32
Xilloteththan Ayssiza Kawo
1 Be7ite, kawoy xilloteththan kawotana;
haarizaytikka
suure pirdan haarana.
2 Asi hu7en hu7en
carkofe geemmizasoho,
goteppeka baqati
attizasoho gidana;
bazzo biittan
haaththa pultto mala,
saamettida biittan wogga zaalla
kuwa mala gidana.
3 Xeelliza asata ayfey
hayssafe guye qilim7enna;
siyizayta hayththi
beeggidi ezgana.
4 Tapitapizayta wozinay
erananne akeekana;
Deddotizayta inxarsika
birshettana;
geeshshidikka haasayana.
5 Hayssafe guyen eeyay
gita as geetettenna;
wogay baynda asi bonchchettenna.
6 Eeyay eeyateth haasayees;
iza wozinay iitateth
yuushshi qoppees;
Xoossas yashshateththi
baynda miish ooththees;
GODAA bolla
bala qaala haasayees;
gafidayssas kath immenna;
saamettidayssas haath immenna.
7 Wogay baynda asata
hiillateththi iita;
metotanchchata maganay suure gidikkoka
hiyeesata wordora dhayssanaas
iitateththan yuushshi qoppees.
8 Gita asas qofaykka gita;
ba gitateththa ooson
minni de7ees.
Pirdafe Guye Yaana Injje De7o
9 Intteno otoroy tuccida maccassatoo!
Dendite; ta gizaaz siyite;
intteno badhdhi gi uttida
macca naytoo!
tani inttes yootizayssa ezgite.
10 Layththay buro aadhdhida mala,
intte badhdhi gi
uttidayti kokkorana;
woyne turay ayfe immenna
dumma dumma ayfe
intte shiishshiza wodey yeenna.
11 Intteno otoroy
tuccida maccassatoo! Kokkorite.
Intteno badhdhi gida
macca naytoo!
Hirgan gajigajite.
Intte may7ida may7o
qaari yeggite;
intte xeessan maaqa danccite.
12 Aradda biitta gishshas
intte tiraa iccite;
ayfiza woyne
miththaa gishshas ceecite;
13 Ta deraa biittaa gishshas,
agunththinne kindichchoy
mokkida biittaa gishshas,
homboceththan isttan guppiza
keeththata ubbaa gishshas,
homboceththan izin guppiza
katamays yeekkite.
14 Miixati kayzana;
daro shirotiza katamaya
dimmi gaana;
miixatinne qatoti mernaas gongolo,
hardidati guppizasohonne
wudey heemettizaso gidana.
15 Hessika hananay Ayanay nuus
bollafe gukkanaashe,
bazzo biittay aradda gidanaashe,
aradda biittay wora
misatanaashe gakkanaassa.
16 Hessafe guye bazzo biittan
suure pirday de7ana;
aradda biittankka
xilloteththi daana.
17 Xilloteththa ayfey saroteth;
xilloteththa oosoy woppanne
mernaas ammaneteth gidana.
18 Ta derey saroy dizason,
ammanththizason,
woppay dizason woppu gi daana.
19 Shachchi woraa kurakkiko,
katamaykka mulera kundiko,
20 shaafay dizason dizason
kath zerizaytoo,
intte booratanne hareta
hirgay baynda heemmizaytoo,
intte ay mala
anjjettidayta gidandetii!