40
ዳዊቲ ዛማሬታ ካቦስ ዬጺዳ ማዛሙሬ
1 ታኒ ጎዳ ዳንዳያን ናጋዲስ፤
ኢዚ ታኮ ሲሚዲ
ታ ዎሳ ሲዪዴስ።
2 ጪማ ኦላፌ፥ ሚቲዛ ኡርቃፌ
ታና ኬሲዴስ፤
ታ ቶሆታ ዛላ ቦላ ኤሲዴስ፤
ቃሴ ታ ሄሜꬃ ሚንꬂዴስ።
3 ኢዚ ታ ዶናን
ኦራꬃ ማዛሙሬ ዎꬂዴስ፤
ሄ ዬꬃይ፥
«ኑ ጾሳይ ጋላቴቶ» ጊዛዛ።
ዳሮቲ ቤኢዲ ያያናኔ
ጎዳን ኣማኔታና።
4 ጎዳን ኣማኔቲዛይ፥
ኦቶራንቻታኮ ሲሞንታይ፥
ዎርዳንቻታኮ ጼሎንታይ
ኣንጄቲዳዴ።
5 ኣቤት ታ ጎዳዉ!
ኔኒ ዳሮ ማላሊሲዛ
ኦሶ ኦꬃዳሳ፤
ኔናራ ሊኬቲዛይ
ኦኒኔ ባዋ!
ኔኒ ኑስ ቆፒዳ ሎኦ ቆፋ
ኦኒኔ ቆዳናዉ ዳንዳዬና፤
ሄሲ ታኒ ዮቲን
ዉሪዛዝ ጊዴና።
6 ኔኒ ያርሾኔ
ሙጹዋታ ኮያቤካ፤
ጹጊዛ ያርሾኔ
ናጋራ ያርሾካ
ኔኒ ሳሞታቤካ፤
ጊዶ ኣቲን ሲያና ማላ
ታስ ሃይꬃታ ዶያዳሳ።
7 ሄሳፌ ጉዬ ታኒ፥
«ጻꬃ ማጻፋን
ታ ጊሻስ ጻፌቲዳ ማላ
ሄኮ ሃኢ ታኒ ያዲስ።
8 ኣቤት ታ ጾሳዉ!
ታኒ ኔኒ ኮይዛይሳ
ኦꬃናስ ዶሳይስ፤
ኔ ዎጋይ ታ ዎዚና
ጊዶን ዴስ» ጋዲስ።
9 ጊታ ሺቆን ታኒ ጺሎቴꬃ
ሚሺራቾ ኣዋጃዲስ።
ኣቤት ጎዳዉ!
ኔኒ ኤሪዛ ማላካ
ታኒ ታ ዶናን
ዮቲዛይሳ ኣጊኬ።
10 ታኒ ኔ ጺሎቴꬃ
ታ ዎዚናን ቆታቤኬ፤
ኔኒ ኣማኔቲዛይሳኔ
ኣሺዛይሳ ታ ዮታዲስ።
ቃሴ ኔ ሲቆኔ
ኔ ቱማቴꬃ
ጊታ ሺቆዛፔ ጌንꬃቤኬ።
11 ኣቤት ጎዳዉ!
ኔ ማሮቴꬃ
ታፔ ሃሶፋ፤
ኔ ሲቆይኔ ኔ ቱማቴꬃይ
ታና ኡባ ዎዴ ናጎ።
12 ኣይስ ጊኮ ቆዳይ ባይንዳ
ኢታ ሚሺ ታና ዶዲዴስ፤
ታ ኢታቴꬂ ዳሪዳ ጊሻስ
ታ ጼላናዉ ዳንዳይኬ።
ታ ኢታ ኦሶይ
ታ ሁኤ ቢናናፔ ዳሪዴስ፤
ታ ዎዚናይ ታ ጊዶን ሴሪዴስ።
13 ኣቤት ጎዳዉ! ታና ኣሻ፤
ኣቤት ጎዳዉ!
ታና ማዳናስ ኤሶታ።
14 ታና ዎꬋናዉ ኮይዛይቲ
ሙሌካ ዬላቴቶኔ ካዉዬቶ፤
ታኒ ቆሄታናይሳ ኣሞቲዛይቲ
ካዉዪዲ ጉዬ ሲሜቶ።
15 ታ ቦላ፥
«ኢዛስ ሃሹ! ሃሹ!» ጊዳይቲ፥
ባ ሁኤስ ዬላን ዳጋሜቶ።
16 ጊዶ ኣቲን ኔና ኮይዛ ኡባቲ
ኔናን ኡፋዬቴቶኔ
ሃሹ ጌቶ፤
ኔ ኣቶቴꬃ ዶሲዛ ኡባቲ፥
«ጎዳይ ጊታቶ!» ጌቶ።
17 ታኒ ሂዬሳኔ ሜቶታንቻ፤
ጎዳይ ታስ ቆፔስ፤
ታና ማዲዛይኔ
ኣሺዛይ ኔና፤
ኣቤት ታ ጾሳዉ
ታና ኤሶን ማዳ።