22
Yerusalaame Bolla Yootettida Tinbite
1 Ajjuuta zulle bolla yootettida mino yo7o;
Inttena aazi metiin ubbay
pooqe bolla kezidetii?
2 Hanne wocamay kumida
katamayee!
Shiroynne dirbbay
kumida katamayee!
Neeppe hayqqidayti
mashshan hayqqibeettenna;
woykko olan hayqqibeettenna.
3 Nena ayssizayti ubbay
issife baqatida;
wondafe denththontta
dishe di7ettida;
morkkey haahon dishin
baqatida ubbatoo!
Intte oykettidi
issi bolla qashettideta.
4 Hessa gishshas tani,
«Taappe haakkite;
ane camo yeeho ta yeekkays;
dhayda ta asaa gishshas
tana minththeththana qoppofte» gadis.
5 GODAY Ubbaafe Wolqqama
Xoossay Ajjuuta Zullen wocama,
dirbbanne shiro,
dirsata laaleththinne zumatakko
waaso gallassi dees.
6 Elaamey wondafe yiishsha kooho,
ba paratanne
para-gaareta giigsides;
Qiireykka ba gondalle oykkides.
7 Lo7o zulleti para-gaaretan kumida;
toga asati katamay
pengen eqqida.
8 Yuhuda miixata laallida;
he wode wora giddon
minjja keeththan diza
ola massara
ne xeelladasa.
9 Dawite katamay
daro laalettidayssa be7ideta;
duge baggara haath eelissideta.
10 Yerusalaamen diza
keeththata qoodideta;
dirsaa ooraththanaas
keeththata laallideta.
11 Kase gal7a eele haaththaa zaaridi,
iza minjjizaso nam7u gimbetappe
giddon giigsideta.
Gido attiin intte hessa ooththiday
oonakko eribeekketa;
koyro halchchi
ooththidayssa akeekibeekketa.
12 He gallas
GODAY Ubbaafe Wolqqama Xoossay
intte yeekkana malanne
waassana mala,
intte hu7e binana
buucana malanne
maaqa may7ana mala xeygides.
13 Gido attiin injjenne ufays,
booranne dharsho shukay,
asho muussinne
woyne ushshi dees;
«Nuni wonto hayqqana gishshas
ane moossinne uyoos» gideta.
14 GODAY Ubbaafe Wolqqama Xoossay hayssafe kaallizayssa taas qonccisides; izakka ta hayththan siyadis; «Hayssi ha nagarazi intte hayqqana gakkanaas wursiin wurenna.»
15 GODAY, GODAY Ubbaafe
Wolqqama Xoossay,
«Baada kawo keeththa
alaafe Sheebina,
16 Hayssan ay ooththay?
Hayssa nees duufo giigsanaas,
dhoqqasohon ne moogettanaaso
woocanaas, ne ahay
uttanaaso zaalla woocanaas
ooni nena azazidee?
17 Haysso mino addezoo! Naagetta;
GODAY nena minththi oykkidi
ba kushen cuucumi oykkidi
olana hanees.
18 Nena yanbarsha mala yuushshidi
aako biittan olana;
ne godaa keeththas
ne yeella gidadasa;
ne heen hayqqana;
ne bonchcho para-gaaretikka
heen attana.
19 Ne bonchchettidasoppe
ta nena kawushshana;
alaafeteththaafekka
ne goodettana» ga.
20 «He gallas tani Kilqiyaasa naa ta ashkara Elyaaqeeme xeygana.
21 Ne seeloza ta iza mayzana; ne giththaa iza gixissana; ne daannateththaaka ta izas aaththa immana. Izi Yerusalaamen diza asaassinne Yuhuda asaas aawa gidana.
22 Tani Dawite keeththa qulpe iza hashen woththana; izi doyiin oonikka gordenna; izi gordiin oonikka doyenna.
23 Tani iza ammanettizasohon dhishke mala essana; izi ba aawa keeththas bonchcho araata gidana.
24 Qeeri xaaroppe biidi baath gakkanaas soon diza miish ubbaa kocan kaqqiza mala iza aawa keeththa bonchcho ubbay naytappe biidi naa naa gakkanaas iza bolla qaaphettana» gides.
25 GODAY Ubbaafe Wolqqama Xoossay, «He gallas ammanththizason eqqida dhishkey shodettana; meqqi wodhdhana; iza bolla kaqettida ubbay kundidi meqerettana» gides; hayssa GODAY yootides.