26
ዳዊቴ ማዛሙሬ
1 ኣቤት ጎዳዉ!
ታኒ ሱሬቴꬃኒኔ
ሲꬌይ ባይንዳ
ኔናን ኣማኔታ
ዴኢዳ ጊሻስ
ኔ ታስ ፒርዳ።
2 ኣቤት ጎዳዉ! ታና ፓጫ፤
ታ ቃንꬅ ፒልጋ፤
ታ ዎዚና ጼላ፤
3 ኣይስ ጊኮ ኔ ሲቆይ
ታ ሲንꬃን ዴስ፤
ታኒ ኔ ቱማቴꬃ
ኦጌን ሄሜታይስ።
4 ታኒ ባሌꬂዛ ኣሳታራ
ኢሲፌ ኡቲኬ፤
ሎኦ ሚሳቲዛ
ኢታታ ማባራን ጌሊኬ።
5 ኢታ ኦꬂዛ ኣሳታ ኢሲፌቴꬃ
ታኒ ኢጻይስ፤
ኮፋ ኣሳታራ ኢሲፌ ኡቲኬ።
6 ኣቤት ጎዳዉ!
ታናን ቆሆይ
ባይንዳይሳ ቤሳናስ
ታ ኩሼዛ ሜጫይስ፤
ሂስታዳ ያርሾ
ያርሺዛሶዛ ዩያይስ።
7 ጋላታ ማዛሙሬ ዬጻይስ፤
ኔኒ ኦꬂዳ ሚሽ
ኡባካ ዮታይስ።
8 ኣቤት ጎዳዉ!
ኔኒ ዴኢዛ ኬꬃኔ
ኔ ቦንቾይ ኣቂዛሶሆ
ታኒ ዶሳይስ።
9 ታና ናጋራንቻታራ
ኢሲፌ ፒርዶፋ፤
ኣስ ዎꬊዛይታራካ ኢሲፌ
ታ ሼምፖ ꬋይሶፋ።
10 ኢስታ ኩሼን ኢታ ሃልቾይ ዴስ፤
ቃሴ ኢስታ ኡሻቻ ኩሼይ
ማታኤን ኩሚዴስ።
11 ታኒ ጊዲኮ ቦሬይ ባይንዳ
ዱስ ዳይስ፤
ታና ዎዛ፤
ታስ ቃꬌታ።
12 ታ ቶሆይ ዴምባሶን ኤቂዴስ፤
ታኒ ዴሬይ ሺቂዳሶን ጎዳ ጋላታና።