31
Gibxen Ammanettizaytas Aayye Ana
1 Pude Isra7eele geeshshaako xeellonttaytas,
GODAAPPE maado koyonttaytas,
maado demmanaas
duge Gibxe wodhdhizaytas,
para-gaareta daroteththaninne
ba para minoteththan
ceeqettizaytas
aayye ana.
2 Izi gidikko aadho eranchcha;
izi bash ehana;
ba qaalakka laammenna;
iita ooththizayta bollanne
qoho ooththizayta
maaddizayta bolla
izi dendana.
3 Gibxe asay asappe attiin
Xoos deettenna;
istta paratikka ashoppe attiin
ayana gidettenna.
GODAY ba kushe micciza wode
iza maaddizaadey dhuphettana;
maadettizaadeyka kundana;
nam7ayka issife dhayana.
4 GODAY taas, «Gaammoy woykko
wodalla gaammoy mehe oykkidi
daro heenththanchchati
xeygetti shiiqidi
iza bolla yiikko istta waasoy
iza yashisonttayssa
istta waasoy
iza daganththonttayssa mala
Ubbaafe Wolqqama GODAY
zumaa bollanne zumbullata bolla
olas wodhdhana.
5 Kafoy bollara aalanththiza mala
Ubbaafe Wolqqama GODAY
Yerusalaame kammana,
naagananne ashshana;
izi bollara aadhdhidi
izo ashshana» gees.
6 Intteno Isra7eele asazoo!
Intte keehippe
makkallidayssaako simmite.
7 He wode nagaray kumida
intte kusheti birappenne
worqqafe ooththida eeqa xoossata
intte ubbayka wora yeggana.
8 «Asoorey asa
mashsha gidontta
mashshan hayqqana;
asho may7idaade
mashsha gidontta
hara mashshay iza maana;
izi giththa mashsha sinththafe baqatana;
naateththati dosay baynda
wolqqaththon ooththana.
9 Mino miixay shiro gaason kundana;
ola gadawatikka
ola bandira be7idi
dagaman kumana»
gees tamay Xiyoonen,
tama coocey
Yerusalaamen
diza GODAY.