34
Dere Bolla Yaana Pirda
1 Intteno kawoteththatoo shiiqidi siyite!
Neni derezi akeeka!
Biittaynne biittan diza ubbay,
alameynne alameppe yida
ubbay siyo!
2 GODAY kawoteth ubbaa hanqettides;
iza hanqoyka iza olanchchata
ubbaa bollana.
Izi istta mulera dhayssana;
shukaska aaththi immana.
3 Isttafe hayqqidayti kare olettana;
istta ahay xinqqana.
Zumati suuth xalla gidana.
4 Salo xoolintteti ubbay seerana;
saloy galba mala xaaxettana;
cora xoolintteti ubbay,
shullidi qoqofettiza
woyne hayththa malanne
melidi sa7an wodhiza
balase hayththa mala gidana.
5 Ta giththa mashshay
salota giddon
baas gidana gakkanaas uyadus;
be7ite; Eedoome bolla,
tani qanggida asaa bolla
pirdanaas wodhdhadus.
6 GODAA giththa mashshay
suuth may7adus;
modhdhoka kalladus;
dorsa laaqqa suuththaninne
deysha suuththan goozettadus;
dharsho kilaho
moodhen goozettadus;
GODAY Booxira kataman yarsho,
Eedoomen wolqqama shuka
giigsida gishshassa.
7 Qasse Isttara menththi,
kormay wofanora issife kundana;
biittaya suuththan caphana;
istta biittay modhdhon araddana.
8 Hessika GODAY
halo kessiza gallassinne
Xiyoone gishshas
morkketa oliza layth gidana.
9 Eedoome kanchcheti shida gidana;
izi biittay xuugettiza
diine gidana;
izi biittay shida mala eexxana.
10 Izo miza tamay
qammanne gallas to7enna;
cuwaykka mernaas tullu gaana;
yeletappe yeleta gakkanaas
kays gidana.
Oonikka nam7anththo
heera aadhdhenna.
11 Xiloynne quxarsi izo laattana;
guttoynne quuroy
izin keeth keexxana;
Xoossi Eedoome bolla
izo laallana wodoronne
izo dhayssana tumbe yeddana.
12 Izi daannati
kawo geetetti xeygettanaas
dandayza miishshi deenna;
izi halaqati
mulera pitetti dhayana.
13 Gimbetti yuuyida katamata,
izi miixata doyoynne
okkay laattana;
worakanata ollanne
guttota duussaso gidana.
14 Bazzo do7ati godaretara
issife daana;
bazzo deysh misatiza
daydanththati
bantta giddon xeygettana;
omarsa medhetati
heen shemppana;
banttas duussaso heen demmana.
15 Guttoy he keeththan
phuuphphulleta yeggana;
zaaradakka phuqissana;
ba ciyetakka haphphana;
woleti waaththan waaththan
heen shiiqana.
16 GODAA maxaafan xeellite; nababite.
Haytappe issoyka paccenna;
issoy issoy baas
waaththa lagge dhayenna;
hayssi ha azazozi
iza doonappe kezides;
iza ayanay istta
issi bolla shiishshana.
17 Istta gisha gisha isttas woththana;
iza kushey meezaanen
meezaanen gishana;
iza mernaas isttas gidana;
yeletappe yeleta gakkanaas
istti izin de7ana.