45
ጪሻታ ጊጊሶ ጌቴቲዛ ዬꬃን ቆሬ ናይቲ ዛማሬታ ካቦስ ዬጺዳ ማዛሙሬ
1 ታ ዎዚናፔ ሎኦ ቆፋይ ፑልቴስ፤
ታ ጊግሲዳ ጊንጾዛ
ካዎዛ ሲሳና፤
ታ ኢንጻርሳይካ
ኤራንቻ ጻፌ ቢኢሬ ማላ።
2 ኣሳ ኡባፌ ኔኒ ኬሃ ሎኣሳ፤
ኔ ፑላን ኩሚዳ
ቃላ ሃሳያሳ፤
ሄሳ ጊሻስ ጾሲ ኔና
ሜርናስ ኣንጂዴስ።
3 ዎልቃማ ካዎ!
ኔ ማሻ ጊጻ፤
ቦንቾኔ ቴማ ማይኣ።
4 ቱማቴꬃስ፥
ኣሽኬቴꬃሲኔ ጺሎቴꬃስ
ኔ ቴማቴꬅ ማይኣዳ
ኦላ ጾናናስ ሲንꬄ ሆርዶፋ፤
ኔ ኡሻቻ ኩሼይ
ማላሊሲዛ ሚሽ ቤሶ።
5 ኔ ዪሻቲ ቃራታ፤
ኢስቲ ካዎ ሞርኬታ
ዎዚና ኣይፌን ጫዳና፤
ካዎቴꬃቲ ጾኔቲዲ
ኔ ቶሆ ጋርሳን ኩንዳና።
6 ኣቤት ጾሳዉ!
ኔ ካዎቴꬃ ኣልጋይ
ሜርናስ ዳና፤
ኔ ካዎቴꬃ ጉፌይካ
ሱሬቴꬃ ጉፌ።
7 ኔኒ ጺሎቴꬅ ዶሳሳ፤
ማካላቴꬅ ኢጻሳ።
ሄሳ ጊሻስ ጾሳይ፥
ኔ ጾሳይ
ኔ ላጌታፔካ ኣꬂዲ
ኔና ኡፋይሳ ዛይቴን ቲይዴስ።
8 ካርቤፌ፥ ጎዳሬ ኡꬃፌኔ
ቡርጉዴፔ
ኦሴቲዳ ሺቶን ኔ ማይኦይ
ጫጫፌቲዲ ሳዎ ቱኑ ጌስ፤
ዳንጋርሳ ዛሌን ኣሌቄቲዳ
ኔ ካዎቴꬃ ኬꬃን
ዲጼቲዛ ዲꬃይኔ
ማሲንቆይ ኔና ኡፋይሴስ።
9 ካዎቴꬃ ኬꬃን ዲዛ
ማጫሳታ ጊዶን
ካዎታ ማጫ ናይቲ ዴቴስ፤
ጎዳቴያ ጌሻ
ዎርቃን ኣሌቄታዳ
ኔፔ ኡሻቻ
ባጋን ኤቃዱስ።
10 ታ ናዬ፥ ኤዝጋ ሲያ፤
ኔ ሃይꬃ ሃ ዬጋ።
ኔ ዴራኔ
ኔ ኣዋ ኬꬃ ዶጋ።
11 ኔ ሜꬋ ሎኦይ
ካዎ ዎዚና ኤኪዴስ፤
ኢዚ ኔስ ጎዳ ጊዲዳ ጊሻስ
ኔ ኢዛ ቦንቻ።
12 ጺሮሴ ኣሳይ ኢዚስ
ኢሞታ ኤኪ ያና፤
ዱሬቲ ኔና ኣዳሻና።
13 ካዋ ናያ ካዎ ኬꬃ ጊዶን
ኣይ ማላ ሎኣዜ!
ኢዚ ማይኦይካ ዎርቃን ኣሌቂዴስ።
14 ባ ኣሌቆ ማይኦዛ ማይኣዳ
ካዎዛኮ ባዉስ፤
ኢዚ ላጌ ጊዲዳ ጌላኦቲ
ኢዞ ኣዣቢ ኢዛስ ኤኪ ዪዳ።
15 ኢስቲ ኡፋዬቲሼኔ
ሆምቦጪሼ ዪዲ
ካዎዛ ኬꬅ ጌሌቴስ።
16 ካዎ! ኔ ናይቲ
ኔ ኣዋታ ሶሆ ላታና፤
ኔኒ ኢስታ ቢታ
ኡባ ቦላን ሹማና።
17 ታኒ ኔ ሱንꬂ ዬሌታ ኡባን
ሃሳኤታና ማላ ኦꬃና።
ሄሳ ጊሻስ ኣሳይ
ሜርናስ ኔና ሳባና።