99
1 ጎዳይ ካዎቲዴስ!
ሄሳ ጊሻስ ኣሳይ ኮኮሮ!
ኪሩቤታ ጊዶን
ካዎቴꬃ ኣራታን ኡቲዴስ፤
ሄሳስ ቢታይካ ቃጾ።
2 ጎዳይ ጺዮኔን ጊታ፤
ካዎቴꬃ ኡባፌ
ኢዚ ꬎቁ ꬎቁ ጊዴስ።
3 ጊታኔ ኬሂፔ ያሺሲዛ
ኔ ሱንꬃ
ኢስቲ ኡባይ ሳቤቶ!
ኢዚ ዱማ!
4 ቱማ ፒርዳ ዶሲዛ ዎልቃማ ካዎ!
ኔኒ ሱሬቴꬃስ
ዮች ዬጋዳሳ፤
ኔኒ ያቆቤስ ቱሙ ፒርዳኔ
ጺሎቴꬅ ኤሳዳሳ።
5 ኢዚ ዱማ ጊዲዳ ጊሻስ
ጎዳ ኑ ጾሳ
ꬎቁ ꬎቁ ሂስቲቴ፤
ኢዛ ቶሆ ጋርሳንካ ጉፋኒዲ
ኢዛስ ጎይኒቴ።
6 ኢዛ ቄሴታ ጊዶፌ ሙሴይኔ
ኣሮኔይ ዴቴስ፤
ሳሜሊካ ኢዛ ሱንꬃን
ዎሲዳይታፔ ኢሳ፤
ኢስቲ ጎዳስ ዋሲዳ፤
ኢዚካ ኢስታ ዋሶ ኣሊዴስ።
7 ኢዚ ሻራ ቱሳ ጊዶራ
ኢስታስ ሃሳይዴስ፤
ኢስቲ ኢዚ ኢሚዳ ማራኔ
ዎጋ ናጊዳ።
8 ኣቤት ጎዳዉ፥ ኑ ጾሳዉ!
ኔኒ ኢስታ ዎሳ ሲያዳሳ፤
ኔኒ ኢስታ ኢታቴꬃ ጊሻስ
ቃጻይዳ ጊዲኮካ
ኢስታስ ኣቶ ጊዳ ጾሳ።
9 ጎዳ ኑ ጾሳ
ꬎቁ ꬎቁ ሂስቲቴ፤
ኢዛ ጌሻ ዙማ ቦላን
ኢዛስ ጎይኒቴ፤
ኣይስ ጊኮ ጎዳ
ኑ ጾሳይ ጌሻ ጾሳ።