98
ማዛሙሬ
1 ጎዳስ ኦራꬃ
ማዛሙሬ ዬጺቴ፤
ጋሶይካ ኢዚ ማላሊሲዛ
ሚሽ ኦꬂዴስ፤
ኢዛ ኡሻቻ ኩሼይኔ
ኢዛ ጌሻ ቄሴይ
ኢዛስ ጾኖ ኢሚዴስ።
2 ጎዳይ ባ ኣሺዛይሳ ኤሪሲዴስ፤
ኢዚ ባ ጺሎቴꬃካ
ካዎቴꬃስ ቆንጪሲዴስ።
3 ኢዚ ኢስራኤሌታ ሲቂዛይሳኔ
ኢስታስ ኣማኔቲዛይሳ
ሃሳኢዴስ፤
ሳኣ ጋጻ ጋካናስ ዲዛ
ኣሳይ ኡባይ
ኑ ጾሳይ ኣሺዛይሳ ቤኢዴስ።
4 ሳኣ ቦላን ዲዛ ኣስ ኡባይ
ጎዳስ ኡፋይሳን ዬጺቴ፤
ቃላ ꬎቁ ኦꬂዲ
ኡፋይሳ ዬꬃን ጋላቲቴ።
5 ባጋና ዲጺሼ
ማዛሙሬን ጎዳ ጋላቲቴ፤
6 ዲንኬኔ ዛዬ ፑኒሼ
ኑ ካዋ ጎዳ ሲንꬃን
ኡፋይሳን ኢሊሊቴ።
7 ኣባይኔ ኣባ ጊዶን ኩሚዳ
ኡባይ ጉሞ!
ሳኣይኔ ሳኣ ቦላን ዲዛ
ኡባይ ዬጾ!
8 ሻፋቲ ኢሲፌ
ባንታ ኩሼ ባቄቶ!
ዙማቲ ጎዳ ሲንꬃን
ኢሲፌ ኡፋይሳን ዬጼቶ!
9 ጎዳይ ሳኣ ቦላን ፒርዳናስ ያና፤
ኢዚ ሃ ሳኣ ቦላ ጺሎቴꬃን
ኣሳ ቦላካ
ሱሬቴꬃን ፒርዳና።