58
ዳዊቲ ዛማሬታ ካቦስ፥ «ꬋይሶፋ» ጌቴቲዛ ዲꬃ ጊጊሶን ሺሺዳ ዎሳ ማዛሙሬ
1 ኢንቴኖ ዴሬ ሃሪዛይቶ!
ኣዳካ ኢንቴ ዶናፔ
ጺሎ ሃሳያይ ኬዚዜ?
ኣሳ ኡባስ ጺሎ ፒርዴቲ?
2 ኣካይ! ኢንቴ ዎዚናን
ኢታ ሚሽ ሃልቼታ፤
ኢንቴ ኩሼይ ቢታ ቦላ
ማካላ ኦሶ ኦꬄስ።
3 ኢታቲ ባ ኣዪ ኡሎፔ ዶሚዲ
ሞሮ ኦጌ ቤቴስ፤
ዬሌቲዳ ጋላሳፌ ዶሚዲ
ባሌቴቴሲኔ ዎርዶቴቴስ።
4 ኢስቲ ሾሻ ማላ
ማርዜራ ዴቴስ፤
ቱሌ ጎፔ ሾሻ ማላ
ባ ሃይꬅ ቱሊሴቴስ።
5 ሙሬኒዛይሲ ኣይ ማላ
ጪንጫ ጊዲኮካ
ጎፔ ሾሺ
ኢዛ ጬንጉርሳ ሲዬና።
6 ኣቤት ጾሳዉ!
ኢስታ ኣቻ ሜንꬃ፤
ኣቤት ጎዳዉ!
ጋሞታ ባንቂላ ሜንꬃ።
7 ኢስቲ ጉኪዛ ሃꬃ ማላ
ꬋዬቶ፤
ኢስቲ ዱኪዛ
ዎንዳፌ ዪሻይ ዱንኦ።
8 ኢስቲ ቢሼ
ሙሺዛ ꬋꬌ ማላ
ጊዴቶ፤
ፖኦ ቤኦንታ ኣዉጫያ ዬሌቲዳ
ና ማላ ጊዴቶ።
9 ኣጉንꬃ ታማይ ኦቶ ሱሊሶንታ
ꬋይዛ ማላ ናጋራንቻታ
ኔ ኤሶን ꬋይሳ።
10 ናጋራንቻታ ቦላ
ሃሎ ኬሲዛይሳ ቤኢዲ
ጺሎቲ ኡፋዬታና።
ኢታታ ሱꬃን
ባ ቶሆ ሜጬታና።
11 ሄ ዎዴ ኣሳይ፥
«ኣዳካ ጺሎቲ ኦꬂዳ
ሎኦ ኦሶስ
ዎይቶይ ዴስ፤
ቱሙካ ሳኣ ቦላ ፒርዲዛ
ጾሲ ዴስ» ጋና።