23
Xiroose Bolla Yootettida Tinbite
1 Xiroose bolla yootettida mino yo7o;
Xiroosey dippi gi dhayda gishshas
Tarseese markabetoo waassite;
keeththinne wodebey
bayndaso gidadus.
Qophiroose biittafe
worey kezides.
2 Intteno harurotoo!
Intteno duretida
Sidoona zal7anchchatoo!
Co7u giite!
3 Gita abbaara Shihooreppe
Xirooses kaththi yees;
Xiroose aqotay
Abbayeppe beettees;
iza kawoteththatas
zal7e baach gidadus.
4 Hanne Sidoona katamayee!
Hanne abba miixaye neni yeellata;
abbay, «Tani miixatabeekke;
naakka yelabeekke;
attuma naytanne macca nayta
dichchabeekke» gides.
5 Xirooseppe keziza paapunththay
Gibxe biittan siyettiza wode
istti ceecana.
6 Intteno harurotoo! Zilalite;
Tarseese pinnite.
7 Izi tohoy izo haako dere efidaara
heen iza uttana mala
ooththidaara,
kase beni katamaya
injjenne ufayssa katamaya hannii?
8 Kallachcha goxissidaari bolla,
ba zal7anchchata
daannasidaari bolla,
biitta bolla bonchchettidi
bayzizaytinne
laammizayti izin diza
Xiroosi bolla
hayssa qoppiday oonee?
9 Otorettizayta ubbaa
bonchcho kawushshanaas
qasse biittaa bolla
dhoqqu dhoqqu gidayta
ziqqi histtanaas
GODAY Ubbaafe Wolqqama
Xoossay halchchides.
10 Intteno Tarseese biitta asatoo!
Inttena teqqizay baynda gishshas
Abbaye shaafa mala intte
biitta bollan kumidi goggite.
11 GODAY ba kusheza
abba bolla miccides;
izi kawoteththatakka
daganththides;
Kanaane miixati
laalettana mala azazides.
12 Qasseka, «Hanne qoxettida
Sidoona geela7oyee!
Hayssafe guye ufayettofa;
denda Qophiroose pinna;
heenkka ne saro demmaka» gides.
13 Ane Baabiloone biitta be7ite;
he biitta asay
paththontta as gidides;
Asoore asay izo bazzo do7as
gufaso kessides;
istti bantta shakkota
izi bolla gimbida;
izi miixata laallida;
budhettoyssi doore gidides.
14 Intteno Tarseese
markabetoo, waassite!
Intte miixay laalettides.
15 He wode Xiroose katamay issi kawos de7o layththa keena laappun tammu layth dogettana; hessafe guye layma maccassay gishshas yexettida yeththi Xiroose bolla yexettana.
16 Istti, «Hanne dogettida
layma maccassayee!
bagana denththa;
katamay giddon yuuya;
ne hassa7ettana mala
baganaa lo7eththa shoca;
daro mazamure yexxa» gaana.
17 Laappun tammu layththi polettidaappe guye GODAY Xiroose qoppana; gido attiin iza kase ba layma ooson simmana; sa7a bolla kawoteththata ubbaara ba laymateththa zal7e zal7ana.
18 Gidikkoka iza demmida ubbaynne wodhey GODAAS dummatana; dagattennanne suuddenna; izi wodhey GODAA sinththan de7izaytas palahida kaththinne lo7o may7o gidana.