51
ካዎ ዳዊቲ ላይማቲዳፔ ጉዬ ናቤ ናታኔይ ኢዛኮ ዪዳ ዎዴ ዳዊቲ ዛማሬታ ካቦስ ዬጺዳ ማዛሙሬ
1 ኣቤት ጾሳዉ!
ኔ ሜርና ሲቆዛ ማላ
ታና ማራ፤
ኔ ቃꬌታ ዳሮን
ታ ሞሮዛ ቁጫ።
2 ታ ኢታቴꬃ ኡባ
ታፔ ሜጫ፤
ታ ናጋራፔካ ታና ጌሻ።
3 ታኒ ታ ሞሮዛ ኤራይስ፤
ታ ናጋራይካ
ኡባቶ ታ ሲንꬃና።
4 ታ ኔና ጻላ ቆሃዲስ፤
ቃሴካ ኔ ሲንꬃን
ኢታ ኦꬃዲስ።
ሄሳ ጊሻስ
ኔ ቃጻይዳ ቂጻቴን፥
ኔ ታ ቦላ ፒርዲዳ ፒርዳንካ
ኔ ጺሎ
5 ታኒ ታ ኣዪ ኡሎፔ
ዶማዳ ናጋራንቻ፤
ዬሌቶሶፌ ሃ ሲማዳካ
ታ ሞራንቻ።
6 ሄኮ ኔኒ ኣሳ ዎዚናፔ
ቱማ ኮያሳ፤
ሄሳ ጊሻስ
ታ ጊዶ ኣሳቴꬃ
ኔ ኣꬎ ኤራቴꬅ ታማርሳ።
7 ሂሶጴ ቦንጮን
ኔኒ ታና ፒስታ፤
ታኒ ጌያና፤
ታና ሜጫ፤
ታኒ ሻቻፌ
ኣꬋዳ ቦጻና።
8 ኔኒ ታና ኡፋይሲኔ
ሃሹ ጊሲዛ ሚሽ ሲሳ፤
ኔ ሜንꬄሬꬂዳ
ታ ሜቄꬃታካ ፓꬃ።
9 ኔ ሲንꬅ ታ ናጋራፔ
ሃራሶ ዛራ፤
ታ ቆሆ ኡባካ ቁጫ ዲጋ።
10 ኣቤት ጾሳዉ!
ኔ ታስ ጌሻ
ዎዚና ሜꬋ፤
ሚኖ ኣያና ታ ጊዶን ዎꬃ።
11 ታና ኔ ሲንꬃፌ ኦሎፓ፤
ኔ ጌሻ ኣያና
ታፔ ኤኮፋ።
12 ኔ ኣቶቴꬃ ኡፋይሳ
ታስ ዛራዳ ኢማ፤
ኤኖ ጊሲዛ ኣያናን
ኔ ታና ኩንꬃ።
13 ሂስቲኮ ታኒ ሞራንቻታ
ኔ ኦጌ ታማርሳና፤
ሄ ናጋራንቻቲካ
ኔኮ ሲማና።
14 ኣቤት ጾሳዉ፥
ታና ኣሺዛ ጾሳዉ!
ታኒ ሼምፖ ዎꬎንታ ማላ
ታና ማዳ፤
ታ ኢንጻርሳይካ
ኔ ጺሎቴꬃ ጊሻስ
ኢሊሊሳን ዬጾ።
15 ኣቤት ጎዳዉ! ታ ዶና ዶያ፤
ሂስቲኮ ታ ኢንጻርሳይ
ኔና ጋላታና።
16 ኔኒ ያርሾን ኡፋዬቲዛኮ
ታ ኔስ ያርሾ ሺሻና፤
ኔ ጊዲኮ ያርሾን ኡፋዬታካ፤
ጹጌቲዛ ያርሾ ያርሺኮካ
ኔኒ ኡፋዬታካ።
17 ጾሳስ ሺቂዛ ያርሾይ
ኣሽኬ ኣያና፤
ኣቤት ጾሳዉ!
ሜቂዳ ዎዚና ኔ ካꬋካ።
18 ኣቤት ጾሳዉ!
ኔ ዶሳን ጺዮኖ ዱሬሳ፤
ዬሩሳላሜ ጊምቤታ ጊምባ።
19 ሄ ዎዴ ጺሎቴꬃ ያርሾኒኔ
ዉሪ ጹጌቲዛ ያርሾን
ኔኒ ኡፋዬታና፤
ኮርማቲካ ኔ ያርሺዛሶን
ያርሼታና።