52
ኤዶሜ ቢታ ኣስ ዶይቄይ ሳኦሌኮ ቢዲ፥ «ዳዊቲ ኣቢሜሌኬ ሶ ቢዴስ» ጊዲ ዮቲ ሲሚን ዳዊቲ ዛማሬታ ካቦስ ሃሳኣን ሺሺዳ ጊንጾ
1 ሃይሶ ዎልቃማዞ!
ጾሲ ኔና ካꬊቺዴስ፤
ኔ ኣይስ ኢታ ኦሶን ናሼታይ?
ኣይስ ኡባ ጋላስ ጬቄታይ?
2 ኔኖ ባሌꬆን ኩሚዳ
ጌናንቻዉ!
ሃራታ ꬋይሳና ቃጻሳ!
ኔ ኢንጻርሳይካ
ቃራ ማጋላ ማላ።
3 ኔኒ ሎኦ ኣጋዳ ኢታ ሲቃሳ፤
ቱማ ሃሳያናፔ ዎርዶ
ሃሳያ ዶሳሳ።
4 ኔኖ ባሌꬆን ኩሚዳ
ዎርዳንቻዞ!
ኔኒ ኣስ ማዱንꬂዛ
ቃላ ሲቃሳ።
5 ጊዶ ኣቲን ጾሲ ኔና
ሜርናስ ꬋይሳና፤
ኢዚ ኔና ኔ ኬꬃፌ
ቡጪ ኬሳና፤
ፓጻ ዲዛይታ ጊዶፌካ
ꬎቃሊ ዲጋና።
6 ጺሎቲ ሃይሳ ቤኢዲ ያያና፤
ኢስቲ ኢዛ ቦላ ሂዝጊ ሚጫና፤
7 «ጾሳ ባስ ዜምፖ
ኦꬆንታዴ፥
ባ ዱሬቴꬃ ዳሮን
ኣማኔቲዛዴ
ባ ኢታ ኦሶን ሚኒዛዴ
ሃይሳ ቤኢቴ!» ጋና።
8 ጊዶ ኣቲን ኣጪዛ
ዎጋራ ሚꬃ ማላ
ታኒ ጾሳ ኬꬃን ኣጫይስ፤
ኢዛ ሜርና ሲቆን ታኒ
ሜሪ ሜርናስ ኣማኔታይስ።
9 ኔኒ ኦꬂዳ ኡባስ
ታኒ ኔና ሜርናስ ጋላታይስ፤
ኔ ሎኦ ጊዲዳ ጊሻስ
ታ ኔ ሱንꬃን ሂዶታ ኦꬃይስ፤
ታኒ ጾሳ ዴራ ሲንꬃን
ኔ ኪያቴꬃ ሳባና።