46
ጌላኦ ናይታ ኤዶ ጌቴቲዛ ዬꬃን ቆሬ ናይቲ ዛማሬታ ካቦስ ዬጺዳ ማዛሙሬ
1 ጾሲ ኑኒ ሺቂ ኣቲዛሶኔ
ኑስ ዎልቃ፤
ኑና ሜቶይ ጋኪዛ ዎዴ
ማዳናስ ኢዚ ኡባቶ
ማታን ዴስ።
2 ሄሳ ጊሻስ ቢታይ ቃጺኮ፥
ዙማቲካ ዱጌ ኣባን ጌሊኮ
ኑኒ ያዮኮ።
3 ኣባ ዳምባላይካ
ጉሚዲ ሆሞቲኮ፥
ኢዛ ዎልቃማ ሃኖን
ዙማቲ ኮኮርኮካ
ኑኒ ዳጋሞኮ።
4 ጾሳ ካታማን፥
ኡባፌ ꬎቃ ጾሳይ ዲዛሶን
ኡፋይሲዛ ሻፋቲ ዴቴስ።
5 ጾሲ ኢዚ ጊዶን ዲዛ ጊሻስ
ሄ ካታማያ ቃጹኩ፤
ዎንታ ማላዶራ ጾሲ
ኢዞ ማዳና።
6 ካዎቴꬃቲ ማካላን ዴንዲዳ፤
ካዎቲካ ኩንዲዳ፤
ኢዚ ባ ቃላ
ꬎቁ ሂስቲ ሲሲዴስ፤
ቢታይካ ሴሪዴስ።
7 ኡባፌ ዎልቃማ ጎዳይ
ኑናራ ዴስ፤
ያቆቤ ጾሲ
ኑ ቆቴቲ ኣቲዛ ቆልኣ።
8 ሃ ዪቴ፤ ጎዳ ኦሶ ጼሊቴ፤
ኢዚ ሳኣ ዎስቲ
ቡላሲዳኮ ቤኢቴ።
9 ኢዚ ሳኣ ጋጻፔ ጋጻ ጋካናስ
ዲዛ ኦላ ቴቄስ፤
ዎንዳፌኔ ቶራ ሜንꬄስ፤
ጎንዳሌካ ታማን ጹጌስ።
10 ሼምፒ ኡቲቴ፤
ታኒ ጾስ ጊዲዳይሳ ኤሪቴ፤
ካዎቴꬃታ ቦላ
ታ ꬎቁ ꬎቁ ጋና፤
ቢታ ቦላካ ታ ꬎቁ ꬎቁ ጋና።
11 ኡባፌ ዎልቃማ ጎዳይ
ኑናራ ዴስ፤
ያቆቤ ጾሲ
ኑ ቆቴቲ ኣቲዛ ቆልኣ።