139
ዳዊቲ ዛማሬታ ካቦስ ዬጺዳ ማዛሙሬ
1 ኣቤት ጎዳዉ!
ኔኒ ታና ፒልጋ ኤራዳሳ።
2 ታኒ ኣዉዴ ኡቲዛኮኔ
ኣዉዴ ኤቂዛኮ ኔኒ ኤራሳ፤
ኔኒ ታ ቆፋ ኡባ
ሃኮፔ ኣኬካሳ።
3 ታኒ ቢዛሶኔ
ሼምፒዛሶ ጾሞሳሳ፤
ታ ኦጌታ ኡባ ኔኒ ኤራሳ።
4 ኣቤት ጎዳዉ!
ታኒ ታ ዶናፔ ኢሲ ቃላካ
ሃሳያናፔ ካሴታዳ
ኔኒ ታ ቆፋ ኡባ ኤራሳ።
5 ኔኒ ታ ዩሾ ኡባን ዳሳ፤
ኔ ኩሼዛን ታና ናጋሳ።
6 ኔ ኤራቴꬃይ
ታና ኬሂፔ ማላሊሴስ፤
ታኒ ኣኬካናስ
ዳንዳይዛይሳፌካ ꬎቄስ።
7 ታኒ ኔ ኣያናፔ
ኣዋ ባናስ ዳንዳያዚና?
ዎይኮ ኔ ሲንꬃፌ
ኣዋ ባቃታናስ ዳንዳያዚና?
8 ፑዴ ሳሎ ኬኢኮ
ኔኒ ሄን ዳሳ!
ዱጌ ሲኦሌ ዎꬊኮካ
ኔኒ ሄን ዳሳ።
9 ኣርሼይ ሞኪዛሶ ባጋ
ፓላ ቢኮ፥
ዎይኮ ኣርሼይ ዉሊዛሶ ባጋ
ሃካ ቢኮ፥
10 ታና ሄን ኔ ኩሼይ ካሌꬄስ፤
ኔ ኡሻቻ ኩሼይካ
ታና ሚንꬂ ኦይኬስ።
11 ታኒ፥ «ꬉማዞ!
ታና ጌንꬃ፤
ፖኦዞ! ታ ዩሾን
ꬉማ» ጊኮ፥
12 ꬉማይ ኔና ጼሎ ዲጌና፤
ኦማርሲ ኔስ
ጋላሳ ማላ ፖኤስ፤
ꬉማይኔ ፖኦይ ኔስ ኢሲ ማላ።
13 ኔኒ ታ ኣሳቴꬃ
ኡባ ሜꬋዳሳ፤
ታ ኣዬይ ኡሎንካ
ታና ቲላ ሜꬋዳሳ።
14 ኔኒ ታና ኬሂ ዬጋልꬂኔ
ማላሊሲዛዝ ሂስታ
ሜꬊዳ ጊሻስ
ታ ኔና ጋላታይስ፤
ኔ ኦሶቲ ማላሊሲዛይታ!
ታ ሼምፖያ
ሄሳ ኡባ ኤራዉስ።
15 ታኒ ጌማሶን ሜꬌቲዳ ዎዴ
ታ ሜቄꬃቲ
ኔፔ ጌሚቤቴና፤
ታኒ ታ ኣዬይ ኡሎን ጪማ ጊዶን
ሂላን ኦሴቲዛ ዎዴ፥
16 ታ ኣዪ ኡሎን ቡሮ ሱꬅ ጊዳ
ታ ዲሺን ኔ ኣይፌቲ ቤኢዳ፤
ታ ላይꬃታፔ ኢሶይኔ
ዶሜቶንታ ዲሺን
ታስ ኔኒ ባሪዳ ጋላሳቲ ኡባይ
ኔ ማዝጋባን ጻፌቲዳ።
17 ኣቤት ጾሳዉ!
ኔ ታስ ቆፒዛ ቆፋይ
ኣይ ማላ ሎኦ!
ኢዚካ ኣይ ኬና ጮራ!
18 ታኒ ኢዛ ቆዲኮ ኣጬፔካ ዳሮ፤
ታ ኢቻ ቤጊዛ ዎዴ
ሃኢካ ኔናራ ዴኣይስ።
19 ኣቤት ጾሳዉ!
ኔኒ ኢታታ ሲፊዳኮ ኣዜ ዲዛይ!
ሱꬅ ጉሳና ሳሜቲዛ ኣሳቲ
ታፔ ሃኪቴ!
20 ኢስቲ ኔ ቦላ
ኢታ ሚሽ ሃሳዬቴስ፤
ኔ ሞርኬቲ
ኔ ሱንꬃ ሞሬቴስ።
21 ኣቤት ጎዳዉ!
ኔና ኢጺዛይታ
ታኒ ኢጺኪና?
ኔ ቦላ ዴንዲዛይታ
ታኒ ሃራሴቲኪና?
22 ታ ኢስታ ሙሌራ ኢጻይስ፤
ኢስታ ታኒ
ታ ሞርኬታ ማላ ቆዳይስ።
23 ኣቤት ጾሳዉ!
ታ ዎዚና ፒልጋዳ ኤራ፤
ታና ፓጫዳ ታ ጬጬ ቆፋካ
ሻካ ኤራ።
24 ኣኔ ታናን ኢታይ ዴኢኮ ጼላ፤
ሂስታዳ ሜርና ኦጌራ
ታና ካሌꬃ።