91
ኑና ናጊዛ ጾሳስ ዬጼቲዳ ማዛሙሬ
1 ኡባፌ ꬎቃ ጎዳን
ዜምፒ ዴኢዛይ፥
ኡባ ዳንዳይዛ
ጾሳ ኩዋን ኣቄስ።
2 ታኒ ጎዳ፥
«ኔኒ ታስ ዜምፖ፥
ሚጻኔ ታኒ ኔናን
ኣማኔቲዛ
ታ ጾሳ» ጋና።
3 ኢዚ ኔና ሻንካንቻታ ጊቴፔ፥
ዎꬊዛ ኢታ ሃርጌፌካ
ኣሻና።
4 ኢዚ ባ ዋንጎታን
ኔና ካማና፤
ኢዛ ቄፌታ ጋርሳን
ኔኒ ቆቴታ ኣታና፤
ኢዛ ኣማኔቴꬃይ
ኔስ ጎንዳሌኔ
ዜምፖ ጊዳና።
5 ኔኒ ኦማርሳን
ዳጋንꬂዛ ሚሻስ፥
ዎይኮ ጋላስ ጾንጌቲዛ
ዪሻስ፥
6 ꬉማን ኦይኪዛ ሃርጌስ፥
ዎይኮ ሴታ ጋላሳን
ዉርሲዛ ኢታ ሃርጌስ ያያካ።
7 ኢሲ ሺ ኔ ሚሌሶራ፥
ቃሴ ታሙ ሺ ኔፔ
ኡሻቻ ባጋራ ኩንዳና፤
ጊዶ ኣቲን ኔና ኣይኮይካ
ቦቼና።
8 ኔኒ ኔ ኣይፌን
ጼሎ ጻላ ጼላና፤
ኢታቲካ ቃጻዬቲሺን ቤኣና።
9 ጎዳ ኔኒ ኔስ ባቃታ ኣቲዛሶ፥
ኡባፌ ꬎቃ ጾሳ ኔስ
ዜምፖ ሂስቲዳ ጊሻስ፥
10 ኢታ ሚሺ ኔና ቦቼና፤
ቦሻይካ ኔ ኬꬅ ሺቄና።
11 ኔ ቢዛ ኦጌ ኡባን
ኔና ናጋና ማላ
ጾሲ ባ ኪታንቻታ ኣዛዛና።
12 ኔ ቶሆይ ሹቻን
ꬉጴቶንታ ማላ
ኪታንቻቲ ባ ኩሼን
ኔና ዴንꬃና።
13 ኔኒ ጋሞኔ
ሃሶ ሾሻ ቦላ ሄሜታና፤
ቃሴካ ዎዳላ ጋሞኔ
ኢታ ሾሻ ዬꬋና።
14 ጎዳይ፥ «ኢዚ ታና ሲቂዳ ጊሻስ
ታኒ ኢዛ ኣሻና፤
ኢዚ ታ ሱንꬃ ኤሪዳ ጊሻስ
ታኒ ኢዛ ናጋና።
15 ኢዚ ታና ጼይጊዛ ዎዴ
ታኒ ኢዛስ ኮያና፤
ኢዚ ሜቶቲዳ ዎዴ
ታኒ ኢዛራ ኢሲፌ ጊዳና፤
ታኒ ኢዛ ኣሻናኔ
ቦንቻና።
16 ታኒ ኢዛ ላይꬃ ኣዱሳና፤
ታ ኣሺዛዴ ጊዲዳይሳ
ታ ኢዛ ቤሳና» ጌስ።