21
ዳዊቲ ዛማሬታ ካቦስ ዬጺዳ ማዛሙሬ
1 ኣቤት ጎዳዉ!
ካዎይ ኔ ኢሚዳ
ዎልቃ ጊሻስ ኡፋዬቴስ፤
ኔኒ ኢሚዳ ጾኖን
ኢዚ ኬሂ ሆምቦጬስ።
2 ኔኒ ኢዛ ዎዚና ኣሞ
ኢዛስ ኢማዳሳ፤
ቃሴ ኢዚ ኔና
ባ ዶናን ኦይቺዳይሳ
ኔኒ ዲጋቤካ።
3 ኔኒ ሎኦ ኣንጆራ ኢዛ ሞካሳ፤
ጌሻ ዎርቃ ካላቻ
ኢዛ ሁኣን ጎጺሳዳሳ።
4 ኔኒ ዴኦ ኢዛስ ኢማና ማላ
ኔና ዎሲዴስ፤
ኔካ ኢዛስ ዴኦኔ
ኣዱሳ ላይꬅ ኢማዳሳ።
5 ኔኒ ጾኖ ኢሚዳ ጊሻስ
ኢዛስ ቦንቾይ ዳሪዴስ፤
ጊታቴꬂኔ ቴማ
ኢዛስ ኢማዳሳ።
6 ኔኒ ኢዛስ ሜርና ኣንጆ ኢማዳሳ፤
ኔ ኢዛራ ዱሳን
ኢዛ ኡፋይሳዳሳ።
7 ካዎዚ ጎዳን ኣማኔቴስ።
ኡባፌ ꬎቃ
ጾሳ ኪያቴꬂ
ኢዛራ ዲዛ ጊሻስ
ኢዚ ያዬና።
8 ኔ ኩሼይ ኔ ሞርኬታ
ኡባ ዴማና፤
ኔ ኡሻቻይ
ኔና ኢጺዛይታ ኦይካና።
9 ኔኒ ቆንጪዛ ዎዴ
ጮጬን ኤጺዛ ታማ ማላ
ኔ ኢስታ ጹጋና፤
ጎዳይ ባ ሃንቆዛ ሱሌን
ኢስታ ጹጋና፤
ኢዛ ታማይካ
ኢስታ ሚ ꬋይሳና።
10 ኔኒ ኢስታ ናይታ
ቢታፌ ዲጋና፤
ኢስታ ዜሬꬃካ
ዴሬፔ ዴንꬃ ꬋይሳና።
11 ኔ ሞርኬቲ ኔ ቦላ
ጌኔን ዱላቴቴስ፤
ኢታ ሚሺካ ማቄቴቴስ፤
ጊዶ ኣቲን ኢስታስ ሃኔና።
12 ኔካ ኢስታ
ኔ ዎንዳፌዛ
ዪሻን ጎዳሳ፤
ኢስቲ ጉዬ ሲሚዲ
ባቃታና ማላ ኦꬃሳ።
13 ኣቤት ጎዳዉ!
ኔ ሚኖቴꬃይ
ꬎቁ ꬎቁ ጎ፤
ኔ ጊታ ዎልቃ ጊሻስ
ጋላታ ዬꬃ ዬጾስ።