144
ዳዊቴ ማዛሙሬ
1 ታ ኩሼታ ኦላስ፥
ታ ቢራꬌታካ
ጾንጌꬃስ
ሎሂሲዳ ጎዳይ
ታ ዛላይ ጋላቴቶ!
2 ኢዚ ታና ሲቂዛኔ
ጌንꬂዛ ጾሳ፤
ኢዚ ታስ ሚጻኔ
ታና ኣሺዛይሳ፤
ኢዚ ታ ጎንዳሌኔ
ታኒ ባቃታዳ ኣቲዛሶ፤
ካዎቴꬃታካ
ኢዚ ታስ ሃሪሲዛይሳ።
3 ኣቤት ጎዳዉ!
ኔ ሃይሳ ሲሬ ቦንቻናስ
ኣሲ ኣዜ?
ኔ ሃይሳꬆ ኣሳስ ቆፓናዉ
ኣሳ ናይ ኣዜ?
4 ኣሲ ኢሲቶ ጫርኪ ኣꬊዛ
ጫርኮ ማላ፤
ኢዛ ላይꬃቲካ
ኤሶን ꬋይዛ ኩዋ ማላ።
5 ኣቤት ጎዳዉ!
ኔኒ ሳላ ዳካዳ
ዱጌ ዎꬋ!
ዙማታ ቦቻዳ ጩዋሳ!
6 ዎልቃንꬅ ዬዳዳ
ኔ ሞርኬታ ላላ!
ኔ ዎንዳፌ ዪሻን
ዱካዳ ዬዴꬃ!
7 ቦላፌ ኔ ኩሼ ዬዳዳ፥
ታና ዎልቃማ ሃꬃፌ
ጎቻ ኬሳ፤
ኣላጋ ኣሳታ ኩሼፔ
ኔ ታና ኣሻ።
8 ኢስታ ዶናይ ዎርዶ ሃሳዬስ፤
ኢስቲ ኡሻቻ ኩሼ ዴንꬂዲ
ዎርዶ ጫቄቴስ።
9 ኣቤት ጾሳዉ!
ታኒ ኔስ ኦራꬃ
ማዛሙሬ ዬጻና፤
ታሙ ሻያን ዋጼቲዳ ዲꬃን
ኔስ ዬጻና።
10 ካዎታስ ጾኖ ኢማሳ፤
ኔ ኣይሌ ዳዊቴ ጊꬃ
ማሻፌ ኣሻሳ።
11 ዎርዶ ሃሳይዛይታፔኔ
ባ ኡሻቻ ኩሼ ዴንꬂዲ
ዎርዶ ጫቂዛይታፔኔ
ኣላጋታፔ ታና ኣሻኔ ናጋ።
12 ኑ ኣቱማ ናይቲ
ባ ናቴቴꬃን ዳልቂዳልቂዲ
ዲጪዛ ሚꬃ ማላ ጊዴቶ!
ኑ ማጫ ናይቲካ
ካዎ ኬꬃ ጉላን
ኣሌቆስ ኤሲዳ
ቱቄ ማላ ጊዴቶ።
13 ኑ ጎታራታን ዱማ ዱማ
ቆሞ ካꬂ ኩሞ፤
ኑ ዶርሳቲ ሺ ላቃ
ጋካናስ ዬሌቶ፤
ሄሜቲዛሶን ታሙ ሺ
ጋካናዉ ዳሬቶ።
14 ኑ ሚዛቲ ዬሊዛይታ ጊዴቶ፤
ኢስቲ ኣዉጫዮንታ
ዬሌቲዲ ጮራቴቶ።
ኑና ኣሲ ዲኦፖ፤
ኑ ዛጎን ዋሶይ ሲዬቶፎ።
15 ሃ ኣንጆይ ኢዛ ጋኪዛ ዴሬይ
ኣንጄቲዳ ዴሬ፤
ጾሲ ኢዛስ ጎዳ ጊዲዳ ዴሬይ
ኣንጄቲዳ ዴሬ።