16
Mo7aabes Hidota Dhayo
1 Bazzo biittafe he pinththan diza Seelappe
Xiyoone macca nay zuman
deraa haarizayssas
dorsa laaqqa yeddite.
2 Bantta keeththafe goodettidi
waayettiza kafota mala
Mo7aabe maccassati
Arnoone shaafa purden
hessaththo hanana.
3 Mo7aabe asay Yuhuda asaas,
«Nuus zore immite;
nuus pirdite;
seeta gallas intte eeshon
omarsa dhuma mala
nuna kammite.
Baqatidayta qottite;
goodettidaytakka
aaththi immofte.
4 Mo7aabeppe goodettidayti
inttekon takketto;
istta dhayssizaytappe
istti qotetti
attizasoho gidite» gees.
Un7eththizayssas wurseththi yaana;
bashshi attana;
otoranchchay
biitta bollafe dhayana.
5 Araatay siiqon minnees;
he araatan
Dawite keeththafe gididay,
suure pirda amottizay,
xilloteth eesosizay
issi asi ammaneteththan
iza bolla uttana.
6 Yuhuda asay, «Mo7aabeta hallaca,
otoreteththaanne moodheteththa,
ceeqeteththaanne
kadheza siyidos;
gido attiin istta otoreteththi
hada» gaana.
7 Hessa gishshas Mo7aabeti waassana;
issi bolla Mo7aabes yeekkana;
Qiire-Hereesete katama
asaa gishshas
yuushshi qoppidi
kayottishe yeekkana.
8 Haseboone goshsha gadeti
Seebama woyne
miththati shullida;
kawoteththata haarizayti
Iyaazeere aadhdhi biidi
bazzo biitta kanththidi
bantta xapho
abba gakkanaas yeddidayta
doorettida woyne miththata
yedhettida.
9 Seebama woyne miththaa gishshas
Iyaazeera yeekkiza mala
tanikka yeekkays;
Haseboonee! El7eelee!
Tani ta afunththan
inttena looxikissays.
Gaasoykka inttes miththa ayfeti
gakkida wode diza hombocaynne
kath shiishshiza wode diza
ufayssi attides.
10 Ufayssaynne ililisay
ne atakiltey
dizasoppe kichchides;
woyne tokkizasohon yexxiza
yeththay deenna;
ilisikka attides.
Woyne teera
gum7izasohoy deenna;
gum7izayta hombocaakka
ta dhayssadis.
11 Hessa gishshas ta wozinay
Mo7aabe gishshas
qadheta milas sissawus;
Qiire-Hereeseta gishshas
ta maraceya yeekkawus.
12 Mo7aabey pude
ba zumbulla bolla kezikkoka
daabura xalla;
iza woosas
ba eeqa keeth gelikkoka
go7ay deenna.
13 GODAY Mo7aabe gishshas kaseti yootida qaalay hayssa.
14 Ha7i gidikko GODAY, qaxxaretti ooththiza oosanchchay gallas qoodiza mala Mo7aabe bonchchoynne asaa corateththay heedzdzu layththa giddon kawuyana; heen attida asati guuththatanne wolqqay bayndayta gidana.