ኦይዳንꬆ ማጻፋ
90
(ማዛ 90—106)
ጾሳ ኣስ ሙሴይ ዎሲዳ ዎሳ
1 ጎዳዉ! ኔኒ ኑስ
ዬሌታፔ ዬሌታ
ጋካናስ ሺቂ ኣቲዛሶ ጊዳዳሳ።
2 ዙማቲ ሜꬌታናፔ ካሴ፥
ዎይኮ ኔኒ ሳኣ
ኦꬃናፔ ካሴ
ሜርናፔ ሜርና ጋካናሲ
ኔኒ ጾሳ።
3 ኔኒ ኣሳ ናይታ፥
«ኣሳ ናይቶ!
ጉዬ ቢታን ሲሚቴ»
ጋዳ ኢስቲ ሜꬌቲዳ ቢታን
ጉዬ ዛራሳ።
4 ሺ ላይꬂ ኔስ ኣꬊዳ
ኢሲ ጋላሳ ማላ፤
ዎይኮ ኦማርሳፌ ኢሲ ሳቴ ማላ።
5 ኣስ ቆፖንታ ኤፊዛ ዲኦ ማላ
ኔ ኤፊሺን፥
ኢስቲ ኣጉሞ ማላ ኣꬋና፤
ማላዶ ማላዶ
ሞኪዛ ማታ ማላ ጪሊሌቴስ።
6 ማታይ ማላዶ ዲጪዲ ጪዬስ፤
ኦማርሳ ዎዴ ጊዲኮ
ሹሊዲ ሜሌስ።
7 ኑኒ ኔ ቃንጌꬃን ዉሪዶስ፤
ኔ ሃንቆ ሱሌን ዳጋሚዶስ።
8 ኔኒ ኑ ኢታ ኦሶ
ኔ ሲንꬃን ዎꬃዳሳ፤
ቃሴ ኑ ጌንꬂዳ ናጋራ
ኔ ሲንꬃ ፖኦኮ
ኣꬃዳሳ።
9 ኑ ዎዴ ኡባይ
ኔ ሃንቆን ኣꬊዴስ፤
ኑ ላይꬃካ ኦሌን ዉርሶስ።
10 ኑ ዳና ላይꬃይ
ላፑን ታማ፤
ዳሬስ ጊኮ ኦስፑን ታማ፤
ሄይቲካ ሜቶኒኔ
ጬጬን ኩሚዳ፤
ኑ ላይꬃይ ኤሶን ኣꬌስ፤
ኑኒካ ኤሶን ባና።
11 ኔ ሃንቆዛ ዎልቃ ኦኔ ኤሪዛይ?
ኔ ሃንቆ ሴላይ ያሼስ።
12 ኑ ላይꬃ ማራራ
ኑ ጎኤታና ማላ
ኑና ኣꬎ ኤራቴꬅ ታማርሳ።
13 ኣቤት ጎዳዉ!
ኔ ሃንቆይ
ኣዉዴ ጋካና ጋምኣኔ?
ሲማ! ኔ ኣይሌታስ ቃꬌታ!
14 ኑ ላይꬃ ኡባን
ኑኒ ኡፋዬታና ማላኔ
ዬጻና ማላ ማላዶ ማላዶ
ኔ ሲቆን ኑና ካልሳ።
15 ኔኒ ኑና ሜቶꬂዳ
ጋላሳታ ኬናኔ
ኑኒ ቱጋ ቤኢዳ ላይꬃታ
ሊኬ ኑና ኡፋይሳ።
16 ኑስ ኔ ኣይሌታስ
ኔ ኦሶይ ቆንጮ፤
ኔ ቦንቾይ ኑ ናይታስ ቤቶ።
17 ኣቤት ጎዳዉ! ኑ ጾሳዉ!
ኔ ኪያቴꬂ ኑናራ ጊዶ፤
ኑ ኦꬂዛ ኡባ
ኑስ ኢንጄሳ፤ ኤሮ!
ኑ ኦꬂዛ ኡባ ኑስ ኢንጄሳ።