17
Damasqo Bollanne Isra7eele Bolla Xoossa Qixaate
1 Damasqo gishshas,
«Be7ite, hayssafe sinththan
Damasqo katamateththi attana;
laaleththa doore gidana.
2 Aaro7eere katamati kays gidana;
mehe heenththasoho gidana;
istta babisiza miishshika deenna.
3 Gimbettida katamay Efreemeppe,
kawoteththa maatay
Damasqofe dhayana;
Aaraameppe casha
attidayta bonchchoy
Isra7eeletayssa mala
kawuyana» gees
Ubbaafe Wolqqama GODAY.
4 «He wode Yaaqoobe
bonchchoy shaarumatana;
iza modhdhoteththaykka
shuumana.
5 Kath maxizaadey
eqqida kaththaa shiishshidi
modhe ba kushen maxiza mala
Erafayme shoobbafe maxettiza
pushulo mala gidana.
6 Wogara mith shociin
nam7u woykko heedzdzu ayfeti
hagga xeera bolla attiza mala
oyddu woykko ichchash ayfeti
dhippi gida haggata bolla
attiza mala
guuththa haggati attana»
gi GODAA Isra7eele
Xoossay haasaydes.
7 He wode asay
bana Medhdhidayssako xeellana;
istta ayfey
Isra7eele Geeshshaako xeellana.
8 Istti bantta kushen ooththida
yarshosohota xeellettenna;
istti bantta eeqatas
exaane cu7asizasohotassinne
Asheeris goynnana essida
tuussatas bonchcho imettenna.
9 He wode Isra7eele asaa gaason
boshettontta attida mino katamati
woranne aykkoy bayndaso gidana.
10 Nena ashshiza Xoossaa baladasa;
ne izan qotetta attiza
ne zaallaka akeekabeekka;
hessa neni doorettida
atakilte tokkikokka,
ooraththa zereth ne zerikkoka,
11 ne tokkida gallas
izi mokkana mala
ne ooththikokka,
ne zerida wonteththa gallas
izi ciiyana mala ne ooththikokka
he kaththay hargeninne
paxontta sakon mulera dhayana.
Morkke Kawoteththata Xooneteth
12 Be7a, daro asaa hanqo giirissi
abba dambala mala giirees;
be7a, asaa waaso daroy
wolqqama haaththa mala
guummees.
13 Asay wolqqama
haaththa mala guummikkoka,
izi istta seerikko
zumbulla bollara carkon biza
gudulla mala
gote carkoy laalliza
happa mala laalettana.
14 Hekko Sa7ay qammishin
qofay baynda
shiro gidides;
sa7ay wonttanaappe kasetidi
oonikka beettibeenna.
Nu aqota bonqqidayta,
ubbaa wolqqan ekkizayta
qaaday hessa.