39
ዳዊቲ ዛማሬታ ካቦ ኤዶታኔስ ዬጺዳ ማዛሙሬ
1 ታኒ፥ «ኢንጻርሳን
ናጋራ ኦꬆንታ ማላ
ታኒ ታ ኦጌ ናጋና፤
ኢታ ኣሳቲ
ታ ሲንꬃን ዲዛ ዎዴ
ታ ዶና ጎርዳና» ጋዲስ።
2 ታኒ ዱዴ ማላ ጮኡ ጋዲስ፤
ሃራይ ኣቶሺን ሎኦ ሚሽ
ሃሳያናፔካ ጮኡ ጋዲስ፤
ጊዶ ኣቲን ታ ዋዬይ
ሃ ዳሪዴስ።
3 ታ ዎዚናይ ቆፋን ሴሊዴስ፤
ታ ዩሻ ቆፒሺን ታማ ማላ
ኤጺ ኬዚዴስ።
ሂስቲን ታኒ ሃሳያ ዶማዲስ።
4 «ኣቤት ጎዳዉ! ታ ዴኦ ዉርሴꬃኔ
ታስ ዴኣናስ ኣቲዳ ጋላሳታ
ታና ቤሳ።
ቃሴ ታ ዳና ላይꬃይ
ኣይ ኬና ቃንꬃኮ
ታና ኤሪሳ።
5 ኔኒ ታ ላይꬃ
ቂ ታꬋኮ ኬና ኬሳዳሳ፤
ታ ላይꬂ ኔ ሲንꬃን
ቆዳን ባይንዳ ማላ፤
ቱማፔ ኣሲ ኡባይ
ኢሲቶ ኣꬊ ቢዛ ጫርኮ ማላ።
6 ቱማፔ ኣሳ ዱሲ ኤሾ ማላ፤
ጮ ሜላ ሃዳ ሃሮ
ሺሾን ዳቡሬስ፤
ጊዶ ኣቲን ኦኒ ኤካናኮ ኤሬና።
7 «ኣቤት ጎዳዉ!
ኔፔ ኣቲን ሃራ
ኦናኮ ጼሎ?
ታ ሂዶታይ ኔናና።
8 ታ ሞሮ ኡባፌ ታና ኣሻ፤
ኤያታ ሚቻስ ታና ኬሶፋ።
9 ሃይሳ ኡባ ኦꬂዳይ
ኔና ጊዲዳ ጊሻስ
ታኒ ጮኡ ጋና፤
ዶናካ ፖጊኬ።
10 ኔ ቦሻ ታ ቦላፌ ዴንꬃ፤
ኔ ዎልቃማ ሾቻ ጋሶን
ታ ዳቡራዲስ።
11 ኔኒ ኣስ ኢዛ ናጋራ ጊሻስ
ሴራሳኔ ሙራሳ፤
ኢዛስ ዲዛ ኣልኦ ሚሽ ባዳ ማላ
ኔ ዉርሳሳ፤
ቱማፔ ኣሲ ኡባይ ኢሲቶ
ጫርኪ ኣꬊዛ ጫርኮ ማላ።
12 «ኣቤት ጎዳዉ!
ታ ዎሳ ሲያ፤
ታና ማዳናስ ታ ዋሶዛ ኤዝጋ።
ታ ኣፉንꬃ ጮኡ ጎፓ፤
ታኒ ካሴ ታ ኣዋታ ኡባ ማላ
ቤቴ ኣሲኔ ኢማꬅ ጊዳዳ
ኔ ኬꬃን ዳይስ።
13 ታኒ ጉዬ ሲማ ያናስ
ዳንዳዮንታሶ ባናፔ ካሴ
ጉꬃ ዎዴ ኡፋዬታና ማላ
ታና ኣጋሻርኪ!» ጋዲስ።