَرْکَ مَاکٛ کٜٻُطٜنْ لَاوٛلْ حٜٻُکِ طُعُمْ شَاحُ اَللَّه طُمْ غٛنْطٜنْ ندٜرْ جٛونِ؞ طٛنْمَا اٜنْ مبٜلْمبٜلْتَ نغَمْ اٜنْ تَبِّتِنِي اَللَّه حٛلَّيْعٜنْ تٜدُّنغَلْ مُوطُمْ؞
3 نَاع نٛنْ تَنْ، حَا مَا اٜنْ مبٜلْمبٜلْتَ ندٜرْ تٛرَّاجِ طِ نجَرٜتٜنْ، نغَمْ اٜنْ اَنْدِ يَرُکِ تٛرَّاجِ اٜ وَدَّ مُݧَلْ؞
4 تٛ اٜنْ مُݧِي ندٜرْ تٛرَّ، اٜنْ کٜٻَيْ نغِکُّ طُمْ اَللَّه يِطِ، تٛ اٛ يِطِي نغِکُّ مٜىٰطٜنْ، نٛنْ وَطَيْ نغَطٜنْ کَمُّندٜ؞
5 کَمُّندٜ ندٜنْ سٜمْتِنْتَاعٜنْ، نغَمْ اَللَّه حٛلِّعٜنْ اٜ مٛ يِطِعٜنْ ندٜرْ ٻٜرْطٜ مٜىٰطٜنْ بَرْکَ رُوحُ مَاکٛ، طُمْ اٛ حٛکِّعٜنْ؞
6 ندٜرْ شَرٜلْ نغٜلْ تَمْڤُطٜنْ، اَلْمَسِيحُ مَايِي نغَمْ غَطٛوٻٜ حَکّٜ ندٜرْ شَرٜلْ نغٜلْ اَللَّه سُٻِ؞
7 اٜ طُمْ سَطِ غٛطّٛ مَايَ نغَمْ اَادِلِيجٛ؞ سٜيْ نِ طُمْ غَطٛتٛوطُمْ غٛطّٛ وَطَ سٜمْبٜ ٻٜرْندٜ مَايَ نغَمْ نٜطّٛ مٛ نغِکُّ بٛطُّمْ؞
8 اَمَّا لَاوٛلْ نغٛلْ اَللَّه حٛلِّيعٜنْ يِدّٜ مَاکٛ وٛنِ، شَرٜلْ کٛ نغٛنْطٜنْ ندٜرْ حَکّٜ، اَلْمَسِيحُ مَايِي نغَمْ مٜىٰطٜنْ؞
9 ندٜ جٛونِ اٜنْ نغَرْتِي اَادِلِعٜنْ بَرْکَ پِيپَمْ اَلْمَسِيحُ، فِي ٻُرْطُمْ تَبُّتُکِ وٛنِ اٛ حِسْنَيْعٜنْ دَغَ مٛنّٜرٜ اَللَّه غَرَيْندٜ؞
10 ندٜنّٛ اٜنْ وَݧْوَݧْٻٜ اَللَّه، اَمَّا طُمْ سِرْيٛوتِرِيعٜنْ اٜ مَاکٛ بَرْکَ مَيْدٜ ٻِطّٛ مَاکٛ؞ جٛونِ ندٜ اٜنْ شِرْيٛوتِرِي اٜ اَللَّه، اٜنْ ٻُرَيْ تَبِّتِنْکِ اَلْمَسِيحُ حِسْنَيْعٜنْ نغَمْ اٜ مٛ فٛوفَ؞
11 اَمَّا نَاع کَنْجُمْ تَنْ، حَا مَا اٜنْ نَنَ بٜلْطُمْ نغَمْ کٛ اَللَّه وَطِ بَرْکَ جٛومِرَاوٛ مٜىٰطٜنْ يٜىٰسُ اَلْمَسِيحُ، شِرْيٛوتِرْطٛعٜنْ اٜ اَللَّه جٛونِ؞
اَادَمُ اٜ اَلْمَسِيحُ
12 حَکّٜ نَتِّي ندٜرْ دُونِيَارُ ندُعُ لَاوٛلْ نٜطّٛ غٛعٛتٛ؞ حَکّٜ طُمْ اٛ وَطِ نغَدِّي مَيْدٜ؞ نٛنْ کٛو مٛيٜ وَرْتِي مَايَيْطٛ، نغَمْ کٛو مٛيٜ وَطِي حَکّٜ؞
13 غٛونغَ، کٛ اَتَّوْرَ وَدّٜىٰ، حَکّٜ اٜ طٛنْ ندٜرْ دُونِيَارُ، اَمَّا اَللَّه جٛغَتَاکٛ حَکّٜ نٜطّٛ ندٜرْ ٻٜرْندٜ مُوطُمْ تٛ دٛوکَ وَلَا؞
14 فُو اٜ نٛنْ، دَغَ جَامَنُ اَادَمُ يَاکِ جَامَنُ مُوسَ، مَيْدٜ لَامَکٜ دٛوْ کٛو مٛيٜ، حَا اٜ دٛوْ يِمْٻٜ ٻٜ نغَطَايِ حَکّٜ اِرِ طُمْ اَادَمُ وَطِ؞
اَادَمُ وٛنِ مِسَالُ اٛنْ طٛنْ غَرَيْطٛ؞
15 اَمَّا شَاحُ طُمْ اَللَّه حٛکَّتَ طُمْ نَنْدَا اٜ حَکّٜ اَادَمُ؞ يِمْٻٜ طُطْٻٜ مَايِي نغَمْ حَکّٜ نٜطّٛ غٛعٛتٛ، اَمَّا يِدّٜ اَللَّه ٻُرِي مَوْنُکِ نَاع سٜطَّ، نٛنْ مَا شَاحُ طُمْ اٛ حٛکَّتَ يِمْٻٜ طُطْٻٜ بَرْکَ نٜطّٛ غٛعٛتٛ، وَاتٛ يٜىٰسُ اَلْمَسِيحُ؞
16 شَاحُ اَللَّه اٜ فٜىٰرٛوتِرِ اٜ کٛ حَکّٜ طُمْ نٜطّٛ غٛعٛتٛ فٛوطِ؞ نغَمْ کِيتَ اَللَّه تٛکُّطُمْ غَطَ حَکّٜ طُمْ اَادَمُ وَطِ وٛنِ کِيتَ حَلْکٜرٜ، اَمَّا شَاحُ طُمْ اَللَّه حٛکِّ، کَنْجُمْ طُمْ وَرْتِرِعٜنْ اَادِلِعٜنْ کٛو ندٜ اٜنْ نغَطِي حَکّٜ نَاع سٜطَّ؞
17 نغَمْ حَکّٜ طُمْ نٜطّٛ غٛعٛتٛ وَطِ، مَيْدٜ فُطِّ لَامَاکِ دٛوْ کٛو مٛيٜ؞ اَمَّا لَامُ طُمْ، طُمْ حٜوْتَايِ کٛو طُمٜ تٛ طُمْ حَوْتَامَ اٜ لَامُ طُمْ نٜطّٛ غٛعٛتٛ وَدِّ، وَاتٛ يٜىٰسُ اَلْمَسِيحُ؞ کٛو مٛيٜ مٛ اَللَّه حٛلِّ يِدّٜ مَوْندٜ وَرْتِرِيمٛ اَادِلِيجٛ شَاحُ، اٛ حٜٻَيْ جَالٛرْغَلْ دٛوْ حَکّٜ بَرْکَ اَلْمَسِيحُ؞
18 نغَمْ نٛنْ، نٛنْ نٛ حَکّٜ نٜطّٛ غٛعٛتٛ فٛوطِرَنِ فُو يِمْٻٜ کِيتَ حَلْکٜرٜ، نٛنْ مَا کُوغَلْ اَادِلَاکُ نغَلْ نٜطّٛ غٛعٛتٛ وَطِ وَرْتِرِي يِمْٻٜ طُطْٻٜ اَادِلِعٜنْ حٛکِّيٻٜ يٛنْکِ کٜسِ؞
19 نٛنْ نٛ يِمْٻٜ طُطْٻٜ نغَرْتِ غَطٛوٻٜ حَکّٜ نغَمْ نٜطّٛ غٛعٛتٛ وَݧِي کٛ اَللَّه وِعِ، نٛنْ مَا يِمْٻٜ طُطْٻٜ نغَرْتَيْ اَادِلِعٜنْ نغَمْ نٜطّٛ غٛعٛتٛ وَطِي کٛ اَللَّه يِطِ؞
20 اَتَّوْرَ وَدَّامَ نغَمْ کٛ وٛوطَا طُمْ يِمْٻٜ نغَطَتَ وُرْتٛو اٜ نجَيْرِ؞ اَمَّا فُو تٛ حَکّٜ ٻٜيْدِي، سٜيْ يِدّٜ اَللَّه ٻُرَ ٻٜيْدَاکِ؞
21 حَکّٜ لَامَکٜ يِمْٻٜ نغَمْ طُمْ ڤٛوطَنِيٻٜ مَيْدٜ؞ اَمَّا جٛونِ يِدّٜ اَللَّه اٜ لَامٛو لَاوٛلْ اَادِلَاکُ، ندٜنْ اَللَّه جَٻِيعٜنْ بَرْکَ يٜىٰسُ اَلْمَسِيحُ جٛومِرَاوٛ مٜىٰطٜنْ؞ نٛنْ وَطَيْ کٜٻٜنْ يٛنْکِ کِ رٜعَتَا؞