15
Mo7aabe Bolla Yootettida Tinbite
1 Mo7aabe biitta gishshas GODAY yootida qaalay hayssa;
Qiire-Mo7aaben diza
Eerey laalettadus;
issi gallassa omarsan dippi gadus;
qasse Qiire-Mo7aaben diza
Qiirey laalettadus;
issi gallassa omars dippi gadus.
2 Diboone asay Xoossa keeth kezides;
yeekkanaas pude
zumbullata bolla kezides;
Mo7aabe asay Nebo gishshassinne
Medeba gishshas waassees;
hu7eynne buuchchay
milxi gi meedettides.
3 Ogey dizaso ubbaan
maaqa may7eettes;
pooqeta bollaninne
dabaabay dizason yeekkeettes;
afunth gusseettes.
4 Hasebooneynne El7eeley waassida;
istta waasoykka
Yahaaxe gakkanaas seetettides.
Hessa gishshas
Mo7aabe olanchchati waassida;
istta wozinaykka kokkorides.
5 Ta wozinay Mo7aabe
gishshas yeekkides;
izippe goodettida asati
Zo7aare gakkanaas,
Egilaate-Shalishiya
gakkanaas baqatida;
istti afunth gussishe
pude Luhite kezida;
qasse Horonayme
efiza ogera bishe
bantti dhayanayssas waassida.
6 Nimiriime haaththati miccida;
maatay shullides;
caarechchayka dhaydes;
cilila miishshika beettenna.
7 Hessa gishshas
istti haarida aqotanne
istti shiishshida haaro
Ahaya shaafa
tookki pinththeettes.
8 Istta waasoy
Mo7aabe zawa
gakkanaas seetettees;
istta waasoy Egilayme gakkanaas
istta zilasaykka
Bi7eeri-Eelime gakkees.
9 Dimoona shaafati
suuththan kumida;
gidikkoka tani Dimoona bolla
hessafe aadhdhizaaz ehana.
Mo7aabeppe baqatizayta bolla
biittayn casha attidayta bolla
gaammo yeddana.