76
ኣሳፌይ ዛማሬታ ካቦስ ዲꬃታን ዬጺዳ ማዛሙሬ
1 ጾሲ ዩሁዳን ኤሬቲዴስ፤
ኢዛ ሱንꬂካ ኢስራኤሌን ጊታ።
2 ኢዛ ዱንካኔይ ሳሌሜን ዴስ፤
ኢዛስ ዱሳሶይካ ጺዮኔ።
3 ኢዚ ሄሳን ዱኪዛ
ዎንዳፌ ዪሻ፥
ጎንዳሌ፥ ጊꬃ ማሻታኔ
ሃራ ኦላ ሚሻታ
ሜንꬄሬꬂ ዬጊዴስ።
4 ኣቤት ጾሳዉ!
ኔኒ ቦንቾ ማይኣዳ
ጶላሳ፤
ኔ ቴማቴꬂ
ጊታ ዙማታፔካ ኣꬌስ።
5 ጎባ ኦላንቻቲ ቦንቄቲዳ፤
ኢስታፌ ኢሶይካ ባ ኩሼ
ዴንꬃና ዳንዳይቤና፤
ኢስቲ ዎልቃማ ꬊስኮ ꬊስኪዳ።
6 ኣቤት ያቆቤ ጾሳዉ!
ኔ ሃንቆ ጋሶን ቶጋ ኣሳቲኔ
ቶጋ ፓራቲ ኩንዲ ኣቲዳ።
7 ኣቤት ጾሳዉ! ኔኒ ያሻሳ!
ኔ ሃንቆይ ሱሊዳ ዎዴ
ኔ ሲንꬃን ኦኔ ኤቃናይ?
8 ኔኒ ሳሎፔ ፒርዳ ሲሳዳሳ፤
ቢታይ ያያዳ ሲርጲ ጋዱስ።
9 ኣቤት ጾሳዉ!
ሃይሲ ሳኣ ቦላ
ኡንኤቲዳይታ ኣሻናስ
ኔኒ ፒርዳስ ዴንዲን ሃንዴስ።
10 ኔኒ ኣስ ሃንቂኮካ
ሄሲ ኔ ቦንቾስ ጊዴስ፤
ኦላፔ ኣቲዳይቲ
ኔ ባኣሌ ቦንቻና።
11 ጎዳ ኢንቴ ጾሳስ ኣዲኒቴ፤
ሄ ኣዲኔቲዳይሳካ ጋꬂቴ፤
ኢዛ ዩሾን ዲዛ ኡባቲ
ኢዛስ ያሺሲዛ
ኢሞታ ኤኪ ዪቴ።
12 ኢዚ ኦቶሬቲዛ ዳናታ ካዉሻና፤
ዎልቃማ ካዎታካ ኢዚ ያሺሳና።