41
Isra7eele Maado
1 GODAY, «Intteno harurotoo,
co7u giite;
kawoteththati ba wolqqa ooraththetto;
shiiqidi haasayetto;
ane pirda shilota
sinththan gayttoos.
2 Arshey mokkiza baggafe
issaa denththiday,
xilloteththan baas haggazissana
xeygiday oonee?
Izi kawoteththata
izas aaththi immees;
izi istta giththa mashshan
biitta kessides;
ba wondafen carkoy
laallida
suulla mala kessides.
3 Istta gooddi yeddidi
metoy baynda aadhdhi bides;
iza tohoy kase yedhdhontta
ogera hemettides;
4 Hayssa ooththidaynne poliday
yeletaa beniisofe xeygiday oonee?
GODAY koyroytarakka
wurseththaytarakka
dizay tana» gees.
5 Haruroti be7idi yayyida;
sa7a gaxatikka kokkorida;
issi bolla shiiqidi sinth yida.
6 Issoy issaara maadettees;
ba ishaakka,
«Aykkoy baa minna» gees.
7 Hiillanchchay worqqa ooththizayssa
minththeththees;
naariqan qoxxi le7issizaadey
birata marcon
seerisizayssa minththeththees;
birata seerisi oyseththoy,
«Lo7o» gees;
eeqa xoossaa misley
kundontta mala
misimaaren torggees.
8 GODAY, «Gido attiin nenoo
ta ashkara Isra7eele,
ta doorida Yaaqoobe,
ta laggeza Abrahaame
zereththazoo,
9 tani nena biitta
gaxappe ehidayssoo,
saloy danxxoosoppe
xeygidayssoo,
‹Ta nena ta ayllezoo›
gidayssoo ta nena
dooradis attiin olaagabeekke.
10 Tani nenara diza gishshas yayyofa;
tani ne Xoossa gidida gishshas
dagammofa.
Tani nena
minththananne maaddana.
Ta xilloteththa ushachcha kushen
zemppisa oykkana.
11 «Be7a ne bolla hanqettida ubbay
keehi yeellatananne kawuyana;
nenara eqettizayti
tim7i gi dhayana.
12 Neni ne morkketakka
koyadakka demmaka;
nena olizayti pitetti dhayana.
13 Gaasoykka tani GODAA ne Xoossay,
ta nena maaddana; yayyofa
ta ne ushachcha
kusheza oykkana.
14 Nenoo guxunezoo Yaaqoobe,
nenoo qeeri Isra7eele,
‹Yayyofa tani
nena maaddana› gees.
Nena wozzizay
Isra7eele Geeshshaza.
15 Be7a tani nena oorath,
qaranne achchara diza
kath bukkiza loda ooththana;
neni zumata goya liiqisana;
zumbullatakka yedhdha
happa kessana.
16 Neni istta suraggana;
carkoy istta pitti efana;
goteykka istta laallana.
Gido attiin neni
GODAAN ufayettana;
qasse Isra7eele Geeshshan
bonchchettana.
17 Hiyeesatinne metotanchchati
haath koyana;
gido attiin
aykkoka demmettenna;
haaththa saamon isttas
poorandey melides;
Gido attiin tani GODAY
isttas zaaro immana;
tani Isra7eele Xoossay
istta yegga aggike.
18 Tani bulattida
zumbullata bolla shaafata,
shoobbatan pulttota dhuussana;
bazzo biitta eele haath,
saamettida biittaan
haaththa pultto kessana.
19 Bazzo biittan ziga,
odoro, barseneetenne,
wogara mith moyzana;
aykkoy baynda bazzon xiidda,
guunththanne oonth tokkana.
20 Hessa gishshas asay
hessa be7ananne erana;
GODAA kushey
hayssa ooththidayssa,
Isra7eele Geeshshay medhdhidayssa
istti issife yuushshi qoppananne
akeekana» gees.
Xoossay Wordo Xoossata Ixxees
21 GODAY,
«Ane intte mooto
ekkidi haa shiiqite» gees.
Yaaqoobe Kawoy, «Ane intte mooto
daafaa haa ehite» gees.
22 Buroppe hananayssa yootana mala
intte eeqa xoossata haa ehite;
nu akeekana malanne
istta wurseththaaka erana mala
kase yo7oti aazakko nuus yootite;
buroppe hanana miishshata erite.
23 Intte xoossata gididayssa
nu erana mala,
sinththafe hanana
miishshata nuus yootite;
nuni dagammana malanne yayyana mala,
lo7o gidiin woykko
iita miish ooththite.
24 Hekko intte aykko
qoodan gelonttayta;
intte oosoy mulekka hada;
inttena dooridayti harassizayta.
25 «Tani pudeha baggafe
issaa denththadis;
izikka yees.
Arshey mokkiza baggara yizayssi
ta sunththaa xeygizayssa;
manay urqqa yedhdhiza mala
izi kaaleththizaytakka
yedhdhees.
26 Nuni erana mala koyrotti
nuus awajjiday,
‹Izi likke› nu gaana mala
nuus kaseti yootiday oonee?
Oonikka yootibeenna;
sinththatidi yootiday deenna;
inttefe ay qaala
siyidaykka deenna.
27 Koyrottada, ‹Hekko tani be7adis›
gaada Xiyoones awajjiday tana;
Yerusalaames mishiraachcho
yootizaade immadis.
28 Tani xeelliza wode oonikka deenna;
istta giddon zoranchchay baawa;
ta oychchida wode
zaaro immizaykka deenna.
29 Be7ite istti ubbayka hada;
istta oososka go7ay deenna;
istta misletikka
aykkoy baynda carko mala» gees.