41
ዳዊቲ ዛማሬታ ካቦስ ዬጺዳ ማዛሙሬ
1 ሂዬሳስ ቆፒዛ ኣሲ ኣንጄቲዳይሳ፤
ሜቶ ጋላስ ጎዳይ ኢዛ ኣሼስ።
2 ጎዳይ ኢዛ ናጊዲ ፓጻ ዎꬄስ፤
ኢዚካ ቢታ ቦላ ኣንጄታና፤
ጎዳይ ኢዛ ሞርኬታስ
ኢዛ ኣꬂዲ ኢሜና።
3 ጎዳይ ኢዚ ሃርጌቲዲ
ሂጻን ዲሺን ማዴስ፤
ሳኬቲንካ ኢዛ ፓꬄስ።
4 ታኒ ጊዲኮ፥ «ኣቤት ጎዳዉ!
ታኒ ኔና ቆሂዳ ጊሻስ
ታና ማራ፤
ሃርጌፌ ታና ፓꬃ» ጋዲስ።
5 ታ ሞርኬቲ ታ ቦላ
ኢታ ሚሽ ሃሳይዲ፥
«ኢዚ ኣዉዴ ሃይቃንዴሻ?
ቃሴ ኢዛ ሱንꬃይካ
ኣዉዴ ꬋያንዴሻ?» ጌቴስ።
6 ታና ቤያናዉ ዪዛ ኦኒካ
ባ ዎዚናን
ኢታ ሚሽ ሱꬂሼ
ቆꬌፔ ቆሞን ሃሳዬስ፤
ካሬ ኬዚዲካ ዚጊርስ ፑኔስ።
7 ታና ኢጺዛ ኡባቲ
ዙፔቲዲ ታ ቦላን
ሳሱኬቴቴስ፤
ኢታ ሚሺ ታ ቦላ
ጋካና ማላ ኣሞቴቴስ።
8 «ኢዛ ኢታ ሃርጌይ ኦይኪዴስ፤
ኢዚ ሄ ኢቺዳሶፔ
ሙሌካ ዴንዴና» ጌቴስ።
9 ሃራይ ኣቲን ታኒ ኣማኔቲዛ
ታ ሲቆ ላጌይ፥
ታናራ ኢሲ ማዳፌ ሚዳይ
ታ ቦላ ቶሆ ዴንꬂዴስ።
10 ጊዶ ኣቲን ኣቤት ጎዳዉ!
ኔኒ ታና ማራ፤
ታኒ ሃሎ ኬሳና ማላ
ታና ሃርጌፌ ፓꬃ።
11 ታ ሞርኬይ
ታና ጾኖንታይሳን
ኔ ታና ዶሲዛይሳ
ታ ኤራይስ።
12 ኔኒ ታና
ታ ሱሬቴꬃ ጊሻስ ማዳሳ፤
ኔ ሲንꬃን ታና
ሜርናስ ዎꬃሳ።
13 ጎዳ ኢስራኤሌ ጾሳይ
ሜርናፔ ሜርና
ጋካናዉ ጋላቴቶ።
ኣሚን! ኣሚን!