77
ኣሳፌይ ዛማሬታ ካቦ ኤዶታኔስ ዬጺዳ ማዛሙሬ
1 ታኒ ታ ቃላ ꬎቁ ሂስታዳ
ጾሳኮ ዋሳይስ፤
ታና ሲያና ማላ
ታ ኢዛ ዎሳይስ።
2 ታኒ ሜቶቲዳ ጋላስ ጾሳ ኮያይስ፤
ኦማርሲካ ሼምፖንታ
ታ ኩሼታ ኢዛኮ ሚጫይስ፤
ጊዲኮካ ታኒ ሚኔታናስ
ዳንዳያቤኬ።
3 ኣቤት ጾሳዉ!
ታ ኔና ቆፓሼ ጬጫይስ፤
ታ ዩሻ ቆፓሼ
ኬሃ ዳቡርዴስ።
4 ታ ኣይፌፔ ꬊስኮ ꬋይሳዳሳ፤
ታስ ጋናዚ
ꬋያና ጋካናስ ጬጫዲስ።
5 ታኒ ኣꬊዳ ዎዴታ ቆፓዲስ፤
ካሴ ኣꬊዳ
ላይꬃታካ ሃሳኣዲስ።
6 ታ ዬጺዳይሳ ጊዶꬅ
ዩሻ ቆፓዲስ፤
ታኒ ዎዚናን ኣኬካዲስ፤
ታ ኣያናይ ታና ዴንꬄꬂን፥
7 «ጎዳይ ኑና ሜርናስ
ዬጊ ኣጋኔ?
ሃይሳፌ ጉዬ
ኑና ሎኦ ቤሴኔ?
8 ኑና ሲቂዛይሳ ሙሌራ ኣጊዴ?
ኢዚ ዮቲዳ ሂዶታይ ሻሬቲዴ?
9 ጾሲ ባ ማሪዛይሳ ኣጊዴ?
ሃንቆን ባ ቃꬌታ ኣጊዴ?»
ጋ ኦይቻይስ።
10 ኡባፌ ꬎቃ ጾሳዉ!
ታና ቆሂዳይ፥
ኔ ኡሻቻ ኩሼይ
ካሴይሳꬆ
ኑና ማዶንታ ኣጎይሳ።
11 ጎዳዉ! ኔ ኦሶታ
ታኒ ቆፓና፤
ኔኒ ቤኒ ዎዴ ኦꬂዳ
ማላሊሲዛ ኦሶታ ኡባ
ታ ዩሻ ቆፓና።
12 ኔ ኦꬂዳ ኡባ
ታኒ ዛራ ዛራዳ ቆፓና፤
ኔ ዎልቃማ ኦሶታ ኡባ
ታኒ ኣኬካና።
13 ኣቤት ጾሳዉ!
ኔ ኦጌይ ጌሻ፤
ኑ ጾሳ ማላ
ሃራ ጊታ ጾሲ ኦኔ?
14 ኔኒ ማላሊሲዛዝ ኦꬂዛ ጾሳ፤
ዴሬታ ጊዶን
ኔ ዎልቃ ቤሳሳ።
15 ያቆቤኔ ዮሴፌ
ዜሬꬅ ጊዲዳ ኔ ዴሬታ
ኔኒ ኔ ዎልቃን ዎዛዳሳ።
16 ኣቤት ጾሳዉ!
ሃꬃቲ ኔና ቤኢዳ፤
ሃꬃቲ ኔና ቤኢዲ ያዪዳ፤
ጪማ ኣባቲካ ኮኮሪዳ።
17 ሻራቲ ኢራ ኢሚዳ፤
ሳሎን ዳዳይ ጉሚዴስ፤
ዎልቃንꬂ ዋዋጪ ጊዴስ።
18 ኔ ዳዳ ጉንꬃይ
ጎቴ ጫርኮ ጊዶን ኮሺሚዴስ፤
ኔ ዎልቃንꬃ ጶሌꬂ
ሳኣ ፖኢሲዴስ፤
ቢታይካ ቃጺ ኮኮሪዴስ።
19 ኔኒ ኣባ ጊዶራ ሄሜታሳ፤
ጪማ ኣባ ጊዶራ
ካንꬃሳ፤
ጊዲኮካ ኔ ቢዳ ጌዶይ
ኤሬቴና።
20 ሙሴኔ ኣሮኔ ኩሼን
ኔኒ ኔ ዴሬዛ ዶርሳ
ዉዴ ማላ ካሌꬃዳሳ።