ጌሻ ማጻፋ ዬꬃ ማጻፋ 29

29

ዳዊቴ ማዛሙሬ

1 ኢንቴኖ ሳሎን ዲዛ ሜꬌታቶ!

«ቦንቾይኔ ዎልቃይ

ጎዳሳ» ጊዲ ዮቲቴ።

2 ጎዳ ቦንቾ

ሱንꬃ ጋላቲቴ፤

ኢዛ ጌሻቴꬃ ቴማስ

ጎዳ ጎይኒቴ። +

3 ጎዳ ጬንጉርሳይ

ሃꬃታ ቦላን ሲዬቴስ።

ቦንቾ ጾሳይ

ዳዳ ማላ ጉሜስ፤

ጎዳይ ጊታ ሃꬃታ ቦላን

ጉሜስ።

4 ጎዳ ጬንጉርሳይ ዎልቃማ፤

ጎዳ ጉንꬃይ፥

«ኔስ ሆላ!» ጊሲዛዛ።

5 ጎዳ ጬንጉርሳይ

ዚጋ ሚꬃ ሜንꬄሬꬄስ፤

ሊባኖሴ ዚጋታካ

ጎዳይ ሜንꬄሬꬄስ።

6 ሊባኖሴ ዙማ

ጋሎ ማራ ማላ ቡራቂሴስ፤

ሲሪዮኔ ዙማካ

ሜንꬃ ማላ ጺኪሴስ። *

7 ጎዳ ጬንጉርሳይ

ዎልቃንꬅ ፖፖልኡ ጌስ።

8 ጎዳ ጬንጉርሳይ

ባዞ ቃꬄስ፤

ጎዳይ ቃዴሴ ባዞ ቃꬄስ።

9 ጎዳ ጬንጉርሳይ

ዎላታ ቃꬄስ፤

ሚꬃ ሃይꬂካ ቆቆፌስ።

ኢዛ ኬꬃን ዴኢዛይቲ፥

«ቦንቾይ

ጎዳስ ጊዶ» ጌቴስ።

10 ጎዳይ ዲኦ ሃꬃ ቦላ

ባ ኣራታ ዎꬂዲ ኡቲዴስ፤

ጎዳይ ባ ካዎቴꬃ

ኣልጋን ኡቲዲ

ሜርናስ ሃሬስ።

11 ጎዳይ ባ ዴራስ ዎልቃ ኢሜስ።

ባ ኣሳካ ሳሮቴꬃን ኣንጄስ።

+ 29:2 ማዛ 96፡7-9 * 29:6 ሲዶና ቃላራ ሲሪዮኔ ጊዛይሲ ሄርሞኔ ቤሴስ።