57
ዳዊቲ ሳኦሌ ሲንꬃፌ ባቃቲዲ ጎንጎሎ ጊዶን ዲሼ ዛማሬታ ካቦስ፥ «ꬋይሶፋ» ጌቴቲዛ ዲꬃ ጊጊሶን ሺሺዳ ዎሳ ማዛሙሬ
1 ኣቤት ጾሳዉ!
ኔ ታስ ቃꬌታ፤
ታና ማራ፤
ታ ሼምፖያ ኔናን ዜምፓዱስ፤
ባሻይ ኣꬋና ጋካናስ
ታኒ ኔ ቄፌታ ጋርሳን ቆቴታና።
2 ኢዚ ባ ሃልቾ ማላ ታስ ፖሊዛ
ኡባፌ ꬎቃ
ጾሳኮ ዋሳይስ።
3 ጾሲ ሳሎፔ ማዶ ኪቲዲ
ታና ኣሻና፤
ታና ዬꬊዛይታ ካዉሻና፤
ጾሲ ባ ሜርና ሲቆኔ
ባ ቱማቴꬃ ታስ ኪታና።
4 ታኒ ታ ሞርኬታ ጊዶን፥
ኣስ ፑዚዲ ሚዛ ጋሞ
ሚሳቲዛይታ ጊዶን ዳይስ።
ኢስታ ኣቻይ ቶራኔ
ዎንዳፌ ዪሻ ማላ፤
ኢስታ ኢንጻርሳይካ
ቃራ ማሻ ማላ።
5 ኣቤት ጾሳዉ! ኔኒ ሳሎታፔ
ቦላራ ꬎቁ ꬎቁ ጋ፤
ኔ ቦንቾይ ሳኣ ኡባ ኩሞ።
6 ኢስቲ ታ ቶሆስ ዎጺማዴ ዎꬂዳ፤
ታ ኣሳቴꬃ ኩኒሲዳ፤
ኢስቲ ታ ኦጌን ኦላ ቦኪዳ፤
ጊዶ ኣቲን ሄ ኦላን
ባንታስ ኩንዲዳ።
7 ታ ዎዚናይ ሚኒ ዴስ፤
ኣቤት ጾሳዉ!
ታ ዎዚናይ ሚኒዲ ዴስ፤
ታኒ ኔስ ዬጻናኔ
ኔና ሳባና።
8 ታ ሼምፖዬ ቢርካ!
ዲꬃቲኔ ማሲንቆቲ
ቤጊቴ!
ታኒካ ዎንታራ ዴንዳና።
9 ኣቤት ጎዳዉ፥ ታኒ ኔና
ኣሳ ኡባ ሲንꬃን ጋላታና፤
ቃሴ ዴራ ጊዶን
ታ ኔና ዬꬃን ሳባና።
10 ኔ ሜርና ሲቆይ
ፑዴ ሳሎ ጋኪዴስ፤
ኔ ቱማቴꬃይካ
ሳሎ ሻራ ጋኪዴስ።
11 ኣቤት ጾሳዉ!
ኔኒ ሳሎታፔ ቦላራ
ꬎቁ ꬎቁ ጋ፤
ኔ ቦንቾይ
ሳኣ ኡባ ኩሞ።