75
ኣሳፌይ ዛማሬታ ካቦስ፥ «ꬋይሶፋ» ጌቴቲዛ ዲꬃ ጊጊሶን ሺሺዳ ማዛሙሬ
1 ኣቤት ጾሳዉ!
ኔና ጋላቶስ፤
ኔ ኑስ ማታ ጊዲዳ ጊሻስ
ኔ ሱንꬃስ ጋላታ ሺሾስ፤
ኣሳይካ ማላሊሲዛ
ኔ ኦሶ ኡባ ጊሻስ
ሃሳዬስ።
2 ጾሲ፥ «ታ ባራ ዎꬂዳ ዎዴን
ሱሬ ፒርዳ ፒርዳናይ ታና።
3 ሳኣይኔ ኢዛ ቦላ ዲዛ
ሜꬌታ ኡባይ ቃጺዛ ዎዴ
ሳኣ ቱሳታ ሚንꬃ
ኤሲዳይ ታና።
4 ኦቶራንቻታ፥ ‹ኦቶሬቶፍቴ› ጋይስ፤
ኢታታካ፥ ‹ኢንቴ ማካሎፍቴ።
5 ኔ ካጬ ኦቶሮን
ꬎቁ ꬎቁ ሂስቶፋ፤
ኔ ቆꬌ ቃꬃ
ሃሳዮፓ› ጋይስ» ጌስ።
6 ቦንቾይ ኣርሼይ ሞኪዛሶፔ
ዎይኮ ዉሊዛሶፔ
ዎይኮ ባዞፌ ዬና።
7 ጊዶ ኣቲን ሱሬ ፒርዲዛይ ጾሳ፤
ኢዚ ኢሳ ቦላ ፒርዴስ፤
ኢሳ ጺሊሴስ።
8 ጎዳ ኩሼን ዋንጫይ ዴስ፤
ኢዛን ሆሞቲዛ ሃንቆ ዎይኔ
ኡሺ ኩሚ ኡቲዴስ፤
ሄ ኡሻዛ ጌዴ ካሬ ጉሲዴስ፤
ሳኣን ዲዛ ማካላንቻቲ
ሄሳ ኡዪዳ፤
ኢስቲ ኦርጮካ
ኣሾንታ ጮንጎርሲዳ።
9 ታኒ ጊዲኮ ሃይሳ
ሜርናስ ኣዋጃና፤
ያቆቤ ጾሳካ ማዛሙሬን ሳባና።
10 ታኒ ኢታታ ካጬ ኡባ ሜንꬃና፤
ጺሎታ ካጬ ጊዲኮ
ꬎቁ ꬎቁ ሂስታና።