ናምኣንꬆ ማጻፋ
42
(ማዛ 42—72)
ዛማሬታ ካቦስ ቆሬ ናይቲ ሃሳኣን ሺሺዳ ጊንጾ
1 ዉሻይ ፑልቶ ሃꬅ ላሞቲዛ ማላ፥
ኣቤት ጾሳዉ፥
ታኒካ ኔና ላሞታይስ።
2 «ታ ሼምፖያ
ታኒ ባዳ ጾሳ ሲንꬅ
ቤያናይ ኣዉዴሻ?» ጋዳ
ጾሳ፥ ዴኦ ጾሳ ሳሜታዱስ።
3 ኣሳይ ኡባቶ፥
«ኔ ጾሲ ኣዋን ዲዜ?»
ጊዛ ዎዴ ታስ ጋላሲኔ ኦማርስ
ኣፉንꬂ ቁማ ጊዲዴስ።
4 ታ ዎዚናያ ጬጬꬃን ጊዶራ
ሴራሼ ሃይታንታ ኣኬካዱስ፤
ዳሮ ዎዴ ታ ጾሳ ኬꬅ
ካሌꬃሼ
ኢሊሊሳኒኔ ጋላታ ዬꬃን
ባኣሌ ቦንቻና
ሺቂዳ ዳሮ ኣሳ ጊዶራ
ታ ዋና ቢዛኮ ኣሙሳዲስ።
5 ታኒ ኣይስ ሂዶታ ቃንጻዚና?
ቃሴ ኣይስ ጬጫዚና?
ታኒ ጾሳን ኣማኔታይስ፤
ታና ኣሺዛ ታ ጾሳ
ታ ቡሮ ጋላታና።
6 ታ ጾሳዉ!
ታ ዎዚናያ ጬጫዱስ፤
ሄሳ ጊሻስ
ታኒ ዮርዳኖሴ ቢታን
ሄርሞኔ ዙምቡላ
ሚዛሬ ዙማ ቦላ ኤቃዳ
ኔና ታ ቆፓና።
7 ኔ ፒሳ ጉንꬃን
ጪማይ ጪማስ ኣንኬስ፤
ቃሴ ኔ ዳምባላይኔ
ኔ ጫርኮ ኡባይ
ታ ቦላራ ኣꬊዴስ።
8 ጎዳይ ባ ሜርና ሲቆ ጋላስ
ታስ ኪቴስ።
ታኒካ ኦማርስ ኢዛስ
ጋላታ ማዛሙሬ ሺሻይስ፤
ሄሲካ ታ ዴኦ ጾሳስ
ሺሺዛ ዎሳ።
9 ታ ጾሳዉ ታስ ዛላዉ!
«ኔ ታና ኣይስ ዶጋዲ?
ታ ሞርኬቲ ታና ቆሂሺን
ታ ጬጫሼ
ኣይስ ዴኦ?» ጋይስ።
10 ታ ሞርኬቲ ታና ኡባ ዎዴ፥
«ኔ ጾሳይ ኣዋን ዲዜ?»
ጊዲ ዮኦን ታና ጫዴቴስ፤
ሜቄꬂካ ሜንꬂ ጫዬቴስ።
11 ታኒ ኣይስ ሂዶታ ቃንጻዚና?
ቃሴ ኣይስ ጬጫዚና?
ታኒ ጾሳን ኣማኔታይስ፤
ታና ኣሺዛ ታ ጾሳ
ታ ቡሮ ጋላታና።