4
1 Dhiikettida Baasaane miizata mala intte asateththa ordisida Samaariya maccassatoo! Hayssa qaala siyite! Intte daaburanchchata kawushsheeta; manqota bollaka godateeta; intte azinata, «Nuus maththosiza ushshu ehite» geeta.
2 Hessa gishshas GODAY ba geeshshateththan, «Inttes siidhen dafoy aadhdhiin intte baana wodey yaana; inttefe heen biitta bolla attidayti qasse manxakon oyketti biza mole mala oyketti baana.
3 «Inttefe issoy issoy intte matan diza lukora gooshetti gooshetti kezidi gede Herimoonen yegettana» gi caaqqides.
Isra7eele Asay Bantta Balappe Simmibeettenna
4 GODAY, «Isra7eele derezoo!
Beetele biidi nagara ooththite!
Gelgelakka biidi
nagara gujji ooththite!
gallas gallas
intte yarsho yarshite!
heedzdzanththo gallas gallas
intte asraata immite.
5 Intte ooththanaas koyzay
hessa gidida gishshas
irshoy izan diza uketh
galata yarsho shiishshite;
intte hessa intte shene mala
shiishshiza gishshas
izan ceeqettite» gees.
6 «Inttes doonan baadhana kaththara ta dhayssada intte katamatan ubbaan kosha yeddadis. Intte gidikko haa taakko simmibeekketa.
7 Intte kaththay gakkanaappe buro heedzdzu aginay dishin sinththata ta inttes iray bukkontta mala diggadis; issi kataman bukkishin hara kataman bukkontta mala diggadis; issi gaden bukkishin hankko issaa gaden iray dhayiin melides.
8 Asay haath uyanaas koyishe ha katamappe he katama bides; gido attiin baas gidiza haaththe demmontta aggida gishshas uyidi alanaas dandaybeettenna; intteka taakko simmibeekketa.
9 «Intte kaththa melissiza harge ta kiittadis; intte intte atakiltenne woyne miththata, balasenne wogara miththata ubbaa booley mides; gido attiin intte haa taakko simmibeekketa» gees.
10 «Ta kase Gibxe biitta bolla yeddida iita hargeza mala harge intte bolla yeddadis; intte naateththa nayta mashshan hayqqana mala ooththadis; intte paratakka di7ettana mala ta ooththadis; intte dizason hayqqida asa aha xinqqoy intte siidhe tuccides; intte gidikko haa taakko simmibeekketa.
11 Sodoomenne Gamoora kase ta dhayssida mala inttefe darotakka ta dhayssadis; intte attidaytikka tamay mishin attida miththa durca mala gidideta shin intte haa taakko simmibeekketa.
12 «Intteno Isra7eele asatoo
tanikka intte bolla
hessaththo ooththana;
hessa gishshas intte tanara
intte GODAARA gayttanaas
ane giigettite!» gees.
13 Zumata ooththidaadey
carkota medhdhidaadey
ba qoppidayssa asas qonccisizay
gallassa poo7o
gede dhuman laammizay
biitta bolla dhoqqasohon
hemettizayssa
sunththay GODAA Salo Xoossa.