44
ዛማሬታ ካቦስ ቆሬ ናይቲ ሃሳኣን ሺሺዳ ጊንጾ
1 ኣቤት ጾሳዉ!
ቤኒ ኣꬊዳ ዎዴ
ኔ ኦꬂዳ ጊታ ሚሻ
ኑኒ ሲዪዶስ፤
ኑ ኣዋታ ዎዴካ
ኔ ኦꬂዳይሳ
ኢስቲ ኑስ ዮቲዳ።
2 ካዎቴꬃታ ኔኒ ኔ ኩሼን
ጎዳ ኬሳዳሳ፤
ኑ ኣዋታ
ኢስታ ቢታን ቶካዳሳ፤
ዴራ ሊቂሳዳሳ፤
ጊዶ ኣቲን
ኔ ካዎቴꬃታ ኣሳዳሳ።
3 ኢስቲ ባንታ ማሻን ኦሊዲ
ሄ ቢታ ኦይኪቤቴና፤
ኢስቲ ጾኒዳይ
ባ ቄሴ ሚኖቴꬃን ጊዴና።
ጊዶ ኣቲን ኔኒ
ኢስታን ኡፋዬቲዳ ጊሻስ
ኔ ኡሻቻ ኩሼይ፥
ኔ ቄሴይኔ
ኔ ሲንꬃ ፖኦ ዎልቃይ
ሄሳ ኦꬂዴስ።
4 ታ ጾሳዉ ታ ካዎይ ኔና፤
ያቆቤ ዜሬꬃስ
ጾኖ ኢሚዳይ
ጾሶ ኔና።
5 ኔናን ጊዲዲ ኑ ሞርኬታ
ኑ ኦሊ ጾናና፤
ኔ ሱንꬃን ኑናራ ኤቄቲዛይታ
ኑኒ ዬꬋና።
6 ታኒ ታ ቶራን ኣማኔቲኬ፤
ታ ጊꬃ ማሻይካ
ታና ኣሼና።
7 ጊዶ ኣቲን ኔኒ ኑና
ኑ ሞርኬታፔ ኣሻሳ፤
ቃሴ ኑና ኢጺዛይታ
ኔኒ ካዉሻሳ።
8 ኑኒ ኡባ ዎዴ
ጾሳን ጬቄቶስ፤
ኔ ሱንꬃካ ሜርናስ ሳቦስ።
9 ሃኢ ጊዲኮ ኔ ኑና ኣጋዳሳ፤
ቃሴካ ካዉሻዳሳ፤
ኔኒ ኑ ኦላንቻታራ
ኢሲፌ ኬዚዛይሳ ኣጋዳሳ።
10 ኑ ሞርኬታ ሲንꬃፌ
ኑና ባቃቲሳዳሳ፤
ኑናራ ኤቄቲዛይቲ
ኑ ኣቆታ ቦንቂዳ።
11 ኔኒ ኑና ዶርሳታ ማላ ሹካስ
ኣꬃ ኢማዳሳ፤
ቃሴ ካዎቴꬃታ ጊዶን
ኑና ላላዳሳ።
12 ኔኒ ኔ ኣሳ ሂራይሶን ባይዛዳሳ፤
ጊዶ ኣቲን ዎꬌ ዴማቤካ።
13 ኔኒ ኑና ኑ ሾሮታስ ጫሻስ፥
ቃሴ ኑ ሄራን ዲዛይታስ ቂꬌሲኔ
ሚቻስ ኬሳዳሳ።
14 ኔኒ ኑና ካዎቴꬃታ ጊዶን
ሃይሲኤስ ኬሳዳሳ፤
ኢስቲ ባንታ ሁኤ ኑ ቦላ
ቃꬂ ቃꬂ
ቂꬋና ማላ ኦꬃዳሳ።
15 ታ ኡባ ዎዴ ካዉያዲስ፤
ታ ሲንꬂ ዬላ ማይኢዴስ።
16 ሄ ኡባይ ታና ጋኪዳይ
ታ ሞርኬቲ ታ ቦላ
ሃሎ ኬሲሺን
ሃራቲ ካꬊዲ ሚጪዳ ጊሻሳ።
17 ኑኒ ኔና ዶጎንታ ዲሺን
ዎይኮ ኔ ጫቆ ቃላ
ፓጪንቾንታ ዲሺን
ሃይሲ ኡባይ ኑ ቦላን ጋኪዴስ።
18 ኑ ዎዚናይ ኔፔ
ጉዬ ኡንዱዲቤና፤
ኑ ቶሆይ ኔ ኦጌፔ
ጋጻ ኬዚቤና።
19 ጊዶ ኣቲን ኔኒ ኑና
ሜንꬄሬꬃዳ
ዶኣ ኦጌን ዬጋዳሳ፤
ጊርዲ ጊዳ ꬉማንካ ኦላዳሳ።
20 ኑ ጾሳ ሱንꬅ
ኑኒ ባሊዳ ጊዲኮ
ኑ ኩሼካ ኤቃ ጾሳታ
ዎሳናስ ሚጪዳኮ፥
21 ሃይሳ ኤሮይ ጾስ ጾናኔ?
ኢዚ ዎዚናን ጌሚ ዲዛ
ጹራ ኡባ ኤሬስ
22 ጊዶ ኣቲን ኡባ ጋላስ
ኔ ጊሻስ
ሃይቆስ ኣꬊ ኢሜቲዶስ፤
ሹካስ ኤፊዛ ዶርሳታ ማላካ
ቆዴቲዶስ።
23 ኣቤት ጎዳዉ ቤጋ!
ኣይስ ꬊስካይ?
ዴንዳ! ሜርናስ ኑና ኣጎፋ።
24 ኔ ሲንꬃ ኑፔ ኣይስ ጌንꬃይ?
ኑ ቆሄቴꬃኔ
ኑ ኡንኤቴꬃ ኣይስ ዶጋይ?
25 ኑኒ ዱጌ ጉዱላን ዬጌቲዶስ፤
ቢታ ቦላካ ፖርጩ ጊዶስ።
26 ኣቤት ጎዳዉ፥
ኑና ማዳናስ ዴንዳ!
ኔ ሜርና ሲቆን ኑና ዎዛ።