40
Xoossa Dere Minththeththiza Qaala
1 Intte Xoossay,
«Minththeththite! Ta dereza minththeththite!
2 Yerusalaameskka shugo qaalara yootite;
izis awajjite;
iza aylleteththan
ooththiza wodey wurides;
izi nagara waagay cigettides;
iza ba nagara ubbaa gishshas
GODAAPPE nam7u kushe
qixaate ekkadus» gees.
3 Awajja yootizaade cenggurssi,
«Bazzon GODAA oge giigsite;
nu Xoossaas Aaraba bazzon
aako oge giigsite.
4 Shoobbay ubbay pude dhoqqu gaana;
zumaynne zumbullay ziqqi gaana;
kundukurcco biittay
issi gina gidana;
kurppoti demba gidana.
5 He wode GODAA bonchchoy qonccana;
asho may7ida ubbay
hessa issife be7ana.
GODAA doonay hessa haasaydes» gees.
6 Cenggurssi tana,
«Waassa!» gides.
Tanikka, «Ay ga waassoo?» gadis.
Izikka, «Asi ubbay maata mala;
iza bonchcho ubbayka
demba ciishsha mala.
7 GODAY ba shempo
iza bollan shempishin
maatay melees;
ciishshika qokkees;
tumappe derey maata mala.
8 Maatay melees;
ciishshayka qokkees;
gido attiin nu Xoossaa qaalay
mernaas minni dees»
gaada waassa gides.
9 Nenoo mishiraachcho
Xiyoones yootizaysso,
dhoqqa zuma bolla keza;
nenoo mishiraachcho
Yerusalaames yootizaysso,
ne cenggurssaa
dhoqqu histta waassa;
dhoqqu histta, babbofa;
Yuhuda katamatas,
«Hekko intte Xoossaa»
gaada yoota.
10 Hekko Ubbaa Haariza GODAY
wolqqara yees;
iza qesey iza gishshas haarana.
Be7ite iza woytoy izara dees;
izi ciggana ooso waagaykka
izara dees.
11 Izi ba wude
heenththanchcha mala heemmees;
ba laaqqatakka
ba qesen tookkees;
ba ki7onkka idimmees;
dhanththizaytakka
loddara kaaleththees.
12 Haaththata ba kushe
kuphphen makkiday,
salota tadhdhakiday,
baana daachchon
makki oykkiday,
zumata ba meezaanen,
zumbullatakka meezaanen
woththiday oonee?
13 GODAA Ayana shaakki eriday,
iza zorizaade gidi
tamaarsiday oonee?
14 Erateth demmanaas GODAY
oona zore oychchidee?
Suure oge iza tamaarsiday oonee?
Erateth iza tamaarsiday,
akeeka ogekka iza
bessiday oonee?
15 Be7ite kawoteththati gombo giddon
xokkida haaththa mala;
istti meezaane bolla diza
gudulla mala qoodetteettes;
harurota liiqo
biitta mala geeddarees.
16 Libaanoosey yarshosoho
tamas gidukku;
izi medosata qoodaykka
xuugettiza yarshos guuththa.
17 Kawoteththati ubbay iza sinththan
aykkoka gidettenna;
istti aykkorakka
gakki qoodettontta
hada miishsha mala.
18 Histtiin intte Xoossaa
oonara giniseetii?
Ay mislera gaththi giniseetii?
19 Eeqa misley gidikko
hiilla kushen masettides;
hessa worqqa
ooththizaadey bollara
worqqan meeshees;
bira sansalatakka izas giigssees.
20 Hessa mala yarsho
shiishshanaas dandayontta
manqo asi musontta
mith doorees;
kundontta misle essanaas
erettida hiilla koyees.
21 Intte hessa erekketii?
Woykko siyibeekketii?
Beni beni inttes yootettibeennee?
Sa7ay medhettoosofe doommiin
intte akeekibeekketii?
22 Izi biitta yuushoppe
bollara
ba araatan uttees;
biitta bolla diza derey
boole mala;
salota magalasha mala miccees;
duussaso dunkaane mala tokkees.
23 Halaqata hada histtana;
ha biittaa ayssizaytakka
pitti dhayssees.
24 Istti tokettidi gam7ontta dishin,
zerettidi takkontta dishin,
buro xapho yeddontta dishin
istta bolla carko yeddiin melida;
gotey istta suulla mala
pitti efides.
25 Geeshshazi isttas,
«Tana oonara giniseetii?
Tanara ginattizay oonee?» gees.
26 Intte ayfe dhoqqu histtidi
pude salo xeellite;
haytantta ubbaa
medhdhiday oonee?
Salo xoolintteta
issaa issaa kessizay,
istta sunththan sunththan
xeygizay iza.
Izi ba gitateththaninne
ba erateththa minoteththaafe
dendidayssan
isttafe issoyka dhayenna.
27 Yaaqoobe ne ays hessaththo gay?
Isra7eele ne ays hessaththo haasayay?
«Ta ogey GODAAPPE geemmides;
ta pirday Xoossa achchan
wudu geetettibeenna» ays gay?
28 Ne erabeekkii?
Ne siyabeekkii?
GODAY mernaa Xoossa;
izi biittaa ubbaaka medhdhidayssa.
Izi daaburenna; azallenna;
iza akeekaykka
oonankka pilggettenna.
29 Minoteththi bayndaades
minoteth immees;
Daaburdayssas wolqqa gujjees.
30 Yelagatikka daabureettessinne
azalleettes;
naateththatikka
dhuphettidi kundeettes;
31 Gido attiin GODAA
hidota ooththizayti
bantta wolqqa ooraxisseettes;
istti golle mala piradhdhana;
istti daaburontta woxxana;
istti baana; argacettenna.