35
Wozzettida Dere Ufays
1 Bazzoynne mela biittay ufayettana;
aykkoy baynda
bazzoy ufayettana;
ciishsha malakka ciiyana.
2 Izi daro ufayettananne miiccana;
Libaanoose bonchchoy
izas imettana;
Qarmeloosenne Lasharoone
teema izi may7ana;
nu GODAA bonchchonne
Xoossaa gitateththaa istti be7ana.
3 Daaburda qeseta minththite;
argacida gulbatata minththite.
4 Wozinan yashshay dizayta
«Minnite! Yayyofte!
Intte Xoossi yiidi halo kessana;
izi inttena ashshanaasinne
halo kessanaas yaana» giite.
5 He wode qooqeta ayfey xeellana;
tulleta hayththi siyana.
6 Wobbey genessa mala guppana;
duude doonay ufayssan yexxana;
bazzofe haaththi kezana;
pulttoy bazzo biittafe pulttana.
7 Xuuggiza biittan
eele haaththi kumana;
mela biittati haath pulttana;
worakanati aqiza ollan
maatay, maqqaynne
shaccay mokkana.
8 Heen wogga
ogey oosettana;
izikka, «Geeshshateththa
Oge» geetettana.
Tunati he ogera beettenna;
ogezi he ogera bizaytas
xalla gidana;
geellati he ogaara
baana dandayettenna.
9 Heen gaammoy de7enna;
dafi miza do7aykka izan kezenna;
heytantti heen beettettenna;
wozzettidayti xalla heera baana.
10 GODAY maaddidayti simmana;
istti yexxishe Xiyoone gelana;
mernaa ufayssa
kallachcha mala goxxana;
injjenne ufays demmana;
ceeceynne kayoy
heeppe baqatana.