50
ኣሳፌ ማዛሙሬ
1 ዎልቃማ ጎዳይ፥
ጾሳይ ሃሳዬስ፤
ኣርሼይ ሞኪዛሶፔ
ዉሊዛሶ ጋካናስ
ሳኣን ዲዛ ኣሳ ጼይጌስ።
2 ሙሌራ ሎኦ ጊዲዳ ጺዮኒፔ
ጾሲ ፖኢሴስ።
3 ኑ ጾሲ ያና፤
ኢዚ ጮኡ ጌና።
ሚዛ ታማይ ኢዛ ሲንꬃና፤
ዎልቃማ ጎቴይ ኢዛ ዩሾና።
4 ጾሲ ባ ኣሳ ፒርዳናስ
ሳሎኔ ሳኣ ጼይጌስ።
5 «ታናራ ያርሾን ጫቄቲዳ
ጌሻታ ታኮ
ሺሺቴ» ጌስ።
6 ጾሲ ባርካ ፒርዲዛ
ጾሳ ጊዲዳ ጊሻስ
ሳሎቲ ኢዛ ጺሎቴꬃ ኣዋጄቴስ።
7 «ታ ኣሳዞ ኔ ሲያ!
ታኒ ኔስ ዮታይስ፤
ኢስራኤሌ ኣሳዉ!
ታኒ ኔ ቦላ ማርካታይስ።
ታኒ ጾሳይ ኔ ጾሳ።
8 ኔ ያርሾ ጊሻሲኔ
ኔኒ ኡባቶ ሺሺዛ
ጹጌቲዛ ያርሾ ጊሻስ
ታኒ ኔና ቦሪኬ።
9 ሄሳ ማላካ ኔ ዲርሳፌ ኮርማታ፥
ዎይኮ ኔ ጻርጳፌ ዴይሻታ
ኤካናዉ ኮይኬ።
10 ዎራን ዲዛ ዶኣ ኡባቲ ታሳ፤
ሺ ዙማታ ቦላን ዲዛ
ሜሄቲካ ታይታ።
11 ታኒ ዙማታ ቦላ ዲዛ ካፎታ
ኡባ ኤራይስ፤
ዴምባን ዲዛ ሜꬌቴꬃቲ
ኡባይ ታይታ።
12 ሳሎ ጉፋንꬆን ዲዛ ኡባይ ታሳ፤
ሄሳ ጊሻስ ታ ጋፊኮካ
ኔስ ዮቲኬ።
13 ታኒ ኮርማታ ኣሾ ሚኬ፤
ዎይኮ ዴይሻታ ሱꬅ ኡዪኬ።
14 ጾሳስ ጋላታ ያርሾ ሺሻ፤
ኔ ኣዲና ኡባፌ ꬎቃ
ጾሳስ ጋꬃ።
15 ሜቶ ጋላስ
ኔ ታና ጼይጋ፤
ታ ኔና ኣሻና፤
ኔካ ታና ቦንቻና» ጌስ።
16 ጊዶ ኣቲን ጾሲ ናጋራንቻስ፥
«ታ ዎጋ ኔኒ
ዛራ ዛራዳ ቢዳናስ
ዎይኮ ታ ጫቆ ቃላ
ኔ ዮታናስ
ኔስ ኣይ ማታይ ዲዜ?
17 ኔ ታ ሴራ ኢጻሳ፤
ታ ቃላታካ ካꬋሳ።
18 ኔኒ ካይሶ ቤኢዳ ዎዴ
ኢዛራ ዳቦታዳሳ፤
ላይማቲዛይታ ማባራንካ
ዙፔታሳ።
19 ኔኒ ኔ ዶና
ኢታ ሃሳያናስ ዶያዳሳ፤
ኔ ሃሳይዛ ሃሳያይ
ዎርዶ ጻላ።
20 ኣꬎሶን ኣꬎሶን
ኔ ኢሻ ዚጊራሳ፤
ኔ ኣዪ ና ሱንꬂካ ሞራሳ።
21 ኔኒ ሃይሳ ኡባ ኦꬂዛ ዎዴ
ታኒ ጮኡ ጋዲስ፤
ሄሳ ጊሻስ ኔኒ ታና
ኔ ማላ ጋዳ ቆፓዳሳ፤
ጊዶ ኣቲን ሃኢ ታኒ
ኔና ዋላሳይስ፤
ቃሴካ ታ ኔና
ቆንጬን ሴራይስ።
22 «ኢንቴኖ ጾሳ ዶጊዛይቶ!
ሃይሳ ኣኬኪቴ፤
ኢንቴ ኢጺስ ጊኮ
ታኒ ኢንቴና ሜንꬄሬꬃና፤
ሄ ዎዴ ኢንቴና ኦኒካ
ኣሼና።
23 ታስ ጋላታ ኢሚዛ ኣሲ
ታና ቦንቼስ።
ሱሬ ኦጌራ ቢዛ ኣስ
ታኒ ኣቶቴꬃ ቤሳና» ጌስ።