24
Goday Sa7a Bolla Ehana Qixaate
1 Be7ite! GODAY biittaa
bula kessana;
mulera dhayssana;
budheththa doore histtana;
izin diza asaa laallana.
2 Ubbaa miishshika issi mala gidana;
dereza bolla hanzayssi
qeeseza bolla hanana;
aylle bolla hanzayssi
godaa bolla hanana;
ashkaray bolla hanzayssi
godattey bolla hanana;
shammizayssa bolla hanzayssi
bayzizayssa bolla hanana;
tal7e ekkizayssa bolla hanzayssi
tal7e immizayssa bolla hanana;
aco ciggizayssa bolla hanzayssi
aco cigissizayssa bolla hanana.
3 Biittay mulera bula gidana;
mulera bonqqettana;
ha qaalaa GODAY haasaydes.
4 Biittaya melana;
izin diza ubbay qokkana;
alamey daaburana;
biitta bolla erettida
gita asati daaburana.
5 Biittay ba asaan tunadus;
istti woga menththida;
maaraa moorida;
mernaa caaqo qaala menththida.
6 Hessa gishshas qanggeththi
biittaa mees;
izin de7iza dereti
bantta mooron
qaxxayettana bessees;
Hessa gishshas sa7a bolla diza
asati xuugettida;
isttafe qoodan guuththa
asati attida.
7 Woyne turay meliin
woyne ushshi wurides;
kase ufayettiza ubbay ceecides.
8 Ufayssan karabe baqay
co7u gides;
kaa7izayta hombocaykka eqqides;
ufayssiza diiththa giirissi
co7u gides.
9 Hayssafe guye istti yexxishe
woyne ushshu uyettenna;
ushshayka uyizayta cammana.
10 Laalettida katamaya kayzadus;
keeththa pengetikka gordettida.
11 Woyne ushsha gishshas
dubbushan waasseettes;
ufayssi ubbay
ceecen laamettana;
homboca kaassi
biitta bollafe dhaydes.
12 Katamaya mulera laalettadus;
pengetikka meqeretti kundida.
13 Wogara miththa ayfe shoci qoqofiin
woyne miththa qanxxi ekkiin
attiza attida pushulo mala
biittaa bolla, kawoteththata bolla
hessaththo hanana.
14 Istti bantta qaalaa dhoqqu histtidi
ufayssan yexxana;
arshey wulliza baggafe
GODAA gitateththa yootana.
15 Hessa gishshas arshey
mokkiza baggara dizaytoo,
abban diza haruroti
GODAA Isra7eele Xoossaa,
sunththaa dhoqqu dhoqqu
histtite.
16 Biittaa gaxaappe,
«Xillozas bonchchoy gido»
giza mazamure nu siyidos;
«Tani gidikko gilqada
meqeth attadis;
Tana aayye ana!
Kaddizayti kaddeettes;
aaththi immizayti
aaththi immeettes» gadis.
17 Intteno sa7a bollan diza asatoo,
dagamay, ollaynne woximadey
inttena naagees.
18 Salo maskooteti
doyettida gishshas,
biitta yochchatikka qaaxxida;
shiroppe baqatizay
ollan kundana;
ollafe kessi ekkidaykka
woximaden oykettana.
19 Biittay qaaxxides;
za7idessinne phalqetti
wodhdhides.
20 Biittay maththottida
asa mala yiicotides;
carkoy sugida
gaabba mala gidadus.
Biitta makkallateththay
deexo gidida gishshas kundana;
nam7anththoka simmi dendenna.
21 He gallas GODAY
bolla salon diza wolqqamata
gars biitta bolla diza
kawotakka qaxxayana.
22 Istti ollan diza qasho asa mala
issi bolla uucettana;
istti qasho keeththan
gordetti uttana;
daro wodeppe guye
istti pirda ekkana shiiqana.
23 Ubbaafe Wolqqama GODAY
Xiyoone zumaninne
Yerusalaamen cimata sinththan
bonchchon kawotana;
he wode aginay shaaphettana;
awa ayfeykka yeellatana.