147
1 ጎዳይ ጋላቴቶ!
ኑ ጾሳ ዬꬃን ሳቦይ
ኣይ ማላ ሎኦ!
ኢዛ ጋላቲዛይሲ ኡፋይሴስ፤
ሄሲካ ኢዛስ ቤሴስ።
2 ጎዳይ ዬሩሳላሜ ኦራጺሳና፤
ኢስራኤሌፔ ቤቲዳይታካ
ሺሻና።
3 ዎዚናይ ሜቂዳይታ ኢዚ ኮሌስ፤
ኢስታ ማዱንꬃካ
ኢዚ ፓꬄስ።
4 ኢዚ ሳሎ ጾሊንቴታ ቆዳ ኤሬስ፤
ኢሳ ኢሳ ኢዛ ሱንꬃን
ሱንꬃን ጼይጌስ።
5 ኑ ጎዳይ ጊታ፤
ኢዚ ኬሂፔ ዎልቃማ፤
ኢዛ ኤራቴꬃስ ዛዋይ ዴና።
6 ጎዳይ ካꬌቲዳይታ ቦንቼስ፤
ጊዶ ኣቲን ኢታታ ካዉሼስ።
7 ጎዳስ ጋላታ ማዛሙሬ ዬጺቴ፤
ኑ ጾሳስ ማሲንቆ
ሾጪሼ ጋላቲቴ።
8 ኢዚ ሳሎ ሻራ ማይዜስ፤
ሳኣስ ኢራ ቡኪሴስ፤
ዙማታ ቦላካ ማታ ሞኪሴስ።
9 ሜዶሳሲኔ ቁሮ ዬሎታስ
ሚዛ ሚሽ ኢዚ ኢሜስ።
10 ኢዚ ኡፋዬቲዛይ
ፓራታ ዎልቃኒኔ
ቶራንቻታ
ሚኖቴꬃን ጊዴና።
11 ጎዳይ ባስ ያዪዛይታኒኔ
ኢዛ ሲቆን
ኣማኔቲዛይታን ኡፋዬቴስ።
12 ዬሩሳላሜ ካታማዬ!
ጎዳ ጋላታ!
ሃኔ ጺዮኔ! ኔ ጾሳ ሳባ!
13 ኢዚ ኔ ፔንጌ ኮላታ ሚንꬄስ፤
ኔ ጊዶን ዲዛ ኔ ናይታ ኣንጄስ።
14 ኢዚ ኔ ዛዋ ሳሮቴꬃን ናጌስ፤
ኔና ኬሂፔ ሎኢዛ
ጊስቴ ካልሴስ።
15 ኢዚ ባ ኪታ ሳኣስ ኪቴስ፤
ኢዛ ቃላይካ ኤሶን ጋኬስ።
16 ኢዚ ሻች ኣፋላ ማላ ሚጬስ፤
ኬንቾካ ቢዲንꬃ ማላ
ላሌስ።
17 ኢዚ ሻች ሹቻ ማላ
ዱጌ ዬዳና፤
ሄ ሞጬዛን ኤቃናስ
ኦኒኔ ዳንዳዬና።
18 ኢዚ ባ ቃላ ኪቲዲ
ሻቻ ማዪሴስ።
ኢዚ ጫርኮ ጫርኪሲን
ሃꬂ ጎጌስ።
19 ኢዚ ባ ቃላ ያቆቤ ዜሬꬃስ
ባ ማራኔ ዎጋ
ኢስራኤሌ ኣሳስ ቆንጪሴስ።
20 ኢዚ ሄሳ ማላ
ሃራ ካዎቴꬃታስ
ኦꬂቤና፤
ኢስቲ ኢዛ ዎጋ ኤሬቴና።
ጎዳይ ጋላቴቶ!