30
ኬꬃ ኣንጂሶስ ዬጼቲዳ ዳዊቴ ማዛሙሬ
1 ኣቤት ጎዳዉ!
ኔኒ ታና ጪማፌ ኬሳዳሳ፤
ታ ሞርኬቲ ታ ቦላ
ኡፋዬቶንታ ማላ ኦꬃዳሳ፤
ሄሳስ ታ ኔና
ꬎቁ ꬎቁ ሂስታይስ።
2 ኣቤት ታ ጎዳዉ!
ኔኒ ታና ማዳና ማላ
ታ ኔኮ ዋሳዲስ፤
ኔካ ታና ፓꬃዳሳ።
3 ኣቤት ጎዳዉ!
ታና ዱፎን ቦንታ ማላ
ናጋዳሳ፤
ዱጌ ጪማ ኦላን ጌሎንታ ማላ
ኔኒ ታና ኣሻዳሳ።
4 ኢንቴኖ ጾሳ ኣሳቶ!
ጎዳስ ዬጺቴ፤
ኢዛ ጌሻ ሱንꬃካ ሳቢቴ።
5 ኢዛ ሃንቆይ ጉꬃ ዎዴሳ፥
ጊዶ ኣቲን ኢዛ ኪያቴꬂ
ዴኦ ላይꬅ ኡባሳ፤
ኦማርስ ዬኪሼ ኣቂኮካ
ማላዶ ዛዋይ
ባይንዳ ኡፋይስ ጊዴስ።
6 ታኒ ዎፓን ዲዛ ዎዴ፥
«ታኒ ሙሌካ ኮኮሪኬ» ጋዲስ።
7 ኣቤት ጎዳዉ!
ኔኒ ታስ ኪዪዳ ዎዴ፥
ታና ጊታ ዙማ ማላ
ሚንꬃ ኤሳዳሳ፤
ጊዶ ኣቲን ኔኒ ኔ ሲንꬃ
ታፔ ሃራሶ ዛሪዳ ዎዴ
ታኒ ዳጋማዲስ።
8 ኣቤት ጎዳዉ!
ታኒ ኔና ጼይጋዲስ፤
ታኒ ጎዳፔ
ማሮቴꬅ ዎሳዲስ፤
9 «ታ ሃይቂኮ ዎይኮ
ዱፎን ጌሊኮ
ኔ ታፔ ኣይ ዴማኔ?
ቢታን ጌሊዳ ኣሲ
ኔና ጋላቲ ኤሪዜ?
ኔ ኣማኔቴꬃ
ሃሳዪ ኤሪዜ?
10 ኣቤት ጎዳዉ!
ታ ዎሳ ኔ ሲያ፤
ታስ ቃꬌታ።
ኣቤት ጎዳዉ!
ኔ ታስ ማዶ ጊዳ» ጋዲስ።
11 ታ ዬሆ ዬꬃን ላማዳሳ።
ካዮ ማይኦዛ ታፔ ቃራዳ
ኡፋይሳ ማይኦ
ታና ማይዛዳሳ።
12 ሄሳ ጊሻስ ታኒ ኔና
ሳባናፔ ኣቲን ጮኡ ጊኬ።
ኣቤት ታ ጎዳዉ!
ታኒ ኔና ሜርናስ ጋላታና።