19
ዳዊቲ ዛማሬታ ካቦስ ዬጺዳ ማዛሙሬ
1 ሳሎቲ ጾሳ ቦንቾ ዮቴቴስ፤
ሳሎ ጉፋንꬆይ
ኢዛ ኩሼ ኦሶ ኣዋጄስ።
2 ኢሲ ጋላሳይ ሃራ ጋላሳስ
ሄሳ ዮቴስ፤
ኢሲ ቃማይካ ካሊዛ ቃማስ
ኤራቴꬅ ቆንጪሴስ።
3 ኢስታስ ሃሳያይ
ዎይኮ ቃላይ ባዋ፤
ኢስታ ጬንጉርሲካ ሲዬቴና።
4 ጊዶ ኣቲን ኢስታ ሃሳያ ጬንጉርሲ
ሳኣ ኡባን ላሌታና፤
ኢስታ ቃላይካ ቢታ ጋጻ ጋካና።
ጾሲ ኣርሼስ
ሳሎን ሶሆ ጊግሲዴስ።
5 ኣርሼይ ሚሺራይ ባ ኬꬃፌ
ኬዚዛ ማላ ፖኢ ኬኤስ፤
ጋዴ ዎጺዛ ፒላታ
ኣሳ ማላ ኡፋዬቴስ።
6 ኣርሼይ ኬሳሶፔ
ዉሎሶ ጋካናስ ቤስ፤
ኢዛ ሴላፔ ጌሚ
ኣታና ሚሺ ዴና።
7 ጎዳ ዎጋይ ሱሬ፤
ሼምፖ ዛሪ ጪልኢሴስ፤
ጎዳ ኣዛዞይ ኣማኔቲዛይሳ፤
ኣኬካይ ፓጪዳይታስ
ኣꬎ ኤራቴꬅ ኢሜስ።
8 ጎዳ ዎጋይ ሊኬ፤
ዎዚና ኡፋይሴስ።
ጎዳ ኣዛዞይ ጌሻ፤
ኣይፌ ፖኢሴስ።
9 ጎዳስ ያሺ ጌሻቴꬃ፤
ኢዚ ሜርናስ ኤቂዲ ዴኣና።
ጎዳ ፒርዳይ
ሙሌራ ቱማኔ ጺሎ።
10 ዎርቃፌኔ ሙሩታ ዎርቃፌ
ኣꬊ ዶሴቴስ፤
ኤሳፌኔ ኤሳ ኢሊሎፔ
ኣꬊ ማልኤስ።
11 ቃሴ ታና ኔ ኣይሌዛ
ናጌታና ማላ ዞሬስ፤
ኔ ዎጋ ናጎይ ዳሮ ጎኤስ።
12 ባ ባላ ዴሚዛይ ኦኔ?
ኣቤት ጎዳዉ!
ጌሚዳ ናጋራፔ
ታና ጌሻ።
13 ታኒ ኔ ኣይሌይ፥
ጻላቴꬃን ናጋራ
ኦꬆንታ ማላ
ኔኒ ታና ናጋ።
ናጋራይ ታና ሃሮፖ፤
ሄ ዎዴ ታኒ ሱሬ ጊዳና፤
ጊታ ሞሮፔካ ጌያና።
14 ኣቤት ጎዳዉ!
ታ ዜምፒዛ ዎጋ ዛላዉ!
ታና ዎዚዳ ታ ጎዳዉ!
ታ ዶናፔ ኬኢዛ ቃላይኔ
ታ ዎዚና ቆፋይ
ኔና ኡፋይሲዛይሳ ጊዶ።