42
Godaa Ashkara
1 GODAY, «Tani kaafa oykkida
ta ashkaray,
ta izan ufayettiza
muurutay hayssa;
tani ta Ayana
iza bolla woththadis;
izi kawoteththatas
suure pirda ehana.
2 Waassenna; ba qaala dhoqqisenna;
ba cenggurssaaka
oge bolla keehi sissenna.
3 Dinccettida maqqa izi menththenna;
cuwattiza muqaadda
izi toyssenna;
ammaneteththan
izi suure pirda ehana.
4 Izi biitta bolla suure pirda
ehana gakkanaas daaburenna;
hidotakka qanxxenna;
haruroti iza wogan
ammanettana» gees.
5 Salota medhdhiday,
istta miccidaykka,
sa7anne izin diza ubbaa giigsiday,
ba deres peeno
izin de7iza asatas shemppo
immiza GODAA Xoossay,
6 «Tani GODAY
nena xilloteththan xeygadis;
ta ne kushe oykkana;
ta nena naagana.
Tani nena kawoteththaas
caaqo qaala,
ayzaabetaska poo7o histtana
7 Ne qooqeta ayfe doy7ana;
di7ettidayta qasho keeththafe birshana;
dhuman uttidaytakka
karchchallefe kessana.
8 «Tani GODAA; hayssi ta sunththa;
ta bonchcho haras aaththa immike;
ta galataakka eeqa xoossatas sheedhdhike.
9 Be7ite beni yo7oti polettida;
ha7i tani ooraththa miish awajjays;
izi mokkanaappe sinth
ta inttes yootays» gees.
Galata Yeth
10 Intteno duge abban wodhdhizaytoo,
heen diza ubbatoo!
Intteno harurotoo!
Heenkka diza ubbatoo!
GODAASSI ooraththa mazamure yexxite;
biittaa gaxaappe doommidi
izas galata mazamure shiishshite.
11 Bazzoynne katamati bantta cenggurssaa
dhoqqu histtetto;
Qeedaarey de7iza gutay ufayetto;
Seela dere asati
ufayssan yexetto;
zuma xeerankka ililetto.
12 Istti bonchcho GODAAS immetto;
iza galataykka harurotan awajjetto.
13 GODAY ola qara mala kezana;
olanchcha mala ho7etti dendana.
Ceeqeteththa gayro sissana;
ba morkketakka oli xoonana.
Goday Ba Deraa Maaddana Immida Hidota
14 GODAY, «Tani adussa wodeesofe
co7u gadis;
sirphi gadis;
tana qum7a oykkadis;
ha7i gidikko miixa oykettida
maccassa mala waassays;
sheenottayssinne bannakays.
15 Tani zumatanne zumbullata woddisana;
doozata ubbaa melissana.
Shaafata haruro biitta kessana;
eele haaththatakka micinchchana.
16 Tani qooqeta istti erontta
oge kaaleththana;
istti meezetontta ogerakka
ta istta efana;
dhumaza ta istta sinththan poo7isana;
kundukurcco sohota ta giigsana;
haytantta ubbaa ta ooththontta aggike.
17 Eeqa xoossatan ammanettizayti gidikko
misletakka, ‹Intte nu xoossata› gizayti guye simmana;
istti mulera kawuyana» gees.
Isra7eele Asaa Qooqeteththinne Tulleteth
18 GODAY, «Intteno tulletoo siyite!
intteno qooqetoo be7itenne xeellite!
19 Ta ashkaraappe attiin
hara qooqey oonee?
Tani kiittidaadefe attiin
hara tulley oonee?
taas ammanettidaade mala
qooqey,
GODAA ashkara mala
qooqey oonee?
20 Daro miish be7ideta shin
akeekibeekketa;
intte hayththay doya dees shin
siyekketa» gees.
21 GODAY ba xilloteththaa
gishshas giidi,
ba wogaa gitanne
bonchcho
kessida gishshas ufayettides.
22 Ha derey bogettidanne bonqqettida,
olla giddon wodhdhida,
woyne keeththay iza bolla
gordettida dere;
istti bogettida;
istta ashshizaadey deenna;
istti di7ettida;
«Istta zaarite» gizaykka baawa.
23 Intte giddofe hayssa siyizay,
sinththafe yaana wodes
akeeki siyizay oonee?
24 Yaaqoobey bogettana mala,
Isra7eeley di7ettana mala
ooththiday oonee?
Nagara ooththidi
nu qohida GODAA gidennee?
Istti iza oge kaallanaassinne
iza wogaas azazettana koyontta
aggida gishshassa.
25 Hessa gishshas eexxiza ba hanqoza,
iita ola istta bolla yeddides;
tama lacon istta giddoththides;
istti gidikko hessa akeekibeettenna;
istta xuuggides shin
istti wozinan woththibeettenna.