143
ዳዊቴ ማዛሙሬ
1 ኣቤት ጎዳዉ!
ታ ዎሳ ሲያ፤
ታ ሾቢዛይሳ ኤዝጋ፤
ኔኒ ጺሎኔ
ኣማኔቲዛይሳ
ጊዲዳ ጊሻስ
ታስ ዛሮ ኢማ።
2 ኔ ሲንꬃን ጺሎ ጊዳና ኣሲ
ኦኒካ ዴና፤
ታና ኔ ኣይሌዛ
ፒርዳስ ሺሾፋ።
3 ታ ሃይቃና ጋካናስ
ታ ሞርኬቲ ታና ዬዴꬂዳ፤
ታና ዲርጺዲ
ቢታ ጋርስ ጌልꬂዳ፤
ካሴ ሃይቂዳ ኣሳታ ማላካ
ታና ꬉማን ዎꬂዳ።
4 ሄሳ ጊሻስ ታኒ ዳቡራዲስ፤
ታ ዎዚናይካ ሂዶታ ቃንጺዴስ።
5 ታኒ ቤኒ ዎዴታ ሃሳኣይስ፤
ኔኒ ኦꬂዳ ኦሶ ኡባ
ዩሻ ቆፓይስ፤
ኔ ኩሼ ኦሶታካ ኣኬካይስ።
6 ታኒ ታ ኩሼዛ ኔኮ ሚጫይስ፤
ሜላ ቢታይ ሃꬅ ኮይዛ ማላ
ታ ሼምፖያ ኔና ሳሜታዱስ።
7 ኣቤት ጎዳዉ!
ታኒ ዳቡራዲስ፤
ኔ ታስ ዛሮ ኢማናስ ኤሌላ!
ታኒ ሃይቂዳ ኣሳታꬆ
ዱጌ ዱፎን ጌሎንታ ማላ
ኔ ሲንꬃ ታፔ ጌንꬆፋ።
8 ታኒ ኔና ኣማኔቲዛ ጊሻስ
ማላዶ ማላዶ ኔ ሲቆ
ታና ቤሳ፤
ታኒ ታ ሼምፖ ኔስ ሃዳራዲስ፤
ሄሳ ጊሻስ ታ ባና ኦጌ
ታና ታማርሳ።
9 ኣቤት ጎዳዉ!
ታ ኔ ጋርሳን ቆቴታዲስ፤
ታና ታ ሞርኬታፔ ኣሻ።
10 ኔኒ ታ ጾሳ፤
ታኒ ኔ ሼኔ ፖላና ማላ
ታና ታማርሳ፤
ኔ ሎኦ ኣያናይ
ታና ሱሬ ኦጌ ካሌꬆ።
11 ኣቤት ጎዳዉ!
ኔ ሱንꬃ ጊሻስ
ታና ኣሻ፤
ኔ ጺሎቴꬃን
ታና ሜቶፔ ኬሳ።
12 ኔ ታና ሲቂዛ ጊሻስ
ታ ሞርኬታ ሱፑ ሂስታ ዎꬋ፤
ታና ኔ ኣይሌዛ ኡንኤꬂዛይታ
ዲፒ ሂስታ ꬋይሳ።