25
ዳዊቴ ማዛሙሬ
1 ኣቤት ጎዳዉ!
ታ ኔና ዎዚናፔ ዎሳይስ።
2 ኣቤት ታ ጾሳዉ!
ታኒ ኔናን ኣማኔታይስ፤
ታና ዬላሶፓ፤
ታ ሞርኬቲካ
ታ ቦላ ጬቄቶፌቶ።
3 ኔና ሂዶታ ኦꬂዛይቲ
ዬላቴቴና፤
ጊዶ ኣቲን ጌኔ ኦꬂዛይቲ
ዬላታና።
4 ኣቤት ጎዳዉ!
ታና ኔ ኦጌ ቤሳ፤
ኔ ጌዶ ካሎ ታና ታማርሳ።
5 ኔኒ ታና ኣሺዛ ጾሳ፤
ኔ ቱማቴꬃን
ታና ካሌꬃኔ ታማርሳ፤
ኡባ ዎዴ ታ ሂዶታይ ኔና።
6 ኣቤት ጎዳዉ!
ቤኒሶፌ ዲዛ ኔ ቃꬌቴꬃኔ
ኔ ኪያቴꬃ ሃሳኣ።
7 ታ ዬላጋቴꬃ ናጋራኔ
ሞሮ ሃሳኦፓ፤
ኣቤት ጎዳዉ!
ኔ ጊታ ኪያቴꬃ ማላኔ
ኔ ሎኤቴꬃ ኬና ታና ቆፓ፤
8 ጎዳይ ኪያኔ ሱሬ፤
ሄሳ ጊሻስ ናጋራንቻታ
ባ ኦጌ ታማርሴስ።
9 ኣሽኬታ ሱሬ ኦጌራ ካሌꬄስ፤
ኢስታካ ባ ኦጌ ታማርሴስ።
10 ጎዳ ጫቆ ቃላኔ
ማራ ናጊዛይታስ
ኢዛ ኦጌይ ኡባይ ኪያኔ ቱማ።
11 ኣቤት ጎዳዉ!
ታ ናጋራይ ኬሂ ዳሮ፤
ጊዲኮካ ኔ ሱንꬃ ጊሻስ
ኣቶ ጋ።
12 ጎዳስ ያዪዛ ኣሲ ኦኔ?
ኔ ዶራዳ ባና ኦጌዛ
ኢዚ ኔና ታማርሳና።
13 ኢዚ ኡባ ዎዴካ ሎኦ ዱስ ዳና፤
ኢዛ ዜሬꬃቲ ቢታ ላታና።
14 ጎዳይ ባና ያዪዛይታፔ
ባ ጹራ ቆቴና፤
ኢዚ ኢስታስ
ባ ጌሊዳ ጫቆ
ቃላካ ኤሪሴስ።
15 ጎዳይ ታ ቶሆ
ናርጻፌ ኬሲ ኤኪዛ ጊሻስ፥
ታ ኣይፌይ ማዶ ዴማናስ
ኡባ ዎዴ ኢዛኮ ጼሌስ።
16 ጎዳዉ! ታኒ ቢዛ ዲዛዴኔ
ቆሄቲዳ ኣስ ጊዲዳ ጊሻስ፥
ኔ ሃ ታኮ ሲማ፤
ኔ ማሮቴꬃካ ቤሳ።
17 ታስ ሜቶይ ዳሪዴስ፤
ታ ሜቶዛፔ ታና ኔኒ ኬሳ።
18 ታ ሜቶዛኔ
ታ ቱጋ ኔኒ ቤኣ፤
ታ ናጋራ ኡባ ኣቶ ጋ።
19 ታ ሞርኬቲ ኣይ ኬና ዳሪዳኮ
ኔ ቤኣ፤
ኢስቲ ታና ኣይ ማላ ኢጺዛኮ
ኔ ጼላ።
20 ኔኒ ታና ናጋኔ ኣሻ፤
ታ ኔናን ዜምፓዲስ፤
ኔ ታና ዬላሶፓ።
21 ኔ ታስ ሂዶታ ጊዲዳ ጊሻስ
ሱሬቴꬃይኔ ቱማቴꬃይ
ታና ናጎ።
22 ኣቤት ጾሳዉ!
ኢስራኤሌ ኣሳ
ሜቶ ኡባፌ ኔኒ ዎዛ።